ന്യൂഡൽഹി: ക്രിക്കറ്റ് മത്സരത്തിന് മുമ്പ് പതിവായി കേൾക്കുന്ന ‘ജനഗണമന’യ്ക്ക് ഇത്തവണ ഒരു മാറ്റം. അരുൺ ജെയ്റ്റ്ലി സ്റ്റേഡിയത്തിൽ നടന്ന ഇന്ത്യ–അഫ്ഗാനിസ്താൻ ഒന്നാം ട്വന്റി20 മത്സരത്തിന് മുന്നോടിയായി ആദ്യം ‘വന്ദേമാതരം’ ആലപിച്ചു. തുടർന്ന് മാത്രമാണ് ഇന്ത്യയുടെയും അഫ്ഗാനിസ്താന്റെയും ദേശീയഗാനങ്ങൾ മുഴങ്ങിയത്. ഇന്ത്യയിൽ നടക്കുന്ന ഒരു അന്താരാഷ്ട്ര ക്രിക്കറ്റ് മത്സരത്തിൽ ഇത്തരത്തിൽ ‘വന്ദേമാതരം’ ദേശീയഗാനത്തിന് മുമ്പ് ആലപിക്കുന്നത് ഇതാദ്യമായാണ്.
ടോസിന് ശേഷമായിരുന്നു ‘വന്ദേമാതരം’ ആലപിച്ചത്. ആറ് ചരണങ്ങളും പൂർണമായി ആലപിച്ചതോടെ മത്സരത്തിന് മുന്നോടിയായുള്ള ചടങ്ങുകൾ പതിവിലും നീണ്ടു. ‘വന്ദേമാതരം’ പൂർണമായി അവസാനിച്ചതിന് ശേഷമാണ് ഇരു ടീമുകളുടെയും ദേശീയഗാനങ്ങൾ ആലപിച്ചത്. ഈ വർഷം ആദ്യം നടന്ന ടി20 ലോകകപ്പിലും ജൂണിൽ അഫ്ഗാനിസ്താനെതിരേ നടന്ന ഉഭയകക്ഷി പരമ്പരയിലും ദേശീയഗാനം ആലപിച്ചിരുന്നില്ല.
കേന്ദ്ര സർക്കാരിന്റെ നിർദേശപ്രകാരമാണ് പുതിയ നടപടി. ദേശീയഗീതവും ദേശീയഗാനവും ഒരുമിച്ച് അവതരിപ്പിക്കുന്ന ഔദ്യോഗിക ചടങ്ങുകളിൽ ‘വന്ദേമാതരം’ ജനഗണമനയ്ക്ക് മുമ്പായി ആലപിക്കണമെന്ന് കേന്ദ്ര ആഭ്യന്തര മന്ത്രാലയം ജനുവരി 28ന് മാർഗനിർദേശം നൽകിയിരുന്നു. ജൂലായിൽ പുറത്തിറക്കിയ ആശയവിനിമയത്തിലൂടെയും സർക്കാർ ഈ നിർദേശം ആവർത്തിച്ചു.
2025 നവംബറിൽ ‘വന്ദേമാതര’ത്തിന്റെ 150-ാം വാർഷികം ആഘോഷിച്ചിരുന്നു. 2026ലെ ചെങ്കോട്ടയിലെ സ്വാതന്ത്ര്യദിനാഘോഷ ചടങ്ങിലും ആദ്യമായി ‘വന്ദേമാതരം’ ആലാപനം ഉൾപ്പെടുത്തിയിരുന്നു. ഇതിന് പിന്നാലെയാണ് അന്താരാഷ്ട്ര ക്രിക്കറ്റ് മത്സരത്തിലും പുതിയ ക്രമത്തിൽ ദേശീയഗീതവും ദേശീയഗാനവും അവതരിപ്പിച്ചത്.
