ആഴക്കടല്‍ ഖനനത്തിലെ ദോഷവശങ്ങളെക്കുറിച്ചോ അതുണ്ടാക്കുന്ന ഭവിഷ്യത്തുകളെക്കുറിച്ചോ ശരിയായ പഠനമോ മുന്‍ അനുഭവങ്ങളോ പരിചയമോ ഇല്ലാത്തതുകൊണ്ടാണ് അന്താരാഷ്ട്രതലത്തില്‍ ആഴക്കടലില്‍ ഖനനം നടത്താന്‍ ഐ.എസ്.എ. അനുമതി നല്‍കാത്തത്. എന്നാല്‍ സാമ്പത്തികമായി ലാഭകരമായ ആഴക്കടല്‍ ഖനന രീതി വിപുലീകരിക്കുന്നതിനുള്ള എക്‌സിക്യൂട്ടീവ് ഉത്തരവില്‍ അമേരിക്കന്‍ പ്രസിഡന്റ് ഡോണള്‍ഡ് ട്രംപ് ഒപ്പുവെച്ചിരിക്കുകയാണ്. ട്രംപ് സ്വകാര്യമായി ഒപ്പുവെച്ച ഉത്തരവ്, നിര്‍ണായക ധാതു വ്യവസായത്തിന്മേലുള്ള ചൈനയുടെ വ്യാപകമായ നിയന്ത്രണം നികത്തുന്നതിനുള്ള നീക്കത്തിന്റെ ഭാഗമായി, അമേരിക്കയിലെയും അന്താരാഷ്ട്ര ജലാശയങ്ങളിലെയും ഖനനം വേഗത്തില്‍ ആരംഭിക്കാന്‍ ആണ് ട്രംപ് ശ്രമിക്കുന്നത്. ആഴക്കടല്‍ ശാസ്ത്ര സാങ്കേതിക വിദ്യയിലും സമുദ്രാടിത്തട്ടിലെ ധാതു വിഭവങ്ങളിലും നേതൃത്വം നിലനിര്‍ത്തുന്നതില്‍ അമേരിക്കയ്ക്ക് ഒരു പ്രധാന ദേശീയ സുരക്ഷയും സാമ്പത്തിക താല്‍പ്പര്യവുമുണ്ടെന്ന് ട്രംപ് ഉത്തരവില്‍ പറയുന്നു.
Also Read: അമേരിക്കന്‍ താല്പര്യങ്ങള്‍ ആഫ്രിക്കയില്‍ നടപ്പില്ല, ചൈനയെ കൂട്ട്പിടിച്ച് കെനിയ
1980 ലെ ഡീപ് സീബഡ് ഹാര്‍ഡ് മിനറല്‍സ് റിസോഴ്സ് ആക്ട് പ്രകാരമുള്ള ഖനന അനുമതികള്‍ വേഗത്തിലാക്കാനും അമേരിക്കയുടെ ഔട്ടര്‍ കോണ്ടിനെന്റല്‍ ഷെല്‍ഫില്‍ പെര്‍മിറ്റുകള്‍ നല്‍കുന്നതിനുള്ള ഒരു പ്രക്രിയ സ്ഥാപിക്കാനും ഉത്തരവ് ഭരണകൂടത്തോട് നിര്‍ദ്ദേശിക്കുന്നു. ദേശീയ അധികാരപരിധിക്ക് പുറത്തുള്ള പ്രദേശങ്ങളിലെ കടല്‍ത്തീര ഖനന അനുമതികള്‍ വേഗത്തില്‍ പുനഃപരിശോധിക്കണമെന്നും ഉത്തരവിലുണ്ട്. ഇത് അന്താരാഷ്ട്ര സമൂഹവുമായി സംഘര്‍ഷത്തിന് കാരണമാകാന്‍ സാധ്യതയുണ്ട്. ആഴക്കടല്‍ ഖനനം കോടിക്കണക്കിന് മെട്രിക് ടണ്‍ വസ്തുക്കള്‍ സൃഷ്ടിക്കുമെന്നും അടുത്ത ദശകത്തില്‍ അമേരിക്കയുടെ സമ്പദ്വ്യവസ്ഥയില്‍ 300 ബില്യണ്‍ ഡോളറും 100,000 തൊഴിലവസരങ്ങളും അധികം നല്‍കുമെന്നും ഭരണകൂടം പറയുന്നു. സമുദ്രത്തിന്റെ അടിത്തട്ടിലെ വ്യാവസായിക പ്രവര്‍ത്തനങ്ങള്‍ മാറ്റാനാവാത്ത ജൈവവൈവിധ്യ നഷ്ടത്തിന് കാരണമാകുമെന്ന് മുന്നറിയിപ്പ് നല്‍കി.
എല്ലാ ആഴക്കടല്‍ ഖനന പ്രവര്‍ത്തനങ്ങളും നിരോധിക്കണമെന്നാണ് പരിസ്ഥിതി സംഘടനകള്‍ ഉന്നയിക്കുന്ന ആവശ്യം. മനുഷ്യരാശിയുടെ പൊതു പൈതൃകം നശിപ്പിക്കാനും, കോര്‍പ്പറേറ്റ് ലാഭത്തിനായി ആഴക്കടല്‍ ഖനനം ചെയ്യാനും ഒരു വ്യവസായത്തെയും ഏകപക്ഷീയമായി അനുവദിക്കാന്‍ അമേരിക്കന്‍ സര്‍ക്കാരിന് അവകാശമില്ല എന്നാണ് അവര്‍ പറയുന്നത്. 4,000 മുതല്‍ 6,000 മീറ്റര്‍ വരെ ആഴത്തില്‍ നിന്നുള്ള പോളിമെറ്റാലിക് നോഡ്യൂളുകള്‍ പോലുള്ള വിഭവങ്ങളെയാണ് ആഴക്കടല്‍ ഖനനം ലക്ഷ്യമിടുന്നത്. പ്രതിരോധം, ബഹിരാകാശം, ഊര്‍ജ്ജം, സാങ്കേതിക വ്യവസായങ്ങള്‍ എന്നിവ ഉപയോഗിക്കുന്ന മാംഗനീസ്, ഇരുമ്പ്, കൊബാള്‍ട്ട്, ചെമ്പ്, നിക്കല്‍ എന്നിവയുള്‍പ്പെടെയുള്ള നിര്‍ണായക വസ്തുക്കള്‍ നോഡ്യൂളുകളില്‍ അടങ്ങിയിരിക്കുന്നു. അമേരിക്കയുടെ ഏറ്റവും വലിയ വ്യാപാര പങ്കാളികളില്‍ ഒന്നായ ചൈനയെ വ്യവസായം അമിതമായി ആശ്രയിക്കുന്നതിനാല്‍ നിര്‍ണായക ധാതുക്കളിലേക്കുള്ള പ്രവേശനം കൂടുതല്‍ രാഷ്ട്രീയവല്‍ക്കരിക്കപ്പെട്ടു.
‘ദേശീയ അധികാരപരിധിക്ക് പുറത്തുള്ള പ്രദേശങ്ങളില്‍ സമുദ്രതീര ധാതു പര്യവേക്ഷണ ലൈസന്‍സുകളും വാണിജ്യ വീണ്ടെടുക്കല്‍ പെര്‍മിറ്റുകളും അവലോകനം ചെയ്യുന്നതിനും നല്‍കുന്നതിനുമുള്ള പ്രക്രിയ വേഗത്തിലാക്കാന്‍’ ട്രംപിന്റെ എക്‌സിക്യൂട്ടീവ് ഉത്തരവ് വാണിജ്യ സെക്രട്ടറിക്ക് 60 ദിവസത്തെ സമയമാണ് നല്‍കുന്നത്. കടലിന്റെ അടിത്തട്ട് ഇപ്പോഴും താരതമ്യേന പര്യവേക്ഷണം ചെയ്യപ്പെടാത്ത ഒരു മേഖലയാണ്. ആഴക്കടല്‍ ഖനനത്തിന്റെ ആഘാതങ്ങളെക്കുറിച്ചോ അതുകൊണ്ടുണ്ടാകുന്ന പരിസ്ഥിതിക, സാമൂഹിക, ആരോഗ്യ പ്രശ്നങ്ങളെക്കുറിച്ചോ ഗൗരവമായ പഠനങ്ങള്‍ നടന്നിട്ടില്ല. ഐക്യരാഷ്ട്രസഭയോ ഐക്യരാഷ്ട്രസഭയുടെ ഇന്റര്‍നാഷണല്‍ സി ബെഡ് അതോറിറ്റിയോ (ഐ.എസ്.എ.) അന്താരാഷ്ട്ര ആഴക്കടല്‍ ഖനനത്തിനുള്ള അനുമതി നല്‍കിയിട്ടില്ല.
Donald Trump
ദക്ഷലക്ഷക്കണക്കിനു വിശിഷ്ടമായ ജൈവവൈവിധ്യങ്ങളുടെ നിലനില്‍പ്പിനെയും കടലിന്റെ ആവാസവ്യവസ്ഥയെയും ദോഷകരമായി ആഴക്കടല്‍ ഖനനം ബാധിക്കും. ആഴക്കടല്‍ ഖനനത്തിനുപയോഗിക്കുന്ന കൂറ്റന്‍ യന്ത്രങ്ങളും അതില്‍നിന്ന് പുറന്തള്ളുന്ന മാലിന്യവും ജൈവവൈവിധ്യത്തെ നശിപ്പിക്കും. വര്‍ഷങ്ങളായി ബാഹ്യ ഇടപെടലുകളില്ലാതെ തുടരുന്ന ആവാസവ്യവസ്ഥയിലേക്കുള്ള കടന്നുകയറ്റം സൂക്ഷ്മജീവികളെയും സസ്യങ്ങളെയും മത്സ്യങ്ങളെയും മാത്രമല്ല കടലിലെ തിമിംഗിലംപോലുള്ള വലുപ്പമേറിയ ജീവികളുടെയും നിലനില്‍പ്പിനെ പ്രതികൂലമായി ബാധിക്കും.യന്ത്രങ്ങളുടെ പ്രവര്‍ത്തനവും അതില്‍നിന്ന് പുറന്തള്ളുന്ന മാലിന്യവും കിലോമീറ്ററോളം കടലില്‍ വ്യാപിക്കുകയും ദോഷഫലങ്ങളുണ്ടാക്കുകയും ചെയ്യും. ഇത് മീനുകളുടെ വളര്‍ച്ചയ്ക്ക് ദോഷകരമാവുകയും, മത്സ്യസമ്പത്ത് കുറയുകയും ചെയ്യും.
Also Read: ഡിജിറ്റില്‍ പൊളിറ്റിക്‌സും, ഡിജിറ്റില്‍ ഡെമോക്രസിയും ലോകം ഭരിക്കുമ്പോള്‍ ..!
ആഴക്കടല്‍ ഖനനത്തിന് ഐക്യരാഷ്ട്രസഭയുടെ അന്താരാഷ്ട്ര സമുദ്രതട അതോറിറ്റി നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. എന്നാല്‍ അമേരിക്ക ഈ സംഘടനയില്‍ അംഗമല്ല. മാത്രമല്ല അതിന്റെ പ്രസക്തമായ കരാറുകള്‍ ഒരിക്കലും അംഗീകരിച്ചിട്ടുമില്ല. അന്താരാഷ്ട്ര നിയമപ്രകാരം, അമേരിക്കയ്ക്ക് അതിന്റെ പ്രാദേശിക ജലാതിര്‍ത്തിക്കുള്ളില്‍ കരയില്‍ നിന്ന് 200 കിലോമീറ്റര്‍ അകലെ ആഴക്കടല്‍ ഖനനം നടത്താനുള്ള അവകാശമുണ്ട്. എന്നിരുന്നാലും, ‘സമുദ്രാടിത്തട്ടിലെ ഖനന അനുമതി നല്‍കാന്‍ ഫെഡറല്‍ സര്‍ക്കാരിന് അധികാരം നല്‍കുന്ന 1980 ലെ അവ്യക്തമായ നിയമം’ നടപ്പിലാക്കിക്കൊണ്ട്, അന്താരാഷ്ട്ര ജലാതിര്‍ത്തികളിലേക്ക് ഖനനം വ്യാപിപ്പിക്കാന്‍ ട്രംപ് ശ്രമിക്കുന്നുണ്ടെന്ന് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്യുന്നു. പസഫിക് സമുദ്രത്തിലെ അമേരിക്കയുടെ പ്രദേശമായ അമേരിക്കന്‍ സമോവ ദ്വീപിനെ ലക്ഷ്യമിട്ടാണ് സമീപകാല ആഴക്കടല്‍ ഖനന ശ്രമങ്ങള്‍ നടന്നിരിക്കുന്നത്.
