ന്യുയോര്ക്ക്: അമേരിക്കയില് മതിയായ രേഖകളില്ലാതെ താമസിക്കുന്ന ഇന്ത്യന് പൗരന്മാര് ആശങ്കപ്പെടേണ്ടതില്ലെന്നും എല്ലാവരെയും തിരിച്ചെത്തിക്കാനുള്ള നടപടികള് സ്വീകരിക്കുമെന്നും ഇന്ത്യന് വിദേശകാര്യ മന്ത്രാലയം അറിയിച്ചു. പൗരത്വ രേഖകള് നല്കിയാല് തിരിച്ചെത്തിക്കാനുള്ള നടപടികളിലേക്ക് വിദേശകാര്യ മന്ത്രാലയം കടക്കുമെന്നാണ് കേന്ദ്ര സര്ക്കാര് വ്യക്തമാക്കിയത്. ഇന്ത്യന് പൗരന്മാര് അമേരിക്കയിലെന്നല്ല, മറ്റേതൊരു രാജ്യത്തായാലും മതിയായ രേഖകളില്ലാതെ താമസിക്കുന്നതിന്റെ പേരില് പുറത്താക്കപ്പെടുന്ന സാഹചര്യമുണ്ടായാല്, അവരെ ഉറപ്പായും തിരിച്ചെത്തിക്കുമെന്നാണ് വിദേശകാര്യ മന്ത്രാലയം വക്താവ് രണ്ധീര് ജയ്സ്വാള് ഇന്ന് വ്യക്തമാക്കിയത്.
Also Read:‘കെജ്രിവാളിനെ വധിക്കാന് ബിജെപി ഗൂഢാലോചന നടത്തുന്നു’ ; അതിഷി മര്ലേന
ഇന്ത്യന് പൗരത്വം സ്ഥിരീകരിക്കുന്നതിന് ആവശ്യമായ രേഖകള് സമര്പ്പിക്കുകയാണെങ്കില് ആരെയും തിരികെ കൊണ്ടുവരാനുള്ള നടപടികള് സ്വീകരിക്കുമെന്നും രണ്ധീര് ജയ്സ്വാള് വിവരിച്ചു. അനധികൃത കുടിയേറ്റത്തിന് ഇന്ത്യ എതിരാണെന്ന് പറഞ്ഞ ജയ്സ്വാള്, അനധികൃത കുടിയേറ്റം സംഘടിത കുറ്റകൃത്യമായി ബന്ധപ്പെട്ടതാണെന്നും വിശദീകരിച്ചു. അമേരിക്കയില് നിന്നും എത്രയാളുകളെയാണ് ഇത്തരത്തില് തിരിച്ചുകൊണ്ടുവരേണ്ടത് എന്ന കാര്യത്തില് പരിശോധന നടന്നുകൊണ്ടിരിക്കുകയാണെന്നും അദ്ദേഹം വിവരിച്ചു.