തന്ത്രപ്രധാനമായ ഹോർമുസ് കടലിടുക്കിൽ തകർന്ന എണ്ണ ടാങ്കറിനെച്ചൊല്ലി അമേരിക്കയും ഇറാനും തമ്മിൽ വീണ്ടും വാക്പോര് രൂക്ഷമാകുന്നു. സ്വന്തം മൈനുകളിൽ തട്ടിയാണ് പനാമ പതാകയുള്ള ‘എൽ ഗയ’ എന്ന ടാങ്കർ പൊട്ടിത്തെറിച്ചതെന്ന ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ അവകാശവാദം യുഎസ് സെൻട്രൽ കമാൻഡ് ശക്തമായി തള്ളി. ഇറാനിയൻ മിസൈലും ഡ്രോണും പതിച്ചാണ് കപ്പലിന് കേടുപാടുകൾ സംഭവിച്ചതെന്നും, ഇറാന്റെ നുണകളും ഭീഷണികളും മറച്ചുവെക്കാനാണ് ഇല്ലാത്ത കഥകൾ പ്രചരിപ്പിക്കുന്നതെന്നും അമേരിക്കൻ സൈന്യം കുറ്റപ്പെടുത്തി. കപ്പലിലുണ്ടായിരുന്ന 14 ഇന്ത്യൻ ജീവനക്കാരിൽ 13 പേരെ രക്ഷപ്പെടുത്തിയതായും അവശേഷിക്കുന്ന ഒരാൾക്കായി തിരച്ചിൽ തുടരുകയാണെന്നും വിദേശകാര്യ മന്ത്രാലയം വ്യക്തമാക്കി.
ഹോർമുസ് കടലിടുക്കിലെ അന്താരാഷ്ട്ര ജലാശയത്തിൽ നിന്ന് ഭീഷണിയുയർത്തിയ മുഴുവൻ മൈനുകളും നീക്കം ചെയ്തതായും വാണിജ്യ കപ്പലുകൾക്ക് ആവശ്യമായ സുരക്ഷ ഉറപ്പാക്കിയിട്ടുണ്ടെന്നുംഅമേരിക്കൻ പ്രസിഡന്റ് ഡോണൾഡ് ട്രംപ് പ്രഖ്യാപിച്ചതിന് തൊട്ടുപിന്നാലെയാണ് ഈ ദുരന്തം നടന്നിരിക്കുന്നത്. തങ്ങളുടെ സൈനിക അകമ്പടിയോടെ ജലപാതയിലൂടെയുള്ള എണ്ണ വിതരണം പുനഃസ്ഥാപിച്ചുവെന്നും, മുൻപത്തെ ഒഴുക്കിന്റെ മൂന്നിൽ രണ്ട് ഭാഗം ഘട്ടങ്ങളിലായി തിരികെ കൊണ്ടുവരാൻ സാധിച്ചുവെന്നും അമേരിക്കൻ ഊർജ്ജ മന്ത്രാലയവും അവകാശപ്പെടുന്നു. എന്നാൽ, മേഖലയുടെ പൂർണ്ണ നിയന്ത്രണം ഇപ്പോഴും തങ്ങളുടെ കൈകളിലാണെന്ന് വ്യക്തമാക്കിയ ഇറാൻ, അമേരിക്കൻ വിലയിരുത്തലുകൾ തള്ളിക്കളയുകയും സ്വന്തമായി പുതിയ ഷിപ്പിംഗ് നിയന്ത്രണങ്ങൾ പ്രഖ്യാപിക്കുകയും ചെയ്തു.
Also Read: ട്രംപിന്റെ കടിഞ്ഞാൺ അറുത്ത് യുഎസ് സുപ്രീം കോടതി! തപാൽ വോട്ടിംഗിൽ തിരിച്ചടി; പ്ലാൻ പൊളിഞ്ഞു
അമേരിക്കയുടെ അവകാശവാദങ്ങൾക്ക് വിരുദ്ധമായി, കടലിടുക്കിലൂടെയുള്ള ആഗോള എണ്ണ-വാതക ഗതാഗതം ഇപ്പോഴും സാധാരണ നിലയിലല്ലെന്നാണ് ഏറ്റവും പുതിയ ഷിപ്പിംഗ് ഡാറ്റകൾ സൂചിപ്പിക്കുന്നത്. ഫെബ്രുവരിയിൽ അമേരിക്കയും ഇസ്രയേലും ചേർന്ന് ഇറാനെതിരെ യുദ്ധം ആരംഭിക്കുന്നതിന് മുൻപ് പ്രതിദിനം നൂറിലധികം കപ്പലുകൾ ഇതുവഴി സഞ്ചരിച്ചിരുന്ന സ്ഥാനത്ത് കഴിഞ്ഞ വാരാന്ത്യത്തിൽ ഈ സംഖ്യ ഒറ്റ അക്കത്തിലേക്ക് കുത്തനെ കൂപ്പുകുത്തി. ഇറാന്റെ അനുമതിയില്ലാതെ നിശ്ചിത റൂട്ടുകൾ ഉപയോഗിക്കുന്ന കപ്പലുകൾക്ക് ഇറാൻ കടുത്ത മുന്നറിയിപ്പ് നൽകിയതും കപ്പൽ ഉടമകളെ ഭീതിയിലാഴ്ത്തിയിട്ടുണ്ട്.
ലോകത്തിലെ ആകെ എണ്ണ വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന ഹോർമുസ് കടലിടുക്കിലെ സംഘർഷാവസ്ഥയും, സൗദി ഊർജ്ജ നിലയങ്ങൾക്ക് നേരെയുണ്ടാകുന്ന ആക്രമണങ്ങളും ആഗോള സാമ്പത്തിക രംഗത്തെ വീണ്ടും അനിശ്ചിതത്വത്തിലാക്കുകയാണ്. കടൽമാർഗ്ഗമുള്ള ഗതാഗത തടസ്സങ്ങൾ കാരണം ആഗോള വിപണിയിൽ എണ്ണവില കുതിച്ചുയരുകയും ബ്രെന്റ് ക്രൂഡ് ഓയിൽ വില ബാരലിന് 107.82 ഡോളറിലേക്ക് എത്തുകയും ചെയ്തു. ചരക്കുകപ്പലുകൾക്ക് നേരെയുള്ള ഇത്തരം ആക്രമണങ്ങൾ വരും ദിവസങ്ങളിലും അന്താരാഷ്ട്ര വിപണിയിൽ വലിയ രീതിയിലുള്ള പണപ്പെരുപ്പത്തിന് കാരണമായേക്കും.
