ബ്ലൂ-ഐഡ് ബോയ് മുതൽ ലോൺ ക്രൂസേഡർ വരെ: ബിജെപിയിൽ അണ്ണാമലൈയുടെ ഉയർച്ചയും താഴ്ചയും…

അഞ്ച് വർഷം മുമ്പ് തമിഴ്നാട്ടിൽ ബിജെപിക്ക് ഒരു മുഖമുണ്ടായിരുന്നെങ്കിൽ അത് അണ്ണാമലൈയുടേതായിരുന്നു. ഇന്ന് ബിജെപിയെക്കുറിച്ചുള്ള ഏറ്റവും വലിയ ചോദ്യം പോലും അണ്ണാമലൈയെ ചുറ്റിപ്പറ്റിയാണ്. പാർട്ടിയെ സംസ്ഥാനത്ത് വളർത്താൻ രാവും പകലും പോരാടിയ നേതാവ് എന്തുകൊണ്ടാണ് ഇപ്പോൾ വഴിമാറി നിൽക്കുന്നത്? ഡൽഹിയിൽ നടക്കുന്ന നിർണായക ചർച്ചകൾ ഒരു രാഷ്ട്രീയ വേർപിരിയലിന്റെ തുടക്കമാണോ? അല്ലെങ്കിൽ തമിഴ്നാട് രാഷ്ട്രീയം മറ്റൊരു അപ്രതീക്ഷിത ട്വിസ്റ്റിനായി ഒരുങ്ങുകയാണോ?

ഡൽഹിയിൽ ബിജെപി ദേശീയ അധ്യക്ഷൻ നിതിൻ നബിനുമായും കേന്ദ്ര ആഭ്യന്തര മന്ത്രി അമിത് ഷായുമായും അണ്ണാമലൈ നടത്തുന്ന കൂടിക്കാഴ്ചകൾ രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്. “രണ്ട് ദിവസം കാത്തിരിക്കൂ, പിന്നീട് സംസാരിക്കാം” എന്ന അണ്ണാമലൈയുടെ ദുരൂഹ പ്രതികരണം അഭ്യൂഹങ്ങൾക്ക് കൂടുതൽ ശക്തി പകർന്നു. ചില റിപ്പോർട്ടുകൾ പ്രകാരം അദ്ദേഹം ബിജെപിയിൽ നിന്ന് “സൗഹൃദപരമായ വിടവാങ്ങൽ” ആഗ്രഹിക്കുന്നുവെന്നും പിന്നീട് ഒരു ജനകീയ പ്രസ്ഥാനത്തിന് തുടക്കമിടാമെന്നും പറയുന്നു. അത് ഭാവിയിൽ ഒരു രാഷ്ട്രീയ പാർട്ടിയായി മാറാനും സാധ്യതയുണ്ടെന്നാണ് വിലയിരുത്തൽ. ഇന്നത്തെ ഈ സാഹചര്യത്തെ മനസ്സിലാക്കാൻ അണ്ണാമലൈയുടെ രാഷ്ട്രീയ യാത്രയുടെ തുടക്കം മുതൽ നോക്കേണ്ടതുണ്ട്.

കോയമ്പത്തൂരിലെ പി.എസ്.ജി കോളേജ് ഓഫ് ടെക്നോളജിയിൽ നിന്ന് മെക്കാനിക്കൽ എഞ്ചിനീയറിംഗ് ബിരുദവും തുടർന്ന് ലഖ്നൗ ഐഐഎമ്മിൽ നിന്ന് മാനേജ്മെന്റ് വിദ്യാഭ്യാസവും നേടിയ അണ്ണാമലൈ, സാധാരണ രാഷ്ട്രീയക്കാരന്റെ പശ്ചാത്തലത്തിൽ നിന്നല്ല എത്തിയത്. യൂണിയൻ പബ്ലിക് സർവീസ് കമ്മീഷൻ പരീക്ഷ വിജയിച്ച് 2011-ൽ ഇന്ത്യൻ പൊലീസ് സർവീസിൽ ചേർന്ന അദ്ദേഹം കർണാടക കേഡറിലായിരുന്നു സേവനം അനുഷ്ഠിച്ചത്. ഉഡുപ്പി, ചിക്കമഗളൂർ, ബെംഗളൂരു തുടങ്ങിയ സ്ഥലങ്ങളിൽ കർശനവും ജനകീയനുമായ പൊലീസ് ഉദ്യോഗസ്ഥനെന്ന നിലയിൽ അദ്ദേഹം ശ്രദ്ധ നേടി. “സിംഹം ഓഫ് കർണാടക” എന്ന വിശേഷണവും അന്ന് അദ്ദേഹത്തെ തേടിയെത്തി.

2019-ൽ ഐപിഎസ് ഉദ്യോഗസ്ഥന്റെ സുരക്ഷിത ജീവിതം ഉപേക്ഷിച്ച് തമിഴ്നാട്ടിലേക്ക് മടങ്ങിയെത്തിയ അണ്ണാമലൈ ആദ്യം ജൈവകൃഷിയിലായിരുന്നു ശ്രദ്ധ കേന്ദ്രീകരിച്ചത്. എന്നാൽ അധികം വൈകാതെ തന്നെ രാഷ്ട്രീയത്തിലേക്ക് പ്രവേശിച്ചു. 2020-ൽ ബിജെപിയിൽ ചേർന്ന അദ്ദേഹം വെറും പത്ത് മാസത്തിനുള്ളിൽ സംസ്ഥാന അധ്യക്ഷനായി ഉയർന്നു. തമിഴ്നാട് ബിജെപിയുടെ ചരിത്രത്തിലെ ഏറ്റവും പ്രായം കുറഞ്ഞ സംസ്ഥാന പ്രസിഡന്റായി അദ്ദേഹം മാറി.അവിടെ നിന്നാണ് അണ്ണാമലൈ എന്ന രാഷ്ട്രീയ പ്രതിഭാസത്തിന്റെ യഥാർത്ഥ ഉയർച്ച ആരംഭിക്കുന്നത്.

ദശാബ്ദങ്ങളായി തമിഴ്നാട്ടിൽ ബിജെപി ഒരു അനുബന്ധ ശക്തി മാത്രമായിരുന്നു. ഡിഎംകെയും എഐഎഡിഎംകെയും പോലുള്ള ദ്രാവിഡ പാർട്ടികളുടെ നിഴലിൽ നിന്നാണ് ബിജെപി പ്രവർത്തിച്ചിരുന്നത്. എന്നാൽ അണ്ണാമലൈ ആ മാതൃക തകർക്കാൻ ശ്രമിച്ചു. ബിജെപിക്ക് സ്വന്തം രാഷ്ട്രീയ അടിത്തറ ഉണ്ടാക്കണമെന്നായിരുന്നു അദ്ദേഹത്തിന്റെ നിലപാട്. ഡിഎംകെ സർക്കാരിനെതിരെ കടുത്ത വിമർശനങ്ങളും അഴിമതി ആരോപണങ്ങളും ഉയർത്തിക്കൊണ്ട് അദ്ദേഹം സംസ്ഥാന രാഷ്ട്രീയത്തിൽ സജീവ സാന്നിധ്യമായി.

ദേശീയ മാധ്യമമായ ന്യൂസ് 18 ന്റെ റിപ്പോർട്ട് ചെയുന്നതനുസരിച്ച് “എൻ മൺ, എൻ മക്കൾ” പദയാത്ര അദ്ദേഹത്തിന്റെ രാഷ്ട്രീയ ജീവിതത്തിലെ നിർണായക നിമിഷമായിരുന്നു. തമിഴ്നാട്ടിന്റെ വിവിധ ഭാഗങ്ങളിലൂടെ ആയിരക്കണക്കിന് കിലോമീറ്റർ സഞ്ചരിച്ച ആ യാത്ര ബിജെപിയുടെ സന്ദേശം ഗ്രാമങ്ങളിലേക്ക് എത്തിക്കാൻ സഹായിച്ചു. പദയാത്രയുടെ സമാപന ചടങ്ങിൽ പ്രധാനമന്ത്രി നരേന്ദ്ര മോദി തന്നെ വേദിയിൽ നിന്ന് അണ്ണാമലൈയെ പ്രത്യേകം അഭിനന്ദിച്ചത് അദ്ദേഹത്തിന്റെ രാഷ്ട്രീയ പ്രാധാന്യത്തിന്റെ തെളിവായി കണക്കാക്കപ്പെട്ടു.എന്നാൽ ജനപ്രീതിയും രാഷ്ട്രീയ വിജയവും എല്ലായ്പ്പോഴും ഒരേ കാര്യമല്ല.

അണ്ണാമലൈ ബിജെപിയുടെ ദൃശ്യപരത വർധിപ്പിച്ചെങ്കിലും തിരഞ്ഞെടുപ്പ് വിജയങ്ങൾ കൈവരിക്കാൻ അദ്ദേഹത്തിന് കഴിഞ്ഞില്ല. 2021 നിയമസഭാ തിരഞ്ഞെടുപ്പിൽ അരവക്കുറിച്ചിയിൽ നിന്നും 2024 ലോക്സഭാ തിരഞ്ഞെടുപ്പിൽ കോയമ്പത്തൂരിൽ നിന്നും അദ്ദേഹം മത്സരിച്ചെങ്കിലും പരാജയപ്പെട്ടു. ബിജെപിയുടെ വോട്ട് വിഹിതം ഉയർന്നെങ്കിലും അത് സീറ്റുകളാക്കി മാറ്റാൻ പാർട്ടിക്ക് സാധിച്ചില്ല.ഇതിനിടെ മറ്റൊരു പ്രശ്നവും ശക്തമായി. അത് എഐഎഡിഎംകെയുമായുള്ള ബന്ധമായിരുന്നു.അണ്ണാമലൈയുടെ രാഷ്ട്രീയ ശൈലി ഏറ്റുമുട്ടലുകളുടേതായിരുന്നു. എഐഎഡിഎംകെ നേതാക്കളെ പരസ്യമായി വിമർശിക്കുന്നതിലും ജയലളിതയുടെ രാഷ്ട്രീയ പാരമ്പര്യത്തെക്കുറിച്ച് ചർച്ച ചെയ്യുന്നതിലും അദ്ദേഹം മടിച്ചില്ല. ഇത് സഖ്യകക്ഷികളുമായി ബന്ധം വഷളാക്കി. ഒടുവിൽ 2023-ൽ ബിജെപി-എഐഎഡിഎംകെ സഖ്യം തകർന്നു.

ആ സമയത്ത് ബിജെപി നേതൃത്വം അണ്ണാമലൈയുടെ സ്വതന്ത്ര രാഷ്ട്രീയ പരീക്ഷണത്തെ പിന്തുണയ്ക്കുന്നതായി തോന്നി. എന്നാൽ പിന്നീട് സാഹചര്യം മാറി. 2026 നിയമസഭാ തിരഞ്ഞെടുപ്പിൽ ഡിഎംകെയെ നേരിടാൻ ബിജെപി എഐഎഡിഎംകെയുമായി വീണ്ടും കൈകോർക്കേണ്ട സാഹചര്യം ഉണ്ടായി. പാർട്ടിയുടെ ദേശീയ നേതൃത്വം സഖ്യ രാഷ്ട്രീയത്തിന് മുൻഗണന നൽകാൻ തീരുമാനിച്ചു.അതാണ് അണ്ണാമലൈയുടെ രാഷ്ട്രീയ ജീവിതത്തിലെ നിർണായക വഴിത്തിരിവായി മാറിയത്.

2025-ൽ അമിത് ഷാ എഐഎഡിഎംകെയുമായുള്ള പുതിയ സഖ്യം പ്രഖ്യാപിച്ചു. സഖ്യത്തിന്റെ നേതാവ് എടപ്പാടി കെ. പളനിസ്വാമിയായിരിക്കുമെന്ന് അദ്ദേഹം വ്യക്തമാക്കി. അതോടൊപ്പം തന്നെ അണ്ണാമലൈയെ സംസ്ഥാന അധ്യക്ഷ സ്ഥാനത്ത് നിന്ന് മാറ്റി നൈനാർ നാഗേന്ദ്രനെ നിയമിക്കുകയും ചെയ്തു. രാഷ്ട്രീയ നിരീക്ഷകർക്ക് ഇത് വ്യക്തമായ സന്ദേശമായിരുന്നു , ബിജെപിയുടെ തമിഴ്നാട് തന്ത്രം മാറിയിരിക്കുന്നു.
പിന്നീട് 2026 നിയമസഭാ തിരഞ്ഞെടുപ്പിനുള്ള സ്ഥാനാർഥി പട്ടികയിൽ അണ്ണാമലൈയുടെ പേര് പോലും ഉണ്ടായിരുന്നില്ല. മത്സരിക്കേണ്ടെന്ന് താനാണ് തീരുമാനിച്ചതെന്ന് അദ്ദേഹം പറഞ്ഞെങ്കിലും അദ്ദേഹത്തിന്റെ സ്വാധീനം കുറയുന്നതിന്റെ തെളിവായാണ് പലരും ഇതിനെ കണ്ടത്.

അതിനുശേഷമാണ് കൂടുതൽ ശ്രദ്ധേയമായ സംഭവങ്ങൾ ഉണ്ടായത്. തമിഴ്നാട്ടിൽ അതീവ സെൻസിറ്റീവായ ഭാഷാ വിഷയത്തിൽ കേന്ദ്ര സർക്കാരിന്റെ ത്രിഭാഷാ നയത്തെക്കുറിച്ച് അണ്ണാമലൈ വിമർശനവുമായി രംഗത്തെത്തി. ബിജെപി നേതാക്കൾ അപൂർവമായി മാത്രം ചെയ്യുന്ന ഒരു നീക്കമായിരുന്നു അത്. ഇതോടെ അണ്ണാമലൈ തമിഴ്നാട്ടിലെ ജനവികാരങ്ങൾക്ക് മുൻഗണന നൽകുന്ന നേതാവായി സ്വയം പുനർനിർവചിക്കാൻ ശ്രമിക്കുകയാണെന്ന വിലയിരുത്തലുകൾ ശക്തമായി.

ഇപ്പോൾ ഉയരുന്ന ഏറ്റവും വലിയ ചോദ്യം ഇതാണ്, അണ്ണാമലൈ ബിജെപിയിൽ നിന്ന് പുറത്തുപോകുകയാണോ?ചില രാഷ്ട്രീയ നിരീക്ഷകർ പറയുന്നത് അദ്ദേഹം പാർട്ടിക്കുള്ളിലെ ഒരു ആഭ്യന്തര പോരാട്ടത്തിൽ പരാജയപ്പെട്ടുവെന്നാണ്. തമിഴ്നാട്ടിൽ ബിജെപിക്ക് സ്വതന്ത്രമായ ഒരു അടിത്തറ സൃഷ്ടിക്കണമെന്ന അദ്ദേഹത്തിന്റെ ദീർഘകാല പദ്ധതി സഖ്യ രാഷ്ട്രീയത്തിന്റെ യാഥാർത്ഥ്യങ്ങൾക്കുമുന്നിൽ തകർന്നുവെന്നാണ് അവരുടെ വിലയിരുത്തൽ.എന്നാൽ മറ്റൊരു വിഭാഗം വിശ്വസിക്കുന്നത് ബിജെപി അദ്ദേഹത്തെ പൂർണമായും ഉപേക്ഷിച്ചിട്ടില്ലെന്നാണ്. ദേശീയ തലത്തിൽ വലിയൊരു ചുമതല നൽകാനുള്ള സാധ്യത പാർട്ടി ഇപ്പോഴും തുറന്നുവെച്ചിട്ടുണ്ടെന്നാണ് അവരുടെ വാദം. അദ്ദേഹത്തിനെതിരെ ബിജെപി നേതാക്കൾ പൊതുവേദികളിൽ വിമർശനം ഉന്നയിക്കാത്തതും ഈ വിലയിരുത്തലിന് ശക്തി നൽകുന്നു.

എന്തായാലും ഒരു കാര്യം വ്യക്തമാണ്. കഴിഞ്ഞ നാല് വർഷത്തിനിടെ തമിഴ്നാട്ടിൽ ബിജെപിയുടെ മുഖമായി മാറിയ അണ്ണാമലൈ ഇന്ന് തന്റെ രാഷ്ട്രീയ ജീവിതത്തിലെ ഏറ്റവും നിർണായകമായ ഘട്ടത്തിലൂടെയാണ് കടന്നുപോകുന്നത്. അദ്ദേഹം ബിജെപിയിൽ തുടരുമോ, പുതിയൊരു രാഷ്ട്രീയ പ്രസ്ഥാനം ആരംഭിക്കുമോ, അതോ ദേശീയ രാഷ്ട്രീയത്തിലേക്ക് മാറുമോ എന്ന ചോദ്യങ്ങൾക്കുള്ള ഉത്തരമാണ് ഇനി എല്ലാവരും കാത്തിരിക്കുന്നത്. കാരണം അണ്ണാമലൈയുടെ അടുത്ത നീക്കം ഒരു വ്യക്തിയുടെ രാഷ്ട്രീയ ഭാവിയെ മാത്രം നിർണയിക്കില്ല. തമിഴ്നാട്ടിലെ ബിജെപിയുടെ ഭാവിയും ദ്രാവിഡ രാഷ്ട്രീയത്തിന്റെ അടുത്ത അധ്യായവും അതിനൊപ്പം ബന്ധപ്പെട്ടിരിക്കുന്നു.