മാറിക്കൊണ്ടിരിക്കുന്ന ഭക്ഷണരീതിയും ജീവിതശൈലിയും കാരണം ഇന്ന് പലരെയും അലട്ടുന്ന പ്രധാന പ്രശ്നങ്ങളാണ് വയറെരിച്ചിലും ആസിഡ് റിഫ്ലക്സും. ഇത് വെറുമൊരു ദഹനപ്രശ്നമായി കണ്ട് അവഗണിക്കുന്നത് ദീർഘകാലാടിസ്ഥാനത്തിൽ ഗുരുതരമായ ആരോഗ്യപ്രശ്നങ്ങൾക്ക് കാരണമായേക്കാം. കൃത്യമായ ഭക്ഷണക്രമത്തിലൂടെയും ശീലങ്ങളിലൂടെയും ഈ അസ്വസ്ഥതകളെ ഒരു പരിധിവരെ നിയന്ത്രിക്കാനാകുമെന്ന് വിദഗ്ധർ ചൂണ്ടിക്കാട്ടുന്നു.
പാലും പച്ചക്കറികളും
അസിഡിറ്റി കുറയ്ക്കാൻ പാൽ നല്ലതാണെങ്കിലും അമിതമാകരുത്. ഒരു ദിവസം രണ്ട് ഗ്ലാസിൽ കൂടുതൽ പാൽ കുടിക്കുന്നത് അതിലെ കൊഴുപ്പ് കാരണം മറ്റ് അസുഖങ്ങൾക്ക് വഴിവെച്ചേക്കാം. ലാക്ടോസ് ഇൻടോളറൻസ് ഉള്ളവർ പാൽ ഒഴിവാക്കുന്നതാണ് ഉചിതം. ഇലക്കറികൾ, പഴങ്ങൾ, പച്ചക്കറികൾ എന്നിവയിൽ അടങ്ങിയിരിക്കുന്ന ഒമേഗ-3 ഫാറ്റി ആസിഡുകളും ആന്റി ഓക്സിഡന്റുകളും വയറെരിച്ചിൽ കുറയ്ക്കാൻ സഹായിക്കും.
Also Read: വേനൽച്ചൂടിൽ മൂക്കിൽ നിന്ന് രക്തം വരുന്നുണ്ടോ? ഭയപ്പെടേണ്ട, കരുതൽ മതി!
ഒഴിവാക്കേണ്ട ഭക്ഷണങ്ങൾ
എണ്ണമയമുള്ള ഭക്ഷണങ്ങൾ, വറുത്ത വിഭവങ്ങൾ, മധുരപലഹാരങ്ങൾ, എരിവും പുളിയും കൂടിയ കറികൾ എന്നിവ നെഞ്ചെരിച്ചിൽ വർധിപ്പിക്കും. ശീതളപാനീയങ്ങൾ, അച്ചാറുകൾ, അജിനോമോട്ടോ ചേർത്ത ചൈനീസ് വിഭവങ്ങൾ, സംസ്കരിച്ച ഭക്ഷണങ്ങൾ എന്നിവ പൂർണ്ണമായും ഒഴിവാക്കണം. മദ്യപാനവും പുകവലിയും ഈ അവസ്ഥയെ വഷളാക്കും. അസിഡിറ്റി പ്രശ്നമുള്ളവർ ഉള്ളി, വെളുത്തുള്ളി, നാരങ്ങ, ഓറഞ്ച് എന്നിവയുടെ ഉപയോഗം കുറയ്ക്കണം.
ശ്രദ്ധിക്കേണ്ട ജീവിതശൈലികൾ
മിതമായ ഭക്ഷണം: വയറുനിറയെ വാരിവലിച്ചു കഴിക്കാതെ, മൂന്നു നേരത്തെ ഭക്ഷണം അഞ്ചോ ആറോ തവണകളായി കുറഞ്ഞ അളവിൽ കഴിക്കുക.
അത്താഴം: രാത്രി വൈകി ഭക്ഷണം കഴിക്കുന്നത് ഒഴിവാക്കുക. കിടക്കുന്നതിന് ചുരുങ്ങിയത് മൂന്ന് മണിക്കൂർ മുൻപെങ്കിലും ഭക്ഷണം കഴിച്ചിരിക്കണം.
ഉറക്കം: ഉറങ്ങുമ്പോൾ ഇടതുവശം ചരിഞ്ഞു കിടക്കുന്നത് ദഹനരസങ്ങൾ അന്നനാളത്തിലേക്ക് തിരിച്ചു കയറുന്നത് തടയാൻ സഹായിക്കും.
സാവധാനം കഴിക്കുക: ഭക്ഷണം നന്നായി ചവച്ചരച്ച് കഴിക്കണം. പിരിമുറുക്കമുള്ള സമയത്ത് ഭക്ഷണം കഴിക്കുന്നത് ഒഴിവാക്കുക.
Also Read: പ്രകാശത്തിന്റെ തുരങ്കവും മിന്നിമറയുന്ന ഓർമ്മകളും; മരണാനുഭവങ്ങൾക്ക് പിന്നിലെ ശാസ്ത്രം
ആശ്വാസമേകാൻ ചില വിഭവങ്ങൾ
നെഞ്ചെരിച്ചിലും വയറെരിച്ചിലും കുറയ്ക്കാൻ വീട്ടിൽ തന്നെ തയാറാക്കാവുന്ന ചില വിഭവങ്ങളും ശ്രദ്ധേയമാണ്.
ഫ്രൂട്ട് കപ്പ്: ആപ്പിൾ, പൈനാപ്പിൾ, വാഴപ്പഴം, ഈന്തപ്പഴം എന്നിവ ചേർത്തുണ്ടാക്കുന്ന ഫ്രൂട്ട് കപ്പ് നെഞ്ചെരിച്ചിൽ ശമിപ്പിക്കാൻ ഉത്തമമാണ്.
ബാർലി സൂപ്പ്: നന്നായി വേവിച്ച ബാർലിയിൽ കാരറ്റ്, തക്കാളി, ബീറ്റ്റൂട്ട് എന്നിവ ചേർത്ത് തയ്യാറാക്കുന്ന സൂപ്പ് ദഹനത്തിന് എളുപ്പവും വയറിന് ആശ്വാസവുമാണ്.
നാരുകൾ അടങ്ങിയ ഭക്ഷണങ്ങൾ ശീലമാക്കുന്നതും ധാരാളം വെള്ളം കുടിക്കുന്നതും ദഹനപ്രക്രിയ സുഗമമാക്കാൻ സഹായിക്കുമെന്ന് ആരോഗ്യവിദഗ്ധർ വ്യക്തമാക്കുന്നു.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
