റിയാദ്: സൗദി അറേബ്യയെ ലക്ഷ്യമിട്ട് ഹൂതി വിമതര്‍ വീണ്ടും നടത്തിയ ഭീകരാക്രമണത്തില്‍ 13 പേര്‍ക്ക് പരിക്കേറ്റു. ഖമീസ് മുശൈത്ത്, അബ്ഹ, തായിഫ് നഗരങ്ങളിലെ ജനവാസ മേഖലകള്‍ക്ക് നേരെയാണ് സ്‌ഫോടകവസ്തുക്കള്‍ നിറച്ച ഡ്രോണുകളും ബാലിസ്റ്റിക് മിസൈലുകളും പതിച്ചത്. ആക്രമണത്തില്‍ പരിക്കേറ്റവരില്‍ ചിലരുടെ നില ഗുരുതരമല്ലെന്നാണ് അറബ് സഖ്യസേനയുടെ ഔദ്യോഗിക വാര്‍ത്താക്കുറിപ്പില്‍ വ്യക്തമാക്കുന്നത്. നഗരങ്ങളിലുണ്ടായ സ്‌ഫോടനങ്ങളില്‍ ഏഴ് വീടുകളും രണ്ട് വാഹനങ്ങളും പൂര്‍ണ്ണമായോ ഭാഗികമായോ തകര്‍ന്നു.
സവിശേഷമായ സുരക്ഷാ സാഹചര്യങ്ങളെ വെല്ലുവിളിച്ചുകൊണ്ട് സിവിലിയന്‍ കേന്ദ്രങ്ങളെയും സാധാരണ ജനങ്ങളെയും ലക്ഷ്യമിട്ട് ഹൂതി മിലീഷ്യ നടത്തുന്ന ഇത്തരം മനഃപൂര്‍വ്വമായ ആക്രമണങ്ങള്‍ അവരുടെ തീവ്രവാദ സമീപനമാണ് വ്യക്തമാക്കുന്നതെന്ന് യെമനിലെ നിയമാനുസൃത സര്‍ക്കാരിനെ പിന്തുണയ്ക്കുന്ന അറബ് സഖ്യസേനയുടെ ഔദ്യോഗിക വക്താവ് മേജർ ജനറൽ തുർക്കി അൽ മാലികി പറഞ്ഞു. സൗദി അറേബ്യയുടെ പരമാധികാരവും രാജ്യത്തെ ജനങ്ങളുടെ ജീവനും സംരക്ഷിക്കുന്നതിനായി സഖ്യസേനയുടെ സംയുക്ത കമാൻഡ് ശക്തമായ തിരിച്ചടി നല്‍കുമെന്നും അദ്ദേഹം മുന്നറിയിപ്പ് നല്‍കി.
ഐക്യരാഷ്ട്രസഭാ ചാർട്ടറിലെ 51-ാം അനുച്ഛേദം അനുസരിച്ചുള്ള സ്വയം പ്രതിരോധത്തിനുള്ള അവകാശവും അന്താരാഷ്ട്ര മാനുഷിക നിയമങ്ങളും മുൻനിര്‍ത്തിയായിരിക്കും തുടർന്നുള്ള നടപടികൾ. ഭാവിയിൽ ഇത്തരം നൃശംസകളായ ആക്രമണങ്ങൾ ആവർത്തിക്കാതിരിക്കാൻ കര്‍ശനമായ സൈനിക നടപടികൾ സ്വീകരിക്കുമെന്നും സഖ്യസേന വ്യക്തമാക്കി. ജനവാസ മേഖലകളിലേക്കുള്ള തുടര്‍ച്ചയായ ആക്രമണങ്ങള്‍ മിഡിൽ ഈസ്റ്റിലെ സുരക്ഷാ സ്ഥിതിഗതികളെ വീണ്ടും ആശങ്കയിലാക്കിയിരിക്കുകയാണ്.
