ലോകമെമ്പാടുമുള്ള ദശലക്ഷക്കണക്കിന് ഉപയോക്താക്കൾക്ക് വലിയ തിരിച്ചടിയേകി ഗൂഗിളിന്റെ മുൻനിര ആർട്ടിഫിഷ്യൽ ഇന്റലിജൻസ് പ്ലാറ്റ്ഫോമായ ‘ഗൂഗിൾ ജെമിനി’പ്രവർത്തനരഹിതമായി. ജൂൺ 10 ബുധനാഴ്ച ഇന്ത്യൻ സമയം വൈകുന്നേരത്തോടെയാണ് ജെമിനിയുടെ വെബ് പതിപ്പും മൊബൈൽ ആപ്ലിക്കേഷനും ഒരേസമയം പണിമുടക്കിയത്. സാങ്കേതിക തടസ്സങ്ങൾ നിരീക്ഷിക്കുന്ന പ്രമുഖ വെബ്സൈറ്റായ ‘ഡൗൺഡിറ്റക്റ്റർ’ വളരെ ചുരുങ്ങിയ സമയത്തിനുള്ളിൽ നൂറുകണക്കിന് പരാതികളാണ് രേഖപ്പെടുത്തിയത്. നിലവിൽ യുണൈറ്റഡ് സ്റ്റേറ്റ്സ്, യുണൈറ്റഡ് കിംഗ്ഡം ഉൾപ്പെടെയുള്ള വിവിധ രാജ്യങ്ങളിൽ നിന്നുള്ള ഉപയോക്താക്കൾ കടുത്ത സാങ്കേതിക തടസ്സം നേരിടുന്നതായാണ് റിപ്പോർട്ടുകൾ വ്യക്തമാക്കുന്നത്.
ഗൂഗിൾ വർക്ക്സ്പെയ്സ് അക്കൗണ്ടുകൾ വഴിയും വ്യക്തിഗത അക്കൗണ്ടുകൾ വഴിയും ജെമിനി ഉപയോഗിക്കാൻ ശ്രമിക്കുന്നവർക്ക് ‘Error 1076’, ‘Error 1099’ എന്നീ വിചിത്രമായ പിശക് സന്ദേശങ്ങളാണ് ലഭിക്കുന്നത്. ഒരു പുതിയ പ്രോംപ്റ്റ് നൽകാൻ ശ്രമിക്കുമ്പോൾ തന്നെ സിസ്റ്റം താനേ ബ്ലോക്കാവുകയും ഈ കോഡുകൾ സ്ക്രീനിൽ തെളിയുകയുമാണ് ചെയ്യുന്നത്. തങ്ങളുടെ പ്രതിദിന ഉപയോഗ പരിധി അഥവാ ക്വാട്ട അവസാനിച്ചിട്ടില്ലെങ്കിൽ പോലും ഈ പ്രശ്നം തുടരുകയാണെന്ന് ഉപയോക്താക്കൾ വ്യക്തമാക്കുന്നു. എന്നാൽ അതിശയിപ്പിക്കുന്ന കാര്യം, ഗൂഗിളിന്റെ ഒഫീഷ്യൽ സ്റ്റാറ്റസ് പേജുകളിൽ എല്ലാം കൃത്യമായി പ്രവർത്തിക്കുന്നു എന്നാണ് കാണിക്കുന്നത്.
Also Read: ഇൻസ്റ്റഗ്രാമും യൂട്യൂബും ഇനി വരുമാനമാർഗ്ഗം; റീലുകളിലൂടെ പണം നേടുന്നത് എങ്ങനെ?
ജെമിനി പെട്ടെന്ന് പണിമുടക്കിയതോടെ തങ്ങളുടെ നിരാശ പ്രകടിപ്പിക്കാൻ ഉപയോക്താക്കൾ കൂട്ടത്തോടെ സോഷ്യൽ മീഡിയ പ്ലാറ്റ്ഫോമായ എക്സിലേക്ക് എത്തിയിരിക്കുകയാണ്. ഗൂഗിൾ സെർച്ച്, വർക്ക്സ്പെയ്സ്, വൺ, ക്ലൗഡ് എന്നിവയിലുടനീളം ജെമിനി ഒരു പ്രധാന ഉൽപ്പാദനക്ഷമത ഉപകരണമായി മാറിയതിനാൽ, ഓഫീസ് ജോലികൾ ചെയ്യുന്നവരും കണ്ടെന്റ് ക്രിയേറ്റർമാരുമാണ് ഏറ്റവും കൂടുതൽ ബുദ്ധിമുട്ടുന്നത്. “ജെമിനി ഇപ്പോൾ വർക്ക്സ്പെയ്സ് അക്കൗണ്ടിൽ പ്രവർത്തിക്കാത്തത് എനിക്ക് മാത്രമാണോ? വെബിലും ആപ്പിലും പുതിയ പ്രോംപ്റ്റ് നൽകുമ്പോൾ പിശക് കാണിക്കുന്നു,” എന്ന് ഒരു ഉപയോക്താവ് എക്സിൽ കുറിച്ചപ്പോൾ, തങ്ങൾ കഴിഞ്ഞ രണ്ട് മണിക്കൂറായി ഈ പ്രശ്നം നേരിടുകയാണെന്ന് മറ്റ് പലരും സാക്ഷ്യപ്പെടുത്തുന്നു.
ഈ അപ്രതീക്ഷിത തടസ്സത്തെക്കുറിച്ച് ഗൂഗിളോ ജെമിനി ഔദ്യോഗിക ടീമോ ഇതുവരെ ഔദ്യോഗിക പ്രസ്താവനകളൊന്നും പുറത്തുവിട്ടിട്ടില്ല. ഈ പ്രശ്നം എപ്പോൾ പരിഹരിക്കപ്പെടും എന്നതിനെക്കുറിച്ചുള്ള സമയപരിധിയും ലഭ്യമായിട്ടില്ല. പെട്ടെന്നുണ്ടായ സെർവർ ഡൗൺടൈം, ബാക്കെൻഡ് അപ്ഡേറ്റുകളിലെ പിഴവുകൾ, അല്ലെങ്കിൽ വലിയ തോതിലുള്ള നെറ്റ്വർക്ക് പ്രശ്നങ്ങൾ എന്നിവയിലേതെങ്കിലും ആകാം ഈ തകരാറിന് പിന്നിലെന്നാണ് സാങ്കേതിക വിദഗ്ദ്ധർ വിലയിരുത്തുന്നത്. റിപ്പോർട്ടുകളിലെ പെട്ടെന്നുള്ള വർദ്ധനവ് സൂചിപ്പിക്കുന്നത് ഇത് ഒരു ആഗോള തകരാറാണെന്നാണ്.
ടെക്നോളജി ലോകം ഏറെ ആകാംഷയോടെ കാത്തിരുന്ന ‘ജെമിനി ഓമ്നി’ എന്ന പുതിയ മൾട്ടിമോഡൽ എഐ മോഡൽ ഗൂഗിൾ അവതരിപ്പിച്ചതിന് തൊട്ടുപിന്നാലെയാണ് ഈ വൻ തകരാർ സംഭവിച്ചിരിക്കുന്നത് എന്നത് ശ്രദ്ധേയമാണ്. ടെക്സ്റ്റ്, ഇമേജുകൾ, ഓഡിയോ, വീഡിയോ ഇൻപുട്ടുകൾ എന്നിവ ഒരേസമയം മനസ്സിലാക്കാനും അവ കോർത്തിണക്കി അത്യാധുനിക വീഡിയോകൾ നിർമ്മിക്കാനും ശേഷിയുള്ള മോഡലാണിത്. ലളിതമായ സംഭാഷണത്തിലൂടെ വീഡിയോകൾ എഡിറ്റ് ചെയ്യാനുള്ള വിപ്ലവകരമായ ഫീച്ചറോടെ എത്തിയ ജെമിനി ഓമ്നിയുടെ അപ്ഡേഷനുമായി ബന്ധപ്പെട്ട ബാക്കെൻഡ് പ്രക്രിയകളാണോ ഈ സെർവർ തകരാറിലേക്ക് നയിച്ചതെന്ന സംശയത്തിലാണ് ഇപ്പോൾ സാങ്കേതിക ലോകം.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
