കെഎസ്ആർടിസി ബസുകളിൽ സ്ത്രീകൾക്ക് സൗജന്യയാത്ര ഒരുക്കുന്ന സംസ്ഥാന സർക്കാരിന്റെ പ്രിയദർശിനി പദ്ധതിക്കെതിരെ സ്വകാര്യ ബസ് ഉടമകൾ നൽകിയ പരാതി തള്ളി കോമ്പറ്റീഷൻ കമ്മീഷൻ ഓഫ് ഇന്ത്യ. സർക്കാർ സ്വന്തം ഫണ്ട് ഉപയോഗിച്ച് നടപ്പാക്കുന്ന ക്ഷേമപദ്ധതികൾ കോമ്പറ്റീഷൻ നിയമത്തിന്റെ പരിധിയിൽ വരില്ലെന്നും പദ്ധതി നടപ്പാക്കുന്നത് സർക്കാരിന്റെ വിവേചനാധികാരമാണെന്നും കമ്മീഷൻ വ്യക്തമാക്കി. ഇതോടെ പ്രിയദർശിനി പദ്ധതിയെച്ചൊല്ലിയുള്ള പരാതിയിൽ സംസ്ഥാന സർക്കാരിനും കെഎസ്ആർടിസിക്കും ആശ്വാസമായി.
രണ്ട് സ്വകാര്യ ബസ് ഉടമകളാണ് പ്രിയദർശിനി പദ്ധതിക്കെതിരെ സിസിഐയെ സമീപിച്ചത്. എന്നാൽ പരാതി കോമ്പറ്റീഷൻ നിയമത്തിന്റെ പരിധിയിൽ വരുന്നതല്ലെന്ന് സിസിഐ ചെയർപേഴ്‌സൺ രവ്‌നീത് കൗർ, അംഗങ്ങളായ ശ്വേത കാക്കർ, ദീപക് അനുരാഗ് എന്നിവരടങ്ങിയ ബെഞ്ച് വ്യക്തമാക്കി. പൊതുജനങ്ങളുടെ ക്ഷേമത്തിനായി സ്വന്തം ഫണ്ട് ഉപയോഗിച്ച് ഇത്തരം പദ്ധതികൾ നടപ്പാക്കാൻ സർക്കാരിന് പൂർണ അധികാരമുണ്ടെന്നും ആ അധികാരത്തിൽ ഇടപെടാൻ കോമ്പറ്റീഷൻ കമ്മീഷൻ ഓഫ് ഇന്ത്യക്ക് സാധിക്കില്ലെന്നും ഉത്തരവിൽ ചൂണ്ടിക്കാട്ടി.
ALSO READ:റിയാസ് അന്ന് വീണയുടെ ഭർത്താവല്ലായിരുന്നു..! ‘എന്നെ അഴിമതിക്കാരനാക്കാനാകില്ലെന്ന് പിണറായി
പ്രിയദർശിനി പദ്ധതി നടപ്പാക്കിയതോടെ ബസ് സർവീസുകളിൽ നഷ്ടമുണ്ടായെന്നായിരുന്നു സ്വകാര്യ ബസ് ഉടമകളുടെ പരാതി. ഇതിന്റെ അടിസ്ഥാനത്തിലാണ് നിയമനടപടികളുമായി അവർ മുന്നോട്ടുപോയത്. എന്നാൽ പദ്ധതി സർക്കാർ നടപ്പാക്കുന്ന ക്ഷേമപദ്ധതിയാണെന്ന നിലപാടാണ് കമ്മീഷൻ സ്വീകരിച്ചത്. അതിനാൽ സ്വകാര്യ ബസ് ഉടമകളുടെ പരാതിയിൽ മുന്നോട്ടുപോകാൻ നിയമപരമായ അടിസ്ഥാനമില്ലെന്നും കമ്മീഷൻ വ്യക്തമാക്കി.
സിസിഐയുടെ ഈ തീരുമാനം പ്രിയദർശിനി പദ്ധതിയുമായി മുന്നോട്ടുപോകുന്ന സംസ്ഥാന സർക്കാരിനും കെഎസ്ആർടിസിക്കും ആശ്വാസം നൽകുന്നതാണ്. അതേസമയം, പദ്ധതി മൂലം സ്വകാര്യ ബസ് സർവീസുകൾക്ക് നഷ്ടമുണ്ടാകുന്നുവെന്ന വാദവുമായി നിയമനടപടികളുമായി മുന്നോട്ടുപോയ രണ്ട് ബസ് ഉടമകൾക്ക് കമ്മീഷന്റെ തീരുമാനം തിരിച്ചടിയായി.
