കരിയറിലെ ലക്ഷ്യങ്ങളും ജീവിത സാഹചര്യങ്ങളും കാരണം ഇന്ന് ദമ്പതികൾക്കിടയിൽ മാതൃത്വവും പിതൃത്വവും വൈകി തിരഞ്ഞെടുക്കുന്ന പ്രവണത വളരെ കൂടിവരികയാണ്. എന്നാൽ മുപ്പതുകളിലും നാളുകൾ വൈകിയും കുട്ടികളെ സ്വീകരിക്കുന്നത് ശാരീരികമായും മാനസികമായും എന്തൊക്കെ മാറ്റങ്ങളാണ് ഉണ്ടാക്കുന്നതെന്ന് വിദഗ്ധർ വ്യക്തമാക്കുന്നു. ആധുനിക വൈദ്യശാസ്ത്രത്തിന്റെ വളർച്ച ഇത്തരം കാര്യങ്ങളിൽ ആളുകൾക്ക് ആത്മവിശ്വാസം നൽകുന്നുണ്ടെങ്കിലും, പ്രായം ഫെർട്ടിലിറ്റിയെ എങ്ങനെയൊക്കെ ബാധിക്കുന്നു എന്ന് മനസ്സിലാക്കേണ്ടത് അത്യാവശ്യമാണ്.
കരിയർ കെട്ടിപ്പടുക്കുന്നതിനും സാമ്പത്തിക ഭദ്രത ഉറപ്പാക്കുന്നതിനും വേണ്ടി ഇരുപതുകളും മുപ്പതുകളുടെ തുടക്കവും മാറ്റിവെക്കുന്നവരാണ് ഇന്നത്തെ തലമുറയെന്ന് റെയിൻബോ ചിൽഡ്രൻസ് ഹോസ്പിറ്റലിലെ ക്ലിനിക്കൽ സൈക്കോളജിസ്റ്റ് ഡോ. രാധിക ഗേര വ്യക്തമാക്കുന്നു. വൈകാരികമായി തയ്യാറെടുക്കുന്നതിനും അനുയോജ്യരായ പങ്കാളികളെ കണ്ടെത്തുന്നതിനുമുള്ള സമയദൈർഘ്യവും ഇതിന് കാരണമാകുന്നുണ്ട്. എന്നാൽ 35 വയസ്സിനു ശേഷമുള്ള ഗർഭധാരണത്തെ മെഡിക്കൽ ലോകം ‘അഡ്വാൻസ്ഡ് മാറ്റേണൽ ഏജ്’ (AMA) ആയിട്ടാണ് കണക്കാക്കുന്നത്. ഈ പ്രായത്തിന് ശേഷം ഗർഭകാല സങ്കീർണ്ണതകൾ വർദ്ധിക്കാൻ സാധ്യതയുണ്ടെങ്കിലും, കൃത്യമായ മുൻകരുതലുകളിലൂടെയും ആരോഗ്യകരമായ ജീവിതശൈലിയിലൂടെയും ആരോഗ്യത്തോടെയുള്ള കുഞ്ഞുങ്ങളെ പ്രസവിക്കാൻ സാധിക്കുമെന്ന് ഡോക്ടർമാർ പറയുന്നു.
സ്ത്രീകളിൽ പ്രായത്തിനനുസരിച്ച് അണ്ഡത്തിന്റെ ഗുണനിലവാരത്തിലും എണ്ണത്തിലും സ്വാഭാവികമായ കുറവുണ്ടാകുമെന്ന് സി.കെ. ബിർള ഹോസ്പിറ്റലിലെ ഗൈനക്കോളജിസ്റ്റ് ഡോ. പർണമിത ഭട്ടാചാര്യയും ശർദ്ധ കെയർ ഹെൽത്ത് സിറ്റിയിലെ ഒബ്സ്റ്റട്രിക്സ് ആൻഡ് ഗൈനക്കോളജി ഡയറക്ടർ ഡോ. റുചി ശ്രീവാസ്തവയും വ്യക്തമാക്കുന്നു. ഗർഭകാലത്ത് പ്രമേഹം, ഉയർന്ന രക്തസമ്മർദ്ദം, സിസേറിയൻ സാധ്യതകൾ എന്നിവ കൂടാനും ഇത് കാരണമാകാം. എന്നാൽ 35 വയസ്സിന് ശേഷം ഗർഭധാരണം അസാധ്യമാണെന്നത് തെറ്റായ ധാരണയാണെന്നും, കൃത്യമായ പ്രായത്തിൽ എഗ്ഗ് ഫ്രീസിങ് (Egg Freezing) പോലെയുള്ള മുൻകരുതലുകൾ എടുക്കുന്നത് ഇത്തരം പ്രതിസന്ധികളെ ഒരു പരിധി വരെ അതിജീവിക്കാൻ സഹായിക്കുമെന്നും വിദഗ്ധർ നിർദ്ദേശിക്കുന്നു.
വൈകിയുള്ള മാതൃത്വം ശാരീരിക വെല്ലുവിളികൾ ഉയർത്തുമ്പോൾ തന്നെ, മാനസികമായ പക്വതയും ക്ഷമയും ഇത്തരം മാതാപിതാക്കളിൽ കൂടുതലായിരിക്കുമെന്ന് മനശാസ്ത്രജ്ഞർ ചൂണ്ടിക്കാണിക്കുന്നു. അതേസമയം തന്നെ ഫെർട്ടിലിറ്റി ചികിത്സകളും മറ്റും വരുത്തുന്ന മാനസിക സമ്മർദ്ദങ്ങളും വെല്ലുവിളികളും ചെറുതല്ല. അതിനാൽ കൃത്യമായ ആരോഗ്യ പരിശോധനകളും മാനസിക പിന്തുണയും ഉറപ്പാക്കിക്കൊണ്ട് ദമ്പതികൾക്ക് ആത്മവിശ്വാസത്തോടെ മാതൃത്വത്തിലേക്കും പിതൃത്വത്തിലേക്കും ചുവടുവെക്കാവുന്നതാണ്.
