സാലഡായും വെറുതെ കഴിക്കാനും നമുക്കെല്ലാം ഒരുപോലെ പ്രിയപ്പെട്ടതാണ് കുക്കുമ്പർ. എന്നാൽ കടയിൽ നിന്ന് വാങ്ങിക്കൊണ്ടുവരുന്ന കക്കിരിക്ക മുറിച്ചു നോക്കുമ്പോൾ കയ്പ്പുണ്ടെങ്കിൽ വലിയ നിരാശയാകും ഫലം. കയ്പ്പില്ലാത്തതും ഫ്രഷ് ആയതുമായ കുക്കുമ്പർ എങ്ങനെ തിരിച്ചറിയാം, ചില ലളിതമായ കാര്യങ്ങൾ ശ്രദ്ധിച്ചാൽ മതി.
നിറം നോക്കാം
നല്ല കടും പച്ച നിറമുള്ളവ തിരഞ്ഞെടുക്കാൻ ശ്രദ്ധിക്കുക. തൊലിപ്പുറത്ത് മഞ്ഞ നിറത്തിലുള്ള പാടുകളോ മങ്ങിയ നിറമോ കാണുന്നുണ്ടെങ്കിൽ അവ അധികം പഴുത്തതോ കേടായതോ ആകാൻ സാധ്യതയുണ്ട്.
ആകൃതിയും വലുപ്പവും
വളരെയധികം തടിച്ചതോ വളഞ്ഞതോ ആയ കുക്കുമ്പർ ഒഴിവാക്കാം. ഇത്തരം കുക്കുമ്പറുകളിൽ വിത്തുകൾ അധികമുണ്ടാകാൻ സാധ്യതയുണ്ട്, ഇത് കയ്പ്പ് കൂടാൻ കാരണമാകും. അധികം വണ്ണമില്ലാത്ത, നേർരേഖയിലുള്ളവയാണ് മികച്ചത്.
Also Read: റോഡിലോടുന്ന ആഡംബരക്കപ്പൽ; 26 ചക്രങ്ങൾ, ഹെലിപാഡ്, നീന്തൽക്കുളം! ഈ 100 അടി അത്ഭുതത്തെക്കുറിച്ചറിയാമോ?
തൊട്ടുനോക്കുമ്പോൾ ഉറപ്പ് വേണം
കുക്കുമ്പർ കൈകൊണ്ട് പതുക്കെ അമർത്തി നോക്കുക. നല്ല ഉറപ്പുള്ളവയാകണം തിരഞ്ഞെടുക്കേണ്ടത്. വല്ലാതെ മൃദുവാണെങ്കിൽ അത് കേടായി തുടങ്ങിയതാകാം. എന്നാൽ കല്ലുപോലെ കട്ടിയുള്ളവയാണെങ്കിൽ അവ പഴകിയതും കയ്പ്പുള്ളതുമാകാൻ സാധ്യതയുണ്ട്.
ചുളിവുകൾ ശ്രദ്ധിക്കൂ
തൊലിപ്പുറം ചുക്കിചുളിഞ്ഞതോ വാടിയതോ ആണെങ്കിൽ അത് ഒഴിവാക്കുക. ഇത്തരം കുക്കുമ്പർ ജലാംശം നഷ്ടപ്പെട്ടതും സ്വാദില്ലാത്തതുമായിരിക്കും. നല്ല തിളക്കമുള്ളതും മാർദ്ദവമുള്ളതുമായ തൊലിയുള്ളവ വാങ്ങുക.
ഗന്ധം നോക്കാം
ഫ്രഷ് കുക്കുമ്പറിന് പ്രത്യേകമായ ഒരു സുഗന്ധമുണ്ടാകും. എന്തെങ്കിലും തരത്തിലുള്ള പുളിപ്പോ അല്ലെങ്കിൽ രൂക്ഷഗന്ധമോ തോന്നുകയാണെങ്കിൽ അത് കേടായതാണെന്ന് ഉറപ്പിക്കാം.
ഇനി കുക്കുമ്പർ വാങ്ങാൻ പോകുമ്പോൾ ഈ കാര്യങ്ങൾ ഒന്ന് പരീക്ഷിച്ചു നോക്കൂ. കയ്പ്പുള്ള കുക്കുമ്പർ വാങ്ങി പണം കളയേണ്ടി വരില്ല!
