ന്യൂഡൽഹി: രണ്ട് ദിവസം നീണ്ട് നിൽക്കുന്ന സിപിഐഎം പോളിറ്റ് ബ്യൂറോ യോഗത്തിന് ഇന്ന് ഡൽഹിയിൽ തുടക്കം. പ്രകാശ് കാരാട്ട് പാർട്ടി കോർഡിനേറ്റർ സ്ഥാനം ഏറ്റെടുത്ത ശേഷം നടക്കുന്ന രണ്ടാമത്തെ പൂർണ്ണ പോളിറ്റ് ബ്യൂറോ യോഗമാണ് ഇന്ന് നടക്കുന്നത്. കേരളത്തിലെ ഉപതിരഞ്ഞെടുപ്പ് ഫലം സംബന്ധിച്ചും മഹാരാഷ്ട്ര ജാർഖണ്ഡ് നിയമസഭാ തിരഞ്ഞെടുപ്പ് ഫലങ്ങൾ വിശകലനം ചെയ്തുള്ള ചർച്ചയുമാണ് ഇന്ന് ഉണ്ടാകുക.
കേരളത്തിലെ ഉപതിരഞ്ഞെടുപ്പ് ഫലം സംബന്ധിച്ച അവലോകനം സംസ്ഥാന സെക്രട്ടറി എം വി ഗോവിന്ദൻ പോളിറ്റ് ബ്യൂറോ യോഗത്തിൽ റിപ്പോർട്ട് ചെയ്യും. താഴെ തട്ടിലെ പാർട്ടി സമ്മേളനങ്ങൾ സംബന്ധിച്ച് സംസ്ഥാന സെക്രട്ടറിയേറ്റ് വിലയിരുത്തിയ റിപ്പോർട്ടും എം വി ഗോവിന്ദൻ യോഗത്തിൽ അവതരിപ്പിക്കും.
Also Read: എ കെ ഷാനിബ് ഡിവൈഎഫ്ഐയിലേയ്ക്ക്
യോഗത്തിൽ മുഖ്യമന്ത്രി പിണറായി വിജയന് പുറമെ കേരളത്തിൽ നിന്നുള്ള എം എ ബേബി, എ വിജയരാഘവൻ എന്നിവരും പങ്കെടുക്കും. ജാർഖണ്ഡിൽ ഇന്ത്യാ സഖ്യത്തിൽ നിന്ന് മാറി തനിച്ച് മത്സരിക്കാനുള്ള തീരുമാനം തിരിച്ചടിയായി എന്ന സംസ്ഥാന സെക്രട്ടറിയേറ്റിൻ്റെ റിപ്പോർട്ടും യോഗം ചർച്ച ചെയ്യും.
