ഇന്ത്യയിലെ ആൻഡ്രോയിഡ് ഉപയോക്താക്കൾക്കായി ഗൂഗിൾ വാലറ്റ് അവതരിപ്പിച്ച പുതിയ ഫീച്ചർ വ്യക്തിഗത തിരിച്ചറിയൽ പ്രക്രിയയെ കൂടുതൽ ലളിതമാക്കിയിരിക്കുകയാണ്. ആധാർ വെരിഫൈയബിൾ ക്രെഡൻഷ്യലുകൾ വാലറ്റിൽ നേരിട്ട് സംരക്ഷിക്കാൻ സാധിക്കുന്നതോടെ, സുരക്ഷിതമായ രീതിയിൽ ഐഡന്റിറ്റി വെരിഫിക്കേഷൻ നടത്താൻ ഉപയോക്താക്കൾക്ക് കഴിയും.
ഭൗതികമായ ആധാർ കാർഡ് എപ്പോഴും കൈവശം വെക്കുന്നത് മൂലമുള്ള നഷ്ടപ്പെടാനുള്ള സാധ്യതയും ദുരുപയോഗവും ഒഴിവാക്കാൻ ഈ ഡിജിറ്റൽ സംവിധാനം സഹായിക്കുന്നു. നിലവിൽ ഭാരത് മാട്രിമോണി പോലുള്ള പ്ലാറ്റ്ഫോമുകളിലും വിസ അപേക്ഷകൾക്കായുള്ള അറ്റ്ലിസ് പോലുള്ള സേവനങ്ങളിലും ഈ ഫീച്ചർ പ്രയോജനപ്പെടുത്താം. വൈകാതെ തന്നെ മൈഗേറ്റ്, സ്നാബിറ്റ് തുടങ്ങിയ കൂടുതൽ പ്ലാറ്റ്ഫോമുകളിലേക്കും ഈ സേവനം വ്യാപിപ്പിക്കാൻ ഗൂഗിൾ പദ്ധതിയിടുന്നുണ്ട്.
Also Read:സൗരയൂഥത്തിന്റെ അതിർത്തിയിൽ വിസ്മയം! അന്തരീക്ഷമുള്ള പുതിയ ആകാശവസ്തുവിനെ കണ്ടെത്തി
ഗൂഗിൾ വാലറ്റിൽ ആധാർ ചേർക്കുന്നതിനായി വാലറ്റ് ആപ്പിലെ ‘Add’ ഓപ്ഷനിൽ നിന്ന് ആധാർ തിരഞ്ഞെടുക്കുകയാണ് ആദ്യ ഘട്ടം. തുടർന്ന് ഇത് ഉപയോക്താവിനെ mAadhaar ആപ്പിലേക്ക് നയിക്കുകയും അവിടെ ആധാർ നമ്പർ നൽകി വെരിഫിക്കേഷൻ പൂർത്തിയാക്കാൻ ആവശ്യപ്പെടുകയും ചെയ്യും. രജിസ്റ്റർ ചെയ്ത മൊബൈൽ നമ്പറിൽ ലഭിക്കുന്ന OTP കൂടി നൽകി ലോഗിൻ ചെയ്ത ശേഷം ‘Add to Wallet’ എന്ന ഓപ്ഷൻ തിരഞ്ഞെടുക്കുന്നതോടെ പ്രക്രിയ പൂർത്തിയാകും. വെരിഫിക്കേഷൻ പൂർത്തിയായ ആധാർ ക്രെഡൻഷ്യലുകൾ വാലറ്റിൽ ലഭ്യമാകുന്നതോടെ ആവശ്യാനുസരണം NFC വഴിയോ QR കോഡ് സ്കാൻ ചെയ്തോ തിരിച്ചറിയൽ രേഖയായി ഇത് ഉപയോഗിക്കാൻ സാധിക്കും. ഇതിനു പുറമെ സ്മാർട്ട്ഫോൺ വിപണിയിലെ റെഡ്മി, വൺപ്ലസ് തുടങ്ങിയ പ്രമുഖ ബ്രാൻഡുകളുടെ പുതിയ മോഡലുകൾക്കും നിലവിൽ വിപണിയിൽ മികച്ച ഓഫറുകൾ ലഭ്യമാണ്.
