ന്യൂഡൽഹി: ഹ്യുണ്ടായ് മോട്ടോർ ഇന്ത്യ ലിമിറ്റഡ് (HMIL) തങ്ങളുടെ അടുത്ത മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായി (സിഇഒ) തരുൺ ഗാർഗിനെ നിയമിച്ചതായി പ്രഖ്യാപിച്ചു. ഓഹരി ഉടമകളുടെ അംഗീകാരത്തിന് വിധേയമായി 2026 ജനുവരി 1-ന് നിയമനം പ്രാബല്യത്തിൽ വരും. 1996-ൽ സ്ഥാപിതമായതിന് ശേഷം ഹ്യുണ്ടായ് മോട്ടോർ ഇന്ത്യയെ നയിക്കുന്ന ആദ്യ ഇന്ത്യൻ പൗരനാണ് തരുൺ ഗാർഗ് എന്നത് ശ്രദ്ധേയമാണ്. നിലവിൽ മുഴുവൻ സമയ ഡയറക്ടറും ചീഫ് ഓപ്പറേറ്റിംഗ് ഓഫീസറുമായി (സിഒഒ) സേവനമനുഷ്ഠിക്കുന്ന ഗാർഗ്, സ്ഥാനമൊഴിയുന്ന അൻസൂ കിമ്മിന് പകരമായാണ് ചുമതലയേൽക്കുന്നത്.
അൻസൂ കിം ദക്ഷിണ കൊറിയയിലെ ഹ്യുണ്ടായ് മോട്ടോർ കമ്പനിയിൽ (എച്ച്എംസി) തന്ത്രപരമായ റോളിലേക്ക് മാറും. ഇന്ത്യൻ വിപണിയിലും പ്രാദേശിക നേതൃത്വത്തിലുമുള്ള ഹ്യുണ്ടായിയുടെ വർധിച്ചുവരുന്ന ആത്മവിശ്വാസത്തെയാണ് ഈ നിയമനം അടിവരയിടുന്നത്. കൂടാതെ പുതിയ പദവി ഏറ്റെടുക്കുന്ന തരുൺ ഗാർഗ്, ഹ്യുണ്ടായ് മോട്ടോർ ഗ്രൂപ്പ് തന്നിൽ അർപ്പിച്ച വിശ്വാസത്തിന് നന്ദി അറിയിച്ചു. ഇന്ത്യയുടെ മൊബിലിറ്റിയുടെ ഭാവി രൂപപ്പെടുത്തുന്നതിൽ HMIL-ന്റെ ഉപഭോക്തൃ ആനന്ദത്തിന്റെ പാരമ്പര്യം ശക്തിപ്പെടുത്താൻ താൻ ലക്ഷ്യമിടുന്നതായി അദ്ദേഹം പറഞ്ഞു.
ഗാർഗിന്റെ റെക്കോർഡ്
32 വർഷത്തിലേറെ പരിചയസമ്പന്നനായ ഗാർഗ്, HMIL-ന്റെ വിജയഗാഥയിൽ നിർണ്ണായക പങ്ക് വഹിച്ചിട്ടുണ്ട്. അദ്ദേഹത്തിന്റെ നേതൃത്വത്തിൽ കമ്പനി എക്കാലത്തെയും ഉയർന്ന വിൽപ്പനയും ലാഭവും രേഖപ്പെടുത്തുകയും, ഇന്ത്യയിലെ ഏറ്റവും വലിയ പബ്ലിക് ഓഫറായ 2024-ലെ ഐപിഒയ്ക്ക് നേതൃത്വം നൽകുകയും ചെയ്തു.
ALSO READ: ഗോവയിൽ റോഡ് സുരക്ഷക്ക് ഇനി എഐ കാവൽ; ഡാഷ്കാമുകളുടെ പരീക്ഷണ ഓട്ടം ആരംഭിച്ചു
ഡിജിറ്റൽ പരിവർത്തന സംരംഭങ്ങളിലും അദ്ദേഹം നിർണായക പങ്ക് വഹിച്ചു. 2019-ൽ ഹ്യുണ്ടായിയിൽ ചേരുന്നതിന് മുമ്പ്, മാരുതി സുസുക്കി ഇന്ത്യ ലിമിറ്റഡിൽ മാർക്കറ്റിംഗ്, ലോജിസ്റ്റിക്സ് തുടങ്ങിയ വിഭാഗങ്ങളിൽ സീനിയർ നേതൃപാടവം വഹിച്ചിട്ടുണ്ട്. ഡൽഹി ടെക്നോളജിക്കൽ യൂണിവേഴ്സിറ്റി (മെക്കാനിക്കൽ എഞ്ചിനീയറിംഗ്), ഐഐഎം ലഖ്നൗ (എംബിഎ) എന്നിവിടങ്ങളിലെ പൂർവ്വ വിദ്യാർത്ഥിയാണ് ശ്രീ. ഗാർഗ്.
