തിരുവനന്തപുരം: ബൗദ്ധിക വെല്ലുവിളി നേരിടുന്നയാളെ ബാല്യം മുതല് സംരക്ഷിക്കുന്ന അവിവാഹിതയായ ബന്ധുവിനെ ലീഗല് ഗാര്ഡിയനായി നിയമിക്കണമെന്ന ആവശ്യത്തില് പ്രാദേശിക അന്വേഷണം നടത്തി രണ്ട് മാസത്തിനകം തീരുമാനമെടുക്കണമെന്ന് നിര്ദ്ദേശം നല്കി മനുഷ്യാവകാശ കമ്മീഷന്. ചെയര്പേഴ്സണ് ജസ്റ്റിസ് അലക്സാണ്ടര് തോമസ് ജില്ലാ കളക്ടര്ക്ക് നിര്ദ്ദേശം നല്കി.
നാഷണല് ട്രസ്റ്റ് ആക്റ്റ് പ്രകാരം തീരുമാനമെടുക്കാനാണ് കമ്മീഷന് നിര്ദ്ദേശിച്ചത്. തിരുമല സ്വദേശിനി സരസ്വതിയമ്മ സമര്പ്പിച്ച പരാതിയിലാണ് നടപടി. തന്റെ സഹോദരന്റെ മകന് അനില്കുമാറിന് (53) വേണ്ടിയാണ് പരാതി നല്കിയത്. 62 വയസ്സുള്ള തന്റെ കാലശേഷം അനില്കുമാറിനെ സംരക്ഷിക്കാന് നടപടിയെടുക്കണമെന്നും പരാതിക്കാരി ആവശ്യപ്പെട്ടു. ജില്ലാ സാമൂഹിക നീതി ഓഫീസര് കമ്മീഷനില് സമര്പ്പിച്ച റിപ്പോര്ട്ടില് പരാതിക്കാരിയെ അനില് കുമാറിന്റെ ലീഗല് ഗാര്ഡിയനായി നിയമിക്കണമെന്ന് ശുപാര്ശ ചെയ്തു.
Also Read: പിഎ അസീസ് കോളേജിനുള്ളില് കത്തിക്കരിഞ്ഞ നിലയില് കണ്ടെത്തിയ മൃതദേഹം ഉടമയുടേത്
അനില് കുമാറിന് അമ്മയും രണ്ട് സഹോദരിമാരുമുണ്ടെന്ന് റിപ്പോര്ട്ടില് പറയുന്നു. ഇവരുടെ കുടുംബസ്വത്ത് ഭാഗിച്ചപ്പോള് 9 സെന്റ് അനില് കുമാറിന് നല്കി. എന്നാല് ബൗദ്ധിക വെല്ലുവിളി നേരിടുന്നയാളിന്റെ സംരക്ഷക എന്ന നിലയില് രേഖകള് ശരിയാക്കുന്നതിനോ സ്വത്തില് നിന്നും ആദായമെടുക്കാനോ പരാതിക്കാരിക്ക് കഴിഞ്ഞിട്ടില്ല.
നാഷണല് ട്രസ്റ്റ് ആക്റ്റ് പ്രകാരം ലോക്കല് ഗാര്ഡിയനായി നിയമിക്കുന്നതിനുള്ള അപേക്ഷ പരാതിക്കാരി ജില്ലാ കളക്ടര്ക്ക് നല്കണമെന്ന് കമ്മീഷന് നിര്ദ്ദേശിച്ചു. തഹസില്ദാര്/വില്ലേജ് ഓഫീസര് മുഖേന പ്രാദേശിക അന്വേഷണം നടത്തി വിവരം പരാതിക്കാരിയെ ജില്ലാ കളക്ടര് അറിയിക്കണം. പരാതിക്കാരിയുടെ കാലശേഷം അനില് കുമാറിന്റെ ഗാര്ഡിയനായി നിയമിക്കാനുള്ള വ്യക്തിയെ കണ്ടെത്തണം. ആവശ്യമെങ്കില് ജില്ലാ കളക്ടര്ക്ക് ജില്ലാ സാമൂഹികനീതി ഓഫീസറുടെ സഹായം തേടാമെന്നും ജസ്റ്റിസ് അലക്സാണ്ടര് തോമസ് നിര്ദ്ദേശിച്ചു.
