മലയാള സിനിമയിൽ ഏവരും ഒരുപോലെ കാത്തിരുന്ന മോഹൻലാൽ-ജിത്തു ജോസഫ് കൂട്ടുകെട്ടിന്റെ ‘ദൃശ്യം 3’ തിയറ്ററുകളിൽ വൻ തരംഗം സൃഷ്ടിക്കുകയാണ്. മെയ് 21-ന് റിലീസ് ചെയ്ത ചിത്രം ഇതിനകം തന്നെ ആഗോള ബോക്സ് ഓഫീസിൽ 150 കോടിയിലധികം രൂപയുടെ കളക്ഷൻ നേടി റെക്കോർഡ് കുതിപ്പ് തുടരുകയാണ്. വിജയകരമായി പ്രദർശനം തുടരുന്നതിനിടെ ചിത്രത്തിന്റെ അണിയറപ്രവർത്തകർ ഇപ്പോൾ സിനിമയുടെ തത്സമയ ഷൂട്ടിംഗ് അനുഭവങ്ങൾ പങ്കുവെക്കുന്ന ബിഹൈൻഡ് ദ സീൻസ് ദൃശ്യങ്ങൾ പുറത്തുവിട്ടിട്ടുണ്ട്. ഇത് ദൃശ്യം ഫ്രാഞ്ചൈസിയുടെ ആരാധകർക്കിടയിൽ വലിയ ആവേശമാണ് ഉണ്ടാക്കിയിരിക്കുന്നത്.
തന്റെ കുടുംബത്തെ സംരക്ഷിക്കാൻ ഏതറ്റം വരെയും പോകുന്ന ജോർജുകുട്ടിയും കുടുംബവും ഇത്തവണ പോലീസ് പിടിയിലാകുമോ, അതോ നാലാം ക്ലാസുകാരന്റെ കൂർമ്മബുദ്ധിയിൽ വീണ്ടും രക്ഷപ്പെടുമോ എന്നറിയാനുള്ള പ്രേക്ഷകരുടെ ആകാംക്ഷയാണ് ചിത്രത്തിന്റെ വൻ വിജയത്തിന് കാരണം. ഇമോഷണൽ രംഗങ്ങൾക്ക് ഏറെ പ്രാധാന്യം നൽകിയാണ് മൂന്നാം ഭാഗം ഒരുക്കിയിരിക്കുന്നത്. സെൻസർ ബോർഡിന്റെ യു/എ സർട്ടിഫിക്കറ്റ് ലഭിച്ച ചിത്രം ഏപ്രിൽ രണ്ടിന് റിലീസ് ചെയ്യാൻ നിശ്ചയിച്ചിരുന്നെങ്കിലും, പശ്ചിമേഷ്യൻ യുദ്ധ പശ്ചാത്തലത്തെത്തുടർന്ന് മെയ് 21-ലേക്ക് മാറ്റുകയായിരുന്നു. മോഹൻലാലിനൊപ്പം മീന, അൻസിബ, എസ്തർ, ആശാ ശരത്, സിദ്ധിഖ് തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ഈ ചിത്രം നിർമ്മിച്ചിരിക്കുന്നത്.
ദൃശ്യം 3-ന്റെ വൻ വിജയം ബോളിവുഡിലും വലിയ ചലനങ്ങൾ ഉണ്ടാക്കുന്നുണ്ട്. ചിത്രത്തിന്റെ ഹിന്ദി പതിപ്പ് 2026 ഒക്ടോബർ രണ്ടിന് തീയേറ്ററുകളിൽ എത്തും. ഹിന്ദി പതിപ്പിന്റെ നിർമ്മാതാക്കളായ പനോരമ സ്റ്റുഡിയോസ്, മലയാളം ഒറിജിനലിന്റെ ആഗോള തിയട്രിക്കൽ-ഡിജിറ്റൽ അവകാശങ്ങൾ സ്വന്തമാക്കിയതായാണ് വിവരം. ബോളിവുഡിലെ പ്രമുഖ ബാനറായ പെൻ സ്റ്റുഡിയോസ്, പനോരമ സ്റ്റുഡിയോസ് വഴി ആശീർവാദ് സിനിമാസിൽ 100 കോടി രൂപയുടെ വൻ നിക്ഷേപം നടത്തിയിട്ടുണ്ടെന്ന വാർത്തകളും ദൃശ്യം ഫ്രാഞ്ചൈസിയുടെ ആഗോള തലത്തിലുള്ള ബിസിനസ്സ് മൂല്യം വ്യക്തമാക്കുന്നതാണ്.
