കുവൈത്ത് സിറ്റി: കുവൈത്തിലെ സുലൈബിയയിലുള്ള ജനറൽ അഡ്മിനിസ്ട്രേഷൻ ഓഫ് കറക്ഷണൽ ഇൻസ്റ്റിറ്റ്യൂഷൻസിന്റെ (ജയിൽ വകുപ്പ്) കെട്ടിടത്തിൽ വൻ തീപിടിത്തം. ഞായറാഴ്ച രാവിലെ ഉണ്ടായ തീപിടുത്തത്തിൽ നിരവധി പൊലീസ് ഉദ്യോഗസ്ഥർ ഉൾപ്പെടെ കെട്ടിടത്തിലെ ശുചീകരണ ജോലികൾക്കായി കരാറെടുത്ത സ്വകാര്യ കമ്പനിയിലെ ജീവനക്കാർക്കും പരിക്കേറ്റിട്ടുണ്ട്.
രക്ഷാപ്രവർത്തനം
തീപിടിത്തം സംബന്ധിച്ച വിവരം ലഭിച്ച ഉടൻ തന്നെ ആഭ്യന്തര മന്ത്രാലയത്തിന്റെ ഓപ്പറേഷൻസ് റൂം നിർദ്ദേശപ്രകാരം ജനറൽ ഫയർ ഫോഴ്സും എമർജൻസി മെഡിക്കൽ സർവീസസും സ്ഥലത്തെത്തി. അഗ്നിശമന സേനാംഗങ്ങളുടെ സമയോചിതമായ ഇടപെടൽ മൂലം തീ വേഗത്തിൽ നിയന്ത്രിക്കാനായി. പരിക്കേറ്റവർക്ക് പ്രാഥമിക വൈദ്യസഹായം നൽകിയ ശേഷം കൂടുതൽ ചികിത്സയ്ക്കായി ആശുപത്രിയിലേക്ക് മാറ്റി. ഇവരുടെ ആരോഗ്യസ്ഥിതി അധികൃതർ നിരീക്ഷിച്ചു വരികയാണ്.
Also Read: ബഹ്റൈൻ പൗരന്മാർക്ക് വിദേശത്തിരുന്ന് പാസ്പോർട്ട് മാറ്റാം; പുതിയ ഇ-സേവനം നിലവിൽ വന്നു
അന്വേഷണം ആരംഭിച്ചു
സംഭവവുമായി ബന്ധപ്പെട്ട് സാലിബിയ പൊലീസ് സ്റ്റേഷനിൽ (കേസ് നമ്പർ: 2026/8) കേസ് രജിസ്റ്റർ ചെയ്തിട്ടുണ്ട്. തീപിടിത്തത്തിന്റെ യഥാർത്ഥ കാരണം കണ്ടെത്താൻ ആഭ്യന്തര മന്ത്രാലയം ഉന്നതതല അന്വേഷണം പ്രഖ്യാപിച്ചു. കുറ്റക്കാരെന്ന് കണ്ടെത്തുന്നവർക്കെതിരെ കർശന നിയമനടപടി സ്വീകരിക്കുമെന്ന് മന്ത്രാലയം വാർത്താക്കുറിപ്പിൽ അറിയിച്ചു.
