കേന്ദ്ര സർക്കാർ ജീവനക്കാരുടെയും പെൻഷൻകാരുടെയും ശമ്പള പരിഷ്കരണത്തിനായി രൂപീകരിച്ച എട്ടാം ശമ്പള കമ്മീഷന്റെ നടപടികൾ ആറാം മാസത്തിലേക്ക് കടക്കുമ്പോൾ വലിയ പ്രതീക്ഷയിലാണ് ജീവനക്കാർ. റിപ്പോർട്ട് സമർപ്പിക്കാൻ നൽകിയിട്ടുള്ള 18 മാസക്കാലയളവിൽ ആറ് മാസങ്ങൾ പൂർത്തിയാകുമ്പോൾ, കമ്മീഷൻ ഇപ്പോൾ പ്രാരംഭ ഘട്ടം പിന്നിട്ട് നിർണ്ണായകമായ ചർച്ചകളിലേക്ക് പ്രവേശിച്ചിരിക്കുകയാണ്. ഇതിന്റെ ഭാഗമായി ഏപ്രിൽ മാസം മുതൽ കമ്മീഷന്റെ പ്രവർത്തനങ്ങളിൽ വലിയ പുരോഗതിയാണ് രേഖപ്പെടുത്തിയിട്ടുള്ളത്.
ജീവനക്കാരുടെ പ്രതിനിധി സംഘടനയായ നാഷണൽ കൗൺസിൽ ഓഫ് ജോയിന്റ് കൺസൾട്ടേറ്റീവ് മെഷിനറി ഇതിനോടകം തന്നെ 51 പേജുള്ള വിശദമായ നിവേദനം കമ്മീഷന് സമർപ്പിച്ചു കഴിഞ്ഞു. നിലവിൽ 18,000 രൂപയായ കുറഞ്ഞ അടിസ്ഥാന ശമ്പളം ഒറ്റയടിക്ക് 69,000 രൂപയായി ഉയർത്തണമെന്നാണ് പ്രധാന ആവശ്യം. ശമ്പള നിർണ്ണയത്തിനായി 3.83 ഫിറ്റ്മെന്റ് ഫാക്ടർ ഉപയോഗിക്കണമെന്നും, വാർഷിക ശമ്പള വർദ്ധനവ് ആറ് ശതമാനമായി ഉയർത്തണമെന്നും നിവേദനത്തിൽ ആവശ്യപ്പെടുന്നുണ്ട്. നിവേദനങ്ങൾ സമർപ്പിക്കാനുള്ള സമയപരിധി 2026 മെയ് 31 വരെ നീട്ടിയിട്ടുണ്ട്.
വരും ദിവസങ്ങളിൽ കമ്മീഷൻ രാജ്യവ്യാപകമായി സന്ദർശനം നടത്തി വിവിധ തലങ്ങളിലുള്ള ജീവനക്കാരുമായി നേരിട്ട് സംവദിക്കും. മെയ് പകുതിയോടെ ഹൈദരാബാദിലും ജൂൺ ആദ്യവാരം ശ്രീനഗർ, ലഡാക്ക് എന്നിവിടങ്ങളിലും ചർച്ചകൾ നിശ്ചയിച്ചിട്ടുണ്ട്. 2026 ജനുവരി ഒന്ന് മുതൽ പുതിയ പരിഷ്കാരങ്ങൾ നടപ്പിലാക്കണമെന്ന ആവശ്യത്തിൽ ജീവനക്കാർ ഉറച്ചുനിൽക്കുകയാണ്. ലക്ഷക്കണക്കിന് വരുന്ന ജീവനക്കാരെ ബാധിക്കുന്ന വിഷയമായതിനാൽ വളരെ സൂക്ഷ്മമായ വിശകലനങ്ങളാണ് ഇപ്പോൾ കമ്മീഷന്റെ നേതൃത്വത്തിൽ നടക്കുന്നത്.
