ഇന്ത്യൻ വീടുകളിൽ സ്വർണ്ണം എന്നും സമ്പത്തിന്റെയും പദവിയുടെയും പ്രതീകമാണ്. സ്വർണ്ണവില കുതിച്ചുയരുമ്പോഴും ഇതിനോടുള്ള പ്രിയം കൂടുകയല്ലാതെ കുറയുന്നില്ല. എന്നാൽ, ഒരു വ്യക്തിക്ക് എത്ര സ്വർണ്ണം വാങ്ങാം അല്ലെങ്കിൽ സ്വന്തമാക്കാം എന്നതിന് കൃത്യമായ നിയമപരമായ പരിധി ഇന്ത്യയിൽ ഇല്ലെങ്കിലും, ആദായനികുതി വകുപ്പ് (Income Tax Department) പുറപ്പെടുവിച്ച ചില മാർഗ്ഗനിർദ്ദേശങ്ങൾ പാലിക്കേണ്ടതുണ്ട്.
ഈ മാർഗ്ഗനിർദ്ദേശങ്ങൾ മറികടന്നാൽ, നിങ്ങളുടെ സ്വർണ്ണം നികുതി പരിശോധനയ്ക്ക് വിധേയമാവുകയും ഉറവിടം തെളിയിക്കാൻ സാധിച്ചില്ലെങ്കിൽ പിടിച്ചെടുക്കുന്നതിലേക്ക് വരെ കാര്യങ്ങൾ എത്തുകയും ചെയ്യും. 1994-ൽ സെൻട്രൽ ബോർഡ് ഓഫ് ഡയറക്ട് ടാക്സസ് (CBDT) പുറപ്പെടുവിച്ച ആ നിർണായക പരിധികൾ എന്തൊക്കെയാണെന്ന് നോക്കാം.
കുടുംബാംഗങ്ങളിൽ സ്ത്രീകൾക്കാണ് ഏറ്റവും കൂടുതൽ ഇളവ് ലഭിക്കുന്നത്.
രേഖകളോ വരുമാന സ്രോതസ്സോ നൽകാതെ ഒരു വിവാഹിതയായ സ്ത്രീക്ക് 500 ഗ്രാം വരെ സ്വർണ്ണാഭരണങ്ങൾ കൈവശം വയ്ക്കാം. ഈ പരിധിക്ക് മുകളിലുള്ള സ്വർണ്ണത്തിന് ഉറവിടം തെളിയിക്കുന്ന രേഖകൾ നിർബന്ധമാണ്.
Also Read: കുഞ്ഞിനൊരു കൊലുസെങ്കിലും വേണ്ടേ..! ഇന്ത്യയിലിങ്ങനെ സ്വർണ്ണവില കൂടുന്നത് എന്തുകൊണ്ടാണ്?
അവിവാഹിതരായ സ്ത്രീകൾ: അവിവാഹിതരായ സ്ത്രീകൾക്ക് 250 ഗ്രാം വരെ സ്വർണ്ണം കൈവശം വെക്കാൻ അനുവാദമുണ്ട്.
പുരുഷന്മാർക്ക് മാർഗ്ഗനിർദ്ദേശങ്ങൾ കൂടുതൽ കർശനമാണ്.
ഭർത്താക്കന്മാർക്കും ആൺമക്കൾക്കും രേഖകൾ കാണിക്കാതെ 100 ഗ്രാം വരെ സ്വർണ്ണം മാത്രമേ കൈവശം വയ്ക്കാൻ അനുവാദമുള്ളൂ. ഈ പരിധിക്ക് മുകളിലുള്ള സ്വർണ്ണത്തിന് ശരിയായ രസീതുകളോ നിയമപരമായ വരുമാനത്തിൻ്റെ തെളിവുകളോ നൽകി ന്യായീകരിക്കേണ്ടതുണ്ട്.
നാല് പേരടങ്ങുന്ന ഒരു സാധാരണ അണുകുടുംബത്തെ സംബന്ധിച്ചിടത്തോളം, നികുതി പരിശോധന കൂടാതെ സൂക്ഷിക്കാവുന്ന സ്വർണ്ണത്തിൻ്റെ ആകെ പരിധി ഇങ്ങനെയാണ്,
| കുടുംബാംഗം | പരമാവധി പരിധി (രേഖകൾ ഇല്ലാതെ) |
|---|---|
| വിവാഹിതയായ ഭാര്യ | 500 ഗ്രാം |
| അവിവാഹിതയായ മകൾ | 250 ഗ്രാം |
| ഭർത്താവ് | 100 ഗ്രാം |
| മകൻ | 100 ഗ്രാം |
| ആകെ കുടുംബ പരിധി | 950 ഗ്രാം |
ഇതിൽ കൂടുതലുള്ള ഏതൊരു തുകയ്ക്കും ഉറവിടത്തിന്റെ തെളിവ് ആവശ്യമാണ്. തെളിവ് നൽകുന്നതിൽ പരാജയപ്പെട്ടാൽ ആദായനികുതി വകുപ്പിന് സ്വർണ്ണം പിടിച്ചെടുക്കാൻ അധികാരമുണ്ട്.
ഈ പരിധികൾ കർശനമായ നിയമപരമായ പരിധികളല്ല, മറിച്ച് മാർഗ്ഗനിർദ്ദേശങ്ങൾ മാത്രമാണ്. ഈ പരിധികൾ കവിയുന്നത് നിയമപരമായി തെറ്റല്ല, പക്ഷേ അപ്പോൾ കൈവശമുള്ള സ്വർണ്ണത്തിൻ്റെ ഉറവിടം (വാങ്ങിയ രേഖ, വരുമാന സ്രോതസ്സ്, അനന്തരാവകാശം തുടങ്ങിയവ) തെളിയിക്കാൻ സാധിക്കണം. അതിനാൽ, സ്വർണ്ണം വാങ്ങുമ്പോഴും സൂക്ഷിക്കുമ്പോഴും രേഖകൾ കൃത്യമായി സൂക്ഷിക്കുകയും നിങ്ങളുടെ കൈവശാവകാശം സുതാര്യമാക്കുകയും ചെയ്യുക എന്നതാണ് നികുതി പരിശോധനകളെ ഭയക്കാതെ മുന്നോട്ട് പോകാനുള്ള ഏറ്റവും നല്ല മാർഗ്ഗം.
