കടകളിലും ഹോട്ടലുകളിലും ഓൺലൈൻ ഇടപാടുകളിലും ഇന്ന് പണം കൈമാറാൻ ഏറ്റവും കൂടുതൽ ഉപയോഗിക്കുന്ന മാർഗങ്ങളിലൊന്നാണ് ക്യുആർ കോഡ്. ഫോൺ എടുത്ത് കോഡ് സ്കാൻ ചെയ്ത് പണം നൽകുന്നത് പതിവായതോടെ, കാണുന്ന ഏത് ക്യുആർ കോഡും പരിശോധിക്കാതെ സ്കാൻ ചെയ്യുന്ന ശീലവും വർധിച്ചിട്ടുണ്ട്. എന്നാൽ ക്യുആർ കോഡ് കണ്ടാൽ ഉടൻ സ്കാൻ ചെയ്യുന്നത് എല്ലായ്പ്പോഴും സുരക്ഷിതമല്ല. പണം നൽകുന്നതിന് മുമ്പ് ആരിലേക്കാണ് പണം പോകുന്നതെന്ന് ഉറപ്പാക്കേണ്ടത് പ്രധാനമാണ്.
ക്യുആർ കോഡ് സ്കാൻ ചെയ്ത ശേഷം പണം ലഭിക്കുന്ന വ്യക്തിയുടെയോ സ്ഥാപനത്തിന്റെയോ പേര് ആദ്യം പരിശോധിക്കണം. പേര് ശരിയാണെന്ന് ഉറപ്പാക്കിയ ശേഷമേ പണം നൽകാവൂ. പരിചയമില്ലാത്ത വ്യക്തി അയച്ച ക്യുആർ കോഡ്, സംശയകരമായ സന്ദേശത്തോടൊപ്പം ലഭിക്കുന്ന കോഡ്, അല്ലെങ്കിൽ പണം ലഭിക്കുമെന്ന് പറഞ്ഞ് സ്കാൻ ചെയ്യാൻ ആവശ്യപ്പെടുന്ന കോഡ് എന്നിവ പ്രത്യേകം ശ്രദ്ധിക്കണം. പണം സ്വീകരിക്കാൻ ക്യുആർ കോഡ് സ്കാൻ ചെയ്യേണ്ടതില്ലെന്ന കാര്യവും ഓർക്കണം. സാധാരണയായി ക്യുആർ കോഡ് സ്കാൻ ചെയ്യുന്നത് പണം നൽകുന്നതിനാണ്.
ALSO READ: 100 കടന്ന് ബീൻസും പയറും, വെളുത്തുള്ളിക്ക് 220..! അടുക്കള ബജറ്റിനെ ഞെട്ടിച്ച് പച്ചക്കറിവില
അതുപോലെ തന്നെ, പണം നൽകുന്നതിന് മുമ്പ് തുകയും പരിശോധിക്കണം. തെറ്റായ തുക നൽകാതിരിക്കാൻ പണം നൽകുന്നതിനുള്ള അവസാന ഘട്ടത്തിൽ തുകയും പണം ലഭിക്കുന്ന വ്യക്തിയുടെയോ സ്ഥാപനത്തിന്റെയോ വിവരങ്ങളും ഒരിക്കൽ കൂടി പരിശോധിക്കണം. പരിചയമില്ലാത്ത കണ്ണികൾ തുറക്കുകയോ മറ്റൊരാൾ ആവശ്യപ്പെട്ടതിന്റെ പേരിൽ രഹസ്യ തിരിച്ചറിയൽ നമ്പർ നൽകുകയോ ചെയ്യരുത്. പണം സ്വീകരിക്കുന്നതിനായി രഹസ്യ തിരിച്ചറിയൽ നമ്പർ നൽകേണ്ടതില്ലെന്നും ഉപയോക്താക്കൾ മനസ്സിലാക്കണം.
ഡിജിറ്റൽ പണമിടപാടുകൾ കൂടുതൽ സാധാരണമായിക്കൊണ്ടിരിക്കുന്ന സാഹചര്യത്തിൽ ചെറിയൊരു അശ്രദ്ധ പോലും സാമ്പത്തിക നഷ്ടത്തിന് കാരണമാകാം. അതിനാൽ ക്യുആർ കോഡ് കണ്ടാൽ ഉടൻ സ്കാൻ ചെയ്യുന്നതിന് പകരം ആരുടേതാണ്, എന്തിനാണ്, എത്ര രൂപയാണ് നൽകുന്നത് എന്നിവ ഉറപ്പാക്കിയ ശേഷം മാത്രം ഇടപാട് പൂർത്തിയാക്കുന്നതാണ് സുരക്ഷിതമായ രീതി. ഏതാനും സെക്കൻഡ് ശ്രദ്ധിച്ചാൽ തന്നെ വലിയൊരു പിഴവ് ഒഴിവാക്കാനാകും.
