പായസം ഇഷ്ടമല്ലാത്തവരായി ആരും ഉണ്ടാകില്ല. പാലട പായസവും, പരിപ്പ് പായസവും, സേമിയ പായസവുമെല്ലാം മലയാളികയുടെ ഇഷ്ട്ടപ്പെട്ട പായസങ്ങളിൽ ഉൾപ്പെടുന്നവയാണ്. എന്നാൽ പൈനാപ്പിൾ പായസം നിങ്ങൾ കഴിച്ചിട്ടുണ്ടോ?. വിഷുവവല്ലേ വരാൻപോകുന്നത് ഇത്തവണ വിഷുവിന് ഈ പൈനാപ്പിൾ പായസം ഒന്ന് ട്രൈ ചെയ്‌തോളൂ.
ആവശ്യമുള്ള സാധനങ്ങള്‍
കൈതച്ചക്ക – ഒരെണ്ണം വലുത് (നന്നായി പഴുത്തത്)
ശര്‍ക്കര- 300 ഗ്രാം
തേങ്ങ- ഒന്നര മുറി (അര കപ്പ് ഒന്നാം പാലും, ഒരു കപ്പ് രണ്ടാം പാലും ഒന്നര കപ്പ് മൂന്നാം പാലും തയ്യാറാക്കുക)
നെയ്യ്- ഒരു ടേബിള്‍ സ്പൂണ്‍
അണ്ടിപ്പരിപ്പ്- പത്തെണ്ണം
കിസ്മിസ്- പത്തെണ്ണം
ചുക്ക്- കാല്‍ ടീസ്പൂണ്‍(പൊടിച്ചത്)
ജീരകം- കാല്‍ ടീസ്പൂണ്‍(പൊടിച്ചത്)
ഏലയ്ക്ക- കാല്‍ ടീസ്പൂണ്‍(പൊടിച്ചത്)
തേങ്ങാക്കൊത്ത്- ഒരു ടേബിള്‍ സ്പൂണ്‍
Also Read: നിങ്ങളുടെ തല വിയര്‍ക്കാറുണ്ടോ? ഇത് മുടിയെ എങ്ങനെ ബാധിക്കുമെന്ന് നോക്കാം
തയ്യാറാക്കുന്ന വിധം
പൈനാപ്പിള്‍ തൊലി മുഴുവന്‍ കളഞ്ഞ് അതിന്റെ കറുത്ത ഭാഗങ്ങളും കളഞ്ഞ് ചെറിയ കഷണങ്ങളായി കൊത്തിയരിയുക. ഇത് മിക്സിയില്‍ ഒന്ന് അടിച്ചെടുക്കുക. പായസം ഉണ്ടാക്കേണ്ട പാത്രത്തിലേക്ക് കൈതച്ചക്ക ചേര്‍ത്ത് നന്നായി തിളപ്പിക്കുക. ശേഷം ശര്‍ക്കര പാനിയാക്കി അതിലേക്ക് ഒഴിക്കുക. കുറുകി വരുമ്പോള്‍ മൂന്നാം പാല്‍ ചേര്‍ത്തിളക്കുക. അത് തിളയ്ക്കുമ്പോള്‍ രണ്ടാം പാല്‍ ഒഴിച്ച് ഒന്നുകൂടി തിളപ്പിക്കുക. അടുപ്പില്‍നിന്ന് ഇറക്കി വെച്ച ശേഷം ഒന്നാം പാല്‍ ചേര്‍ത്ത് പൊടിച്ചുവച്ചിരിക്കുന്ന ചേരുവകള്‍ വിതറി യോജിപ്പിക്കുക. നെയ്യില്‍ അണ്ടിപ്പരിപ്പും കിസ്മിസും വറുത്ത് പായസത്തിന് മുകളില്‍ ഒഴിച്ച് വിളമ്പാം.
