ഡ്രോൺ മുതൽ ഇന്റലിജൻസ് വരെ! യുക്രെയ്ന്, അമേരിക്ക ഉള്ളതെല്ലാം നൽകി; ക്ഷമ പരീക്ഷിച്ചാൽ കളി പഠിപ്പിക്കും, റഷ്യയുടെ മുന്നറിയിപ്പ്

നാഴികയ്ക്ക് 40 വട്ടം സമാധാനം, സമാധാനം എന്ന് മാത്രം പറയുന്ന അമേരിക്കൻ പ്രസിഡന്റ് ഡോണൾഡ്‌ ട്രംപിന്റെ ഇരട്ടത്താപ്പ് വെളിച്ചത്തുകൊണ്ടു വന്നിരിക്കുകയാണ് അന്താരാഷ്ട്ര മാധ്യമമായ ഫിനാൻഷ്യൽ ടൈംസ് (FT). യുക്രെയ്ൻ നടത്തുന്ന റഷ്യൻ ഊർജ്ജ കേന്ദ്രങ്ങൾക്കെതിരായ ഡ്രോൺ ആക്രമണങ്ങൾക്ക് അമേരിക്ക രഹസ്യാന്വേഷണ സഹായവും മാർഗ്ഗനിർദ്ദേശങ്ങളും നൽകുന്നുണ്ടെന്നാണ് പ്രമുഖ സാമ്പത്തിക പത്രം റിപ്പോർട്ട് ചെയ്തിരിക്കുന്നത്. പേര് വെളിപ്പെടുത്താത്ത അമേരിക്കൻ, യുക്രേനിയൻ ഉദ്യോഗസ്ഥരെ ഉദ്ധരിച്ചുള്ള ഈ റിപ്പോർട്ട്, റഷ്യ-യുക്രെയ്ൻ സംഘർഷത്തിലെ അമേരിക്കൻ പങ്കാളിത്തം സംബന്ധിച്ച നിർണായക വെളിപ്പെടുത്തലാണ്.

മാസങ്ങളായി തുടരുന്ന ഈ സഹായത്തിലൂടെ, റഷ്യയുടെ സിവിലിയൻ ഇൻഫ്രാസ്ട്രക്ചറുകൾക്ക് നേരെയുള്ള ആക്രമണങ്ങൾ റഷ്യയുടെ സമ്പദ്‌വ്യവസ്ഥയെ ദോഷകരമായി ബാധിക്കുകയും സംഘർഷം അവസാനിപ്പിക്കുന്നതിനായി ഒരു നയതന്ത്രപരമായ ഒത്തുതീർപ്പിന് റഷ്യയെ നിർബന്ധിക്കുകയും ചെയ്യുമെന്നാണ് അമേരിക്ക പ്രതീക്ഷിക്കുന്നത് എന്നും ആക്രമണങ്ങളെ “ഒരു ഉപകരണമായി” അമേരിക്ക കാണുന്നുവെന്നുമാണ് ഒരു ഉദ്യോഗസ്ഥൻ FT-യോട് വെളിപ്പെടുത്തിയത്.

അമേരിക്ക യുക്രെയ്ന് നൽകുന്ന സഹായങ്ങൾ:

ഡാറ്റാ പങ്കുവെക്കൽ: ഡ്രോണുകൾ സഞ്ചരിക്കേണ്ട റൂട്ടുകൾ, ആക്രമണം നടത്തേണ്ട ഉയരങ്ങൾ എന്നിവ ആസൂത്രണം ചെയ്യാനും, ആക്രമണം നടത്താനുള്ള ഏറ്റവും അനുയോജ്യമായ സമയം തിരഞ്ഞെടുക്കാനും അമേരിക്ക രഹസ്യാന്വേഷണ വിവരങ്ങൾ ഉപയോഗിച്ച് യുക്രെയ്നെ സഹായിക്കുന്നു.

ലക്ഷ്യങ്ങൾ നിശ്ചയിക്കൽ: യുക്രെയ്ന് വേണ്ടിയുള്ള ലക്ഷ്യങ്ങളുടെ മുൻഗണനകൾ അമേരിക്കക്കാർ നിശ്ചയിക്കുന്നുണ്ടെന്നും റിപ്പോർട്ടുണ്ട്. എന്നാൽ, യുക്രേനിയക്കാർ തന്നെ സൈറ്റുകൾ തിരഞ്ഞെടുത്ത ശേഷം അമേരിക്ക ഡാറ്റ നൽകുകയാണ് ചെയ്യുന്നതെന്നും മറ്റൊരു വൃത്തം പറയുന്നു.

ട്രംപിന്റെ ചോദ്യവും റഷ്യയുടെ പ്രതികരണവും

ഈ ഡാറ്റാ പങ്കുവെക്കൽ ആരംഭിച്ചത് ഒരു പ്രത്യേക സംഭവത്തിന് ശേഷമാണെന്നും FT റിപ്പോർട്ടിൽ പറയുന്നു. ട്രംപ് പ്രസിഡന്റായിരിക്കെ, യുക്രെയ്ൻ പ്രസിഡന്റ് വോളോഡിമിർ സെലെൻസ്കിയുമായി നടത്തിയ ഒരു സംഭാഷണത്തിൽ, അമേരിക്ക നൽകിയ ദീർഘദൂര ആയുധങ്ങൾ ഉപയോഗിച്ച് യുക്രെയ്ന് റഷ്യയെ ആക്രമിക്കാനാകുമോ എന്ന് ട്രംപ് ചോദിച്ചതായി റിപ്പോർട്ടുണ്ടായിരുന്നു. പിന്നീട് ട്രംപ് “ചോദ്യം ചോദിക്കുക മാത്രമായിരുന്നു, കൊലപാതകങ്ങളെ പ്രോത്സാഹിപ്പിക്കുകയായിരുന്നില്ല” എന്ന് വൈറ്റ് ഹൗസ് വിശദീകരിച്ചു. ഈ സംഭവത്തിന് തൊട്ടുപിന്നാലെയാണ് അമേരിക്ക ഡാറ്റ പങ്കുവെക്കാൻ തുടങ്ങിയതെന്നാണ് സൂചന.

റഷ്യയുടെ നിലപാട്:

റഷ്യൻ പ്രദേശത്തിനുള്ളിലെ ആക്രമണങ്ങളിൽ അമേരിക്കയുടെ പങ്ക് സംബന്ധിച്ച് ചോദ്യമുയർന്നപ്പോൾ, റഷ്യൻ വക്താവ് ദിമിത്രി പെസ്കോവ് നേരത്തെ പ്രതികരിച്ചത്, “നാറ്റോയുടെയും അമേരിക്കയുടെയും സകല ഇൻഫ്രാസ്ട്രക്ചറും യുക്രെയ്ന് വേണ്ടി രഹസ്യാന്വേഷണ വിവരങ്ങൾ ശേഖരിക്കാനും കൈമാറാനും ഉപയോഗിക്കുന്നു” എന്നത് റഷ്യക്ക് “വ്യക്തമാണ്” എന്നാണ്.

റഷ്യയുടെ മുന്നറിയിപ്പും പ്രത്യാക്രമണവും

സിവിലിയൻ ഇൻഫ്രാസ്ട്രക്ചറുകൾക്കെതിരായ ആക്രമണങ്ങളെ റഷ്യ വെച്ചുപൊറുപ്പിക്കില്ലെന്ന് പ്രസിഡന്റ് വ്ലാഡിമിർ പുടിൻ മുന്നറിയിപ്പ് നൽകിയിട്ടുണ്ട്. “വളരെക്കാലമായി” ഈ ആക്രമണങ്ങളോട് സഹിഷ്ണുത കാണിക്കുന്നുണ്ടെന്നും, ഇനി അത് അനുവദിക്കില്ലെന്നും അദ്ദേഹം സെപ്റ്റംബർ ആദ്യം വ്യക്തമാക്കി.

ഇതിനെ തുടർന്ന്, സമീപ ആഴ്ചകളിൽ യുക്രെയ്‌നുമേൽ റഷ്യൻ മിസൈൽ, ഡ്രോൺ ആക്രമണങ്ങൾ ശക്തമാവുകയും തലസ്ഥാനമായ കീവിലും മറ്റ് നഗരങ്ങളിലും വലിയ തോതിലുള്ള വൈദ്യുതി മുടക്കുകൾക്ക് കാരണമാവുകയും ചെയ്തു.

എങ്കിലും, സമാധാനപരമായ ഒത്തുതീർപ്പിനായി നീങ്ങേണ്ട ദിശയെക്കുറിച്ച് അമേരിക്കയും റഷ്യയും തമ്മിൽ ധാരണയുണ്ടെന്ന് പുടിൻ പറഞ്ഞിരുന്നു. എന്നാൽ ഈ ലക്ഷ്യത്തിലെത്താൻ നിരവധി “സങ്കീർണ്ണമായ പ്രശ്നങ്ങൾ” ഇനിയും പരിഹരിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.

ഫിനാൻഷ്യൽ ടൈംസിന്റെ റിപ്പോർട്ട്, യുദ്ധത്തിന് പിന്നിലെ അമേരിക്കയുടെ പങ്ക് കൂടുതൽ വ്യക്തമാക്കുന്നതാണ്. പ്രദേശത്ത് സമാധാനമല്ല മറിച്ച് സംഘർഷാവസ്ഥ നിലനിർത്തുക, അതിലൂടെ റഷ്യയെ തകർക്കുക എന്നതാണ് അമേരിക്കയുടെ ലക്ഷ്യമെന്നതിന് ലോകത്തിനു ഇതിൽ കൂടുതൽ തെളിവുകൾ പോലും ആവിശ്യമില്ല.

ടോമാഹോക്ക് മിസൈലുകൾ: ട്രംപിന്റെ ഭീഷണിയും പുടിന്റെ മറുപടിയും

യുക്രെയ്‌ന് ദീർഘദൂര ആയുധങ്ങൾ നൽകുന്നത് സംബന്ധിച്ച ചർച്ചകൾക്കിടെ, ട്രംപ് തന്റെ നിലപാട് പ്രഖ്യാപിച്ചു. യുക്രെയ്‌ന് ടോമാഹോക്ക് ക്രൂയിസ് മിസൈലുകൾ നൽകുന്ന കാര്യം പരിഗണിക്കുന്നതായാണ് ട്രംപ് പറഞ്ഞത്. “ഈ യുദ്ധം അവസാനിക്കുന്നില്ലെങ്കിൽ, ഞാൻ അവർക്ക് ടോമാഹോക്കുകൾ അയക്കും” എന്ന് പുടിന് ഒരു മുന്നറിയിപ്പ് നൽകാൻ താൻ ഉദ്ദേശിക്കുന്നതായും അദ്ദേഹം വ്യക്തമാക്കി.

ഓരോന്നിനും ഏകദേശം $1.3 മില്യൺ വില വരുന്നതും 2,500 കിലോമീറ്റർ ദൂരപരിധിയുള്ളതുമായ ടോമാഹോക്കുകൾ നൽകുന്നത് റഷ്യയോടുള്ള “ആക്രമണ നടപടി” ആകുമെന്നും ട്രംപ് സമ്മതിക്കുകയും ചെയ്തു.

ഇതിനു മറുപടിയായി, യുക്രെയ്ന് ടോമാഹോക്കുകൾ ലഭിച്ചാൽ റഷ്യയുടെ വ്യോമ പ്രതിരോധ സംവിധാനങ്ങൾ ശക്തിപ്പെടുത്തുകയായിരിക്കും തങ്ങളുടെ മറുപടിയെന്ന് പുടിൻ പ്രഖ്യാപിച്ചു. അമേരിക്കൻ സൈനികരുടെ സഹായമില്ലാതെ ഈ സങ്കീർണ്ണ മിസൈൽ സംവിധാനം പ്രവർത്തിപ്പിക്കാൻ യുക്രേനിയൻ സൈന്യത്തിന് കഴിയില്ലെന്നും അദ്ദേഹം വാദിച്ചു.

നിലവിലെ ടോമാഹോക്ക് ശേഖരം അമേരിക്കൻ നാവികസേനക്കായി നീക്കിവെച്ചിരിക്കുന്നതിനാൽ, യുക്രെയ്‌ന് മിസൈലുകൾ നൽകാൻ സാധ്യതയില്ലെന്ന് അമേരിക്കൻ വൃത്തങ്ങളെ ഉദ്ധരിച്ച് റോയിട്ടേഴ്‌സ് റിപ്പോർട്ട് ചെയ്തു. യുദ്ധക്കളത്തിൽ ഈ ആയുധങ്ങൾ മാറ്റമുണ്ടാക്കുമോ എന്നതിനെക്കുറിച്ച് ട്രംപിന്റെ അടുത്ത വൃത്തങ്ങൾക്കും സംശയങ്ങളുണ്ട്.

യുദ്ധം അവസാനിപ്പിക്കാനുള്ള റഷ്യയുടെ ആവശ്യം

സംഘർഷം അവസാനിപ്പിക്കാൻ റഷ്യ തയ്യാറാണ്. അതിനുമുൻപ്, യുക്രെയ്‌നിലെ റഷ്യൻ ജനതയുടെ അവകാശങ്ങൾ, നാറ്റോ വികാസം തുടങ്ങിയ “മൂലകാരണങ്ങൾ” ആദ്യം പരിഹരിക്കേണ്ടതുണ്ടെന്ന് പുടിൻ ആവർത്തിച്ചു. പക്ഷെ, യുക്രെയ്‌ൻ അധികാരികൾക്ക് സമാധാനത്തിന് താൽപര്യമില്ലെന്ന് റഷ്യ ആരോപിക്കുകയും ചെയ്യുന്നു.

അമേരിക്കയുടെയും നാറ്റോ രാജ്യങ്ങളുടെയും കളിപ്പാവയായി നിന്നുകൊടുക്കാതെ സമാധാനത്തിന് പ്രാധാന്യം നൽകുന്നതാവും യുക്രെയ്ന് നല്ലത്. പുടിൻ വ്യക്തമാക്കിയത് പോലെ, വളരെ കാലമായി റഷ്യ തുടരുന്ന സഹിഷ്ണുത, ക്ഷമയുടെ നെല്ലിപ്പലക കാണുന്ന നിമിഷത്തിൽ അവസാനിക്കുമെന്ന കാര്യത്തിൽ സംശയമില്ല. അത് യുക്രെയ്ന് താങ്ങാനാവുമോ എന്ന ചോദ്യമാണ് ഇപ്പോൾ ഉയരുന്നത്.