പരിസ്ഥിതി സംരക്ഷണ പ്രവർത്തനങ്ങളിൽ വിപ്ലവകരമായ മാറ്റങ്ങൾ കൊണ്ടുവന്നുകൊണ്ട് അറബ് ലോകത്ത് ചരിത്രനേട്ടം സ്വന്തമാക്കി യു.എ.ഇ. 2026-ലെ പരിസ്ഥിതി പ്രകടന സൂചികയിൽ (EPI) അറബ് രാജ്യങ്ങളിൽ ഒന്നാമതെത്തിയിരിക്കുകയാണ് യു.എ.ഇ. കാലാവസ്ഥാ വ്യതിയാനത്തെ നേരിടുന്നതിലും പാരിസ്ഥിതിക ആരോഗ്യത്തിലും രാജ്യം നടപ്പിലാക്കിയ കൃത്യമായ നയങ്ങളും പദ്ധതികളുമാണ് ഈ ആഗോള നേട്ടത്തിന് അടിത്തറയൊരുക്കിയത്.
എന്താണ് ഈ വിജയരഹസ്യം?
12 വിഭാഗങ്ങളിലായി 47 സൂചകങ്ങളെ അടിസ്ഥാനമാക്കിയാണ് ഇ.പി.ഐ റാങ്കിങ് തയ്യാറാക്കിയത്. മാലിന്യ സംസ്കരണത്തിലും സമുദ്ര പരിസ്ഥിതിക്ക് വലിയ ദോഷം ചെയ്യുന്ന ‘ബോട്ടം ട്രോളിങ്’ പൂർണമായും നിരോധിച്ചതിലും 100-ൽ 100 മാർക്കും നേടി യു.എ.ഇ ലോകത്ത് ഒന്നാമതെത്തി. മലിനജല സംസ്കരണത്തിൽ ആഗോളതലത്തിൽ 19-ാം സ്ഥാനവും രാജ്യം സ്വന്തമാക്കി. അന്തരിച്ച ശൈഖ് സായിദ് ബിൻ സുൽത്താൻ ആൽ നഹ്യാന്റെ പാരിസ്ഥിതിക പൈതൃകമാണ് യു.എ.ഇയുടെ ഈ പുരോഗതിയുടെ അടിസ്ഥാനമെന്ന് കാലാവസ്ഥാ വ്യതിയാന പരിസ്ഥിതി മന്ത്രി ഡോ. ആംന ബിൻത് അബ്ദുല്ല അൽ ദഹാക് വ്യക്തമാക്കി. ‘നെറ്റ് സീറോ 2050’ ലക്ഷ്യത്തിലൂടെ വ്യാവസായിക കാർബൺ പുറന്തള്ളൽ കുറയ്ക്കാനും രാജ്യത്തിന് കഴിഞ്ഞു.
ALSO READ;ലോകത്തെ നടുക്കിയ ‘സെക്സ് ഡെമൺ’..! കൊടും ക്രൂരതകളുടെ ആൾരൂപമായ ആ സൈക്കോ കില്ലർ ആരാണ്?
ഊർജ്ജവും ജൈവവൈവിധ്യവും
പരിസ്ഥിതി സംരക്ഷണത്തോടൊപ്പം വൻതോതിലുള്ള നിക്ഷേപങ്ങളും യു.എ.ഇ നടത്തുന്നുണ്ട്. 2022-നും 2025-നും ഇടയിൽ രാജ്യത്തിന്റെ പുനരുൽപ്പാദിപ്പിക്കാവുന്ന ഊർജ്ജശേഷി 117 ശതമാനം വർധിപ്പിച്ചു. അബുദാബിയിൽ നിർമിക്കുന്ന 5.2 ഗിഗാവാട്ട് ശേഷിയുള്ള സോളാർ പ്രോജക്റ്റ് ലോകത്തിലെ തന്നെ ഏറ്റവും വലിയ സോളാർ-പ്ലസ്-സ്റ്റോറേജ് സംവിധാനമായി മാറും. ലോകത്തിലെ ഏറ്റവും വലിയ റിവേഴ്സ് ഓസ്മോസിസ് പ്ലാന്റുകളിലൊന്നായ ‘അൽ തവീല’ ജലക്ഷമത വർധിപ്പിക്കാൻ സഹായിക്കുന്നു. കൂടാതെ, വായു ഗുണനിലവാര അജണ്ട 2031, സർക്കുലർ ഇക്കോണമി പോളിസി എന്നിവയും ഹരിത വികസനത്തിന് വഴിയൊരുക്കുന്നു.
കണ്ടൽക്കാടുകളുടെ സംരക്ഷണം
ജൈവവൈവിധ്യം വർധിപ്പിക്കുന്നതിന്റെ ഭാഗമായി 2030-ഓടെ 10 കോടി കണ്ടൽ മരങ്ങൾ നട്ടുപിടിപ്പിക്കാനുള്ള യു.എ.ഇയുടെ ലക്ഷ്യത്തിന്റെ പകുതിയും ഇതിനകം പൂർത്തിയായിക്കഴിഞ്ഞു. പാരിസ്ഥിതിക അവബോധം വെറും ഒരു നയമല്ല, മറിച്ച് രാജ്യത്തിന്റെ സംസ്കാരത്തിന്റെ ഭാഗമാണെന്ന് യു.എ.ഇ വീണ്ടും തെളിയിക്കുന്നു. ഭാവി തലമുറയ്ക്കായി ഭൂമിയെ സുരക്ഷിതമാക്കുന്നതിൽ യു.എ.ഇ കാണിക്കുന്ന ഈ പ്രതിബദ്ധത ലോകരാജ്യങ്ങൾക്കിടയിൽ തന്നെ വലിയ ശ്രദ്ധയാണ് നേടിയിരിക്കുന്നത്. വികസനവും പരിസ്ഥിതി സംരക്ഷണവും ഒരേ പാതയിൽ സഞ്ചരിക്കാമെന്ന് ലോകത്തിന് കാണിച്ചുകൊടുക്കുകയാണ് ഈ ചെറിയ രാജ്യം.
