ആലപ്പുഴ: ദേശീയ ആരോഗ്യ ദൗത്യത്തിന് പിന്നാലെ ആരോഗ്യ മേഖലയിലെ മറ്റൊരു സ്ഥാപനത്തിലും കരാർ ജീവനക്കാരെ മാറ്റാനുള്ള നീക്കം. കേരള സ്റ്റേറ്റ് ഹെൽത്ത് സിസ്റ്റം റിസോഴ്‌സ് സെന്റർ (എസ്.എച്ച്.എസ്.ആർ.സി.-കെ.)യിൽ കരാർ അടിസ്ഥാനത്തിൽ ജോലി ചെയ്യുന്നവരുടെ കാലാവധി ഒരുവർഷത്തിൽനിന്ന് രണ്ടുമാസമാക്കി ചുരുക്കി. നിലവിലുള്ള ജീവനക്കാരുടെ കരാർ രണ്ടുമാസത്തേക്ക് കൂടി നീട്ടിയിരിക്കുന്നത് സ്ഥാപനത്തിന്റെ പ്രവർത്തനം തടസ്സപ്പെടാതിരിക്കാനാണ്. ഇതിനിടെ പുതിയ ഉദ്യോഗാർഥികളുടെ പാനൽ തയ്യാറാക്കി ഒരുവർഷത്തേക്ക് നിയമിക്കാനുള്ള നടപടികളും ആരംഭിച്ചു.
നിയമനം മെറിറ്റ് അടിസ്ഥാനത്തിലായിരിക്കുമെന്ന് അവകാശപ്പെടുന്നുണ്ടെങ്കിലും ഭരണപക്ഷ അനുഭാവികളെ ഉൾപ്പെടുത്തുകയാണ് ലക്ഷ്യമെന്നാണ് വിവരം. അപേക്ഷ ക്ഷണിക്കൽ, പാനൽ തയ്യാറാക്കൽ, യോഗ്യരായവരെ തിരഞ്ഞെടുക്കൽ, നിയമനം എന്നിവ രണ്ടുമാസത്തിനകം പൂർത്തിയാക്കും. ആരോഗ്യനയം രൂപവത്കരിക്കൽ, ആരോഗ്യസംവിധാനം മെച്ചപ്പെടുത്തുന്നതിനുള്ള പദ്ധതികൾ ആസൂത്രണം ചെയ്യൽ, സാങ്കേതിക സഹായം നൽകൽ, പഠനങ്ങളും ഗവേഷണങ്ങളും നടത്തൽ തുടങ്ങിയ നിർണായക പ്രവർത്തനങ്ങൾക്ക് നേതൃത്വം നൽകുന്ന സ്ഥാപനമാണ് എസ്.എച്ച്.എസ്.ആർ.സി.-കെ.
ALSO READ:ഗ്രന്ഥശാലയിൽ ഇനി പുസ്തകം തിരയാൻ അലച്ചിൽ വേണ്ട..! സംസ്ഥാനത്തെ 3,286 ലൈബ്രറികൾ ഡിജിറ്റലിലേക്ക്
പുതിയ പാനൽ, പഴയ ജീവനക്കാർ പുറത്ത്?
എസ്.എച്ച്.എസ്.ആർ.സി.-കെയിൽ ഇടത് അനുഭാവികളായവർ തുടരുന്നത് യു.ഡി.എഫ്. സർക്കാരിന് ഗുണകരമല്ലെന്ന വിലയിരുത്തലിന്റെ അടിസ്ഥാനത്തിലാണ് നിലവിലുള്ളവരെ മാറ്റാനുള്ള നീക്കമെന്നാണ് ആരോപണം. അതേസമയം, പുസ്തകപരമായും സ്ഥാപനപരമായും പ്രവർത്തനം തുടരാൻ ആവശ്യമായ ജീവനക്കാരെ നിലനിർത്തുന്നതിനാണ് രണ്ടുമാസത്തെ അധിക കാലാവധി നൽകിയതെന്നാണ് വ്യക്തമാകുന്നത്. പുതിയ നിയമനത്തിലേക്ക് നീങ്ങുമ്പോൾ മെറിറ്റിനാണ് മുൻഗണനയെന്ന അവകാശവാദവും നിലനിൽക്കുന്നു.
ആരോഗ്യമേഖലയിലെ കരാർ ജീവനക്കാരുമായി ബന്ധപ്പെട്ട മാറ്റങ്ങൾ ഇതോടെ കൂടുതൽ സ്ഥാപനങ്ങളിലേക്ക് വ്യാപിക്കുകയാണ്. എൻ.എച്ച്.എം. ജീവനക്കാരുടെ കരാർ കാലാവധി നേരത്തേ രണ്ടുമാസമാക്കി ചുരുക്കിയിരുന്നു. നിലനിർത്തേണ്ടവരുടെയും ഒഴിവാക്കേണ്ടവരുടെയും പട്ടിക തയ്യാറാക്കുന്ന നടപടികൾ എൻ.എച്ച്.എമ്മിൽ തുടരുകയാണ്. ആയുഷ് മിഷനിലും നേരത്തെ തന്നെ പിരിച്ചുവിടൽ ആരംഭിച്ചിരുന്നു. ഇതിന് പിന്നാലെയാണ് എസ്.എച്ച്.എസ്.ആർ.സി.-കെയിലെ ജീവനക്കാരുടെ കരാർ കാലാവധിയും ചുരുക്കിയിരിക്കുന്നത്.
