ഹൃദയാഘാതം എന്നാൽ നെഞ്ചുവേദന മാത്രമാണെന്ന് ധരിക്കുന്നവർ ഇന്നും ഏറെയാണ്. എന്നാൽ, വയറിലെ അസ്വസ്ഥതകൾ മുതൽ ശരീരത്തിലെ വിവിധ ഭാഗങ്ങളിലെ വേദനകൾ വരെ ഹൃദയാഘാതത്തിന് മുന്നോടിയായി പ്രകടമാകാറുണ്ട്. ഈ അധികം ശ്രദ്ധിക്കപ്പെടാത്ത ‘നിശബ്ദ’ ലക്ഷണങ്ങളെക്കുറിച്ച് അരിസോണയിൽ നിന്നുള്ള പ്രമുഖ ഹൃദ്രോഗവിദഗ്ധനായ ഡോ. ജാക്ക് വോഫ്സൺ മുന്നറിയിപ്പ് നൽകുകയാണ്. ഈ ലക്ഷണങ്ങൾ തിരിച്ചറിഞ്ഞാൽ ജീവൻ രക്ഷിക്കാൻ സാധിക്കും.
നിസ്സാരമാക്കരുതാത്ത പ്രധാന ലക്ഷണങ്ങൾ
ഡോ. ജാക്ക് പറയുന്നതനുസരിച്ച്, പലപ്പോഴും നിസ്സാരമായി തള്ളിക്കളയുന്ന, എന്നാൽ ഹൃദയാഘാതവുമായി ബന്ധമുള്ള ചില ലക്ഷണങ്ങൾ താഴെ പറയുന്നവയാണ്.
ചർമത്തിലെ വ്യത്യാസങ്ങൾ: ചർമത്തിൽ അകാരണമായ വരൾച്ച, ചൊറിച്ചിൽ, എക്സിമ പോലുള്ള പ്രശ്നങ്ങൾ എന്നിവ ശ്രദ്ധിക്കണം. ഇത് ശരീരത്തിൽ നീർവീക്കം ഉണ്ടാകുന്നതിൻ്റെയും സമ്മർദ്ദം കൂടുന്നതിൻ്റെയും ലക്ഷണമാകാം. വീക്കത്തിന് ഹൃദ്രോഗം, ഹൃദയാഘാതം എന്നിവയുമായി അടുത്ത ബന്ധമുണ്ടെന്ന് അദ്ദേഹം പറയുന്നു.
Also Read: മഞ്ഞിന്റെ സ്വർഗ്ഗം തുറക്കുന്നു! ഇടുങ്ങിയ വഴികളിലൂടെ സാഹസിക യാത്ര; സഞ്ചാരികളെ മാടിവിളിച്ച് മണാലി…
വയറിലെ അസ്വസ്ഥത: വയറിലുണ്ടാകുന്ന അസ്വസ്ഥതകളെ മിക്കവരും നിസ്സാരമാക്കാറുണ്ട്. എന്നാൽ, മലബന്ധം, ഓക്കാനം, വയറ് വീർക്കുക, തുടർച്ചയായുള്ള വയറുവേദന എന്നിവയുണ്ടെങ്കിൽ അത് ഹൃദയാരോഗ്യവുമായി ബന്ധപ്പെട്ടിരിക്കാൻ സാധ്യതയുണ്ട്. കുടലിൻ്റെ ആരോഗ്യം തകരാറിലാകുമ്പോൾ രക്തക്കുഴലുകളിൽ ‘പ്ലേക്ക്’ അടിഞ്ഞുകൂടുകയും ഇത് ഹൃദയാഘാത സാധ്യത വർദ്ധിപ്പിക്കുകയും ചെയ്യും.
നിരന്തരമായ തലവേദന: നിരന്തരമായ തലവേദന ഹൃദയസംബന്ധമായ പ്രശ്നങ്ങളുമായി ബന്ധപ്പെട്ടിരിക്കുന്നു. നൈട്രിക് ഓക്സൈഡ് നില കുറയുന്നതിൻ്റെയോ രക്തക്കുഴലുകൾക്കുണ്ടാകുന്ന തകരാറിൻ്റെയോ ലക്ഷമാവാം ഇത്. രക്തം കട്ടപിടിക്കുന്നത് തടയുന്നതിൽ നൈട്രിക് ഓക്സൈഡിന് വലിയ പങ്കുണ്ട്. ഇതിൻ്റെ കുറവ് ഹൃദയപ്രശ്നങ്ങൾക്കുള്ള സാധ്യത കൂട്ടുന്ന ഒരു ഘടകമാണ്.
അകാരണമായ ശരീരവേദന: അകാരണമായി ശരീരവേദന അനുഭവപ്പെടുന്നുണ്ടെങ്കിൽ ശ്രദ്ധിക്കുക. പല്ലുവേദന, തോൾവേദന തുടങ്ങിയവ നിസ്സാരമാക്കരുത്. ശരീരത്തിൻ്റെ ഏതുഭാഗങ്ങളിൽ അനുഭവപ്പെടുന്ന വേദനയ്ക്ക് പിന്നിലും വീക്കമാവാം കാരണം. ഇത് ഹൃദയാഘാതം, പക്ഷാഘാതം തുടങ്ങിയവയ്ക്കുള്ള സാധ്യത വർദ്ധിപ്പിക്കും.
മോശം ഉറക്കം: ആരോഗ്യകരമായ ഹൃദയത്തിന് സുഖകരമായ ഉറക്കം നിർബന്ധമാണ്. ഉറക്കത്തിനിടെ ഇടയ്ക്കിടെ എഴുന്നേൽക്കുകയോ തീരെ ഉറക്കമില്ലായ്മയോ ഉണ്ടെങ്കിൽ ശ്രദ്ധിക്കണം. ഉറക്കക്കുറവ് വീക്കമുണ്ടാക്കുകയും സ്ട്രെസ്സ് ഹോർമോണുകളുടെ ഉത്പാദനം കൂട്ടുകയും അതുവഴി രക്തക്കുഴലുകളെ തകരാറിലാക്കുകയും ചെയ്യും. ഇത് ഹൃദയാഘാത സാധ്യത കൂട്ടുമെന്ന് ഡോക്ടർ മുന്നറിയിപ്പ് നൽകുന്നു.
