അബുദാബി: യുണൈറ്റഡ് അറബ് എമിറേറ്റ്സിന്റെ ചരിത്രത്തിലെ സുവർണ്ണ ഏടായ സായുധസേനാ ഏകീകരണത്തിന്റെ അമ്പതാം വാർഷികം രാജ്യം ഉചിതമായി ആഘോഷിച്ചു. രാഷ്ട്രപിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാന്റെ ദീർഘവീക്ഷണത്തിൽ, 1976 മേയ് ആറിന് വിവിധ എമിറേറ്റുകളിലെ സൈനിക വിഭാഗങ്ങളെ ഒരൊറ്റ പതാകയ്ക്കും നേതൃത്വത്തിനും കീഴിൽ കൊണ്ടുവന്നതിന്റെ സ്മരണ പുതുക്കിയാണ് ഈ ആഘോഷം.
രാജ്യത്തിന്റെ സുരക്ഷയും സ്ഥിരതയും കാത്തുസൂക്ഷിക്കുന്നതിൽ സായുധസേന വഹിക്കുന്ന പങ്കിനെ യു.എ.ഇ. പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ പ്രശംസിച്ചു. നമ്മുടെ സൈനികരുടെ അചഞ്ചലമായ സമർപ്പണവും ത്യാഗവും യു.എ.ഇയെ വീടെന്ന് വിളിക്കുന്ന ഓരോ വ്യക്തിക്കും വലിയ അഭിമാനമാണ് നൽകുന്നതെന്ന് അദ്ദേഹം എക്സിൽ കുറിച്ചു. രാജ്യത്തിന്റെ സുരക്ഷാ കവചമായി വർത്തിക്കുന്ന ഓരോ സൈനികനും അദ്ദേഹം നന്ദി രേഖപ്പെടുത്തി.
Also Read: രാജ്യസുരക്ഷ അവതാളത്തിലാക്കാൻ ശ്രമം; ബഹ്റൈനിൽ തീവ്ര അന്വേഷണം തുടരുന്നു
സായുധസേന രാജ്യത്തിന്റെ നട്ടെല്ലാണെന്നും കഴിഞ്ഞ അഞ്ച് പതിറ്റാണ്ടായി അന്താരാഷ്ട്ര തലത്തിൽ യു.എ.ഇയുടെ യശസ്സ് ഉയർത്താൻ സൈന്യം വഹിച്ച പങ്ക് നിസ്തുലമാണെന്നും വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം പറഞ്ഞു. വിശ്വസ്തതയുടെയും ധീരതയുടെയും ചരിത്രമാണ് സായുധസേനയുടേതെന്ന് ഷെയ്ഖ് മൻസൂർ ബിൻ സായിദ് അൽ നഹ്യാനും അഭിപ്രായപ്പെട്ടു.
വിവിധ എമിറേറ്റുകളിലെ ഭരണാധികാരികളും സായുധസേനാ ഏകീകരണത്തിന്റെ പ്രാധാന്യം എടുത്തുപറഞ്ഞു. രാജ്യത്തെ ജനങ്ങൾക്ക് ആശ്വാസത്തോടെയും ദൃഢനിശ്ചയത്തോടെയും ജീവിക്കാനുള്ള സാഹചര്യം ഒരുക്കിയത് സായുധസേനയുടെ കരുത്താണെന്ന് ഷാർജ ഭരണാധികാരി ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി ഉൾപ്പെടെയുള്ള സുപ്രീം കൗൺസിൽ അംഗങ്ങൾ വ്യക്തമാക്കി. സ്ഥാപക നേതാക്കളുടെ ദർശനം പൂർത്തീകരിക്കപ്പെട്ട ഈ ദിനം, വരാനിരിക്കുന്ന കൂടുതൽ കരുത്തുറ്റ ഭാവിയിലേക്കുള്ള ചുവടുവെപ്പാണെന്ന് ഭരണനേതൃത്വം ഒന്നടങ്കം പ്രഖ്യാപിച്ചു.
Also Read: കലാപവും നശീകരണവും; ബഹ്റൈനിൽ 14 പേർക്ക് തടവും പിഴയും
യു.എ.ഇയുടെ അഖണ്ഡതയും ദേശീയ നേട്ടങ്ങളും സംരക്ഷിക്കുന്നതിൽ അജയ്യമായ കരുത്തായി തുടരുന്ന സായുധസേനയ്ക്ക് ആദരമർപ്പിച്ചുകൊണ്ട് രാജ്യത്തുടനീളം വിപുലമായ പരിപാടികളാണ് സംഘടിപ്പിച്ചത്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
