ഡല്‍ഹി: ആപ്പിള്‍ കമ്പനി അവരുടെ ഏറ്റവും സ്ലിം ആയ ഐഫോണ്‍ 2025ല്‍ പുറത്തിറക്കുമെന്ന് റിപ്പോര്‍ട്ട്. ഐഫോണ്‍ 17 എയര്‍/സ്ലിം എന്നീ പേരുകള്‍ ഈ ഫോണ്‍ മോഡലിന് പറഞ്ഞുകേള്‍ക്കുന്നു. എന്നാല്‍ നിലവിലെ സാഹചര്യത്തില്‍ ഈ ഫോണ്‍ ഇന്ത്യക്കാരെ അത്ര സന്തോഷിപ്പിക്കാനിടയില്ല എന്ന് ഹിന്ദുസ്ഥാന്‍ ടൈംസിന്റെ റിപ്പോര്‍ട്ടില്‍ പറയുന്നു.
അഞ്ചിനും ആറിനും ഇടയില്‍ മില്ലീമിറ്ററായിരിക്കും ഐഫോണ്‍ 17 എയര്‍/സ്ലിം ഫോണിന്റെ കട്ടി എന്നാണ് സൂചന. ഫോണിന് ഇത്രത്തോളം കട്ടി കുറയുന്നതോടെ ഫിസിക്കല്‍ സിം ട്രേ ഡിവൈസില്‍ നിന്ന് ഒഴിവാകാന്‍ സാധ്യതയുണ്ട്. ഇങ്ങനെ സംഭവിച്ചാല്‍ അത് ഏറ്റവും കൂടുതല്‍ നിരാശപ്പെടുത്തുക ഇന്ത്യക്കാരെയാവും. ഐഫോണില്‍ നിന്ന് സിം ട്രേ ഒഴിവാക്കുന്നത് അമേരിക്കന്‍ ഉപഭോക്താക്കളെ ഒരിക്കലും പ്രതികൂലമായി ബാധിക്കില്ല. യുഎസില്‍ ഇതിനകം ഇ-സിം മാത്രമുള്ള ഐഫോണുകള്‍ വ്യാപകമാണ്.
ഫോണിലെ ഫിസിക്കല്‍ സിം സ്ലോട്ടുമായി ഇന്ത്യക്കാര്‍ ഏറെ പൊരുത്തപ്പെട്ടുകഴിഞ്ഞു. പ്രൈമറി സിം, സെക്കന്‍ഡറി സിം മാതൃകയില്‍ നെറ്റ് വർക്കുകൾ മാറി മാറി ഉപയോഗിക്കുന്നത് ഇന്ത്യക്കാരുടെ ശീലമാണ്. അങ്ങനെയുള്ള ഒരു വിപണിയില്‍ ഇ-സിം മാത്രം അനുവദിക്കുന്ന ഐഫോണ്‍ 17 എയര്‍/സ്ലിം വന്നാലത് ഉപഭോക്താക്കള്‍ക്ക് പുതിയൊരു അനുഭവമായിരിക്കും.
Also Read: സൂര്യനെ കൈപ്പിടിയിലൊതുക്കി ഇന്ത്യ
ഡുവല്‍ സിം ഇന്ത്യന്‍ സ്മാര്‍ട്ട്‌ഫോണ്‍ യൂസര്‍മാര്‍ ഏറെ ആഗ്രഹിക്കുന്ന ഫീച്ചറാണ്. ആപ്പിള്‍ ഐഫോണുകളില്‍ ഒരു സ്ലോട്ടില്‍ ഫിസിക്കല്‍ സിമ്മും മറ്റൊന്നില്‍ ഇ-സിമ്മും ഉള്‍പ്പെടുത്തിയാണ് ഇത് സാധ്യമാക്കുന്നത്. എന്നാല്‍ ഫിസിക്കല്‍ സിം ട്രേ ഇല്ലാത്ത ഐഫോണ്‍ ഇന്ത്യയിലെത്തിയാല്‍ അതിനോട് വേഗം പൊരുത്തപ്പെടാന്‍ ഇവിടെയുള്ള യൂസര്‍മാര്‍ക്കായേക്കില്ല എന്ന് ഹിന്ദുസ്ഥാന്‍ ടൈംസിന്റെ വാര്‍ത്തയില്‍ വിശദമാക്കുന്നു.
