യാത്രക്കാരുടെ ആവശ്യാനുസരണം ലഭ്യമാകുന്ന ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റിയുടെ ‘ഓൺ ഡിമാൻഡ്’ ബസ് സർവീസ് കൂടുതൽ മേഖലകളിലേക്ക് വ്യാപിപ്പിച്ചു. അൽ സത്വ, അൽ ഖൂസ്, മിർദിഫ് എന്നീ മൂന്ന് പുതിയ മേഖലകൾ കൂടി ഉൾപ്പെടുത്തിയതോടെ ഈ സേവനം ലഭിക്കുന്ന ആകെ സ്ഥലങ്ങളുടെ എണ്ണം 20 ആയി ഉയർന്നു. ജനവാസ മേഖലകളെ പ്രധാന പൊതുഗതാഗത കേന്ദ്രങ്ങളുമായി ബന്ധിപ്പിക്കുന്നതിനാണ് ആർ.ടി.എ ഈ സംവിധാനം ഒരുക്കിയിരിക്കുന്നത്.
2026-ന്റെ ആദ്യ പകുതിയിൽ മാത്രം 5,27,000 പേരാണ് ഈ സർവീസ് പ്രയോജനപ്പെടുത്തിയത്; മുൻവർഷത്തെ അപേക്ഷിച്ച് 25.1 ശതമാനത്തിന്റെ വർധനവാണിത്. നിലവിൽ 55 ബസുകൾ സർവീസ് നടത്തുന്ന ഈ സംവിധാനം ഉപയോഗിക്കാൻ ‘ദുബായ് ബസ് ഓൺ ഡിമാൻഡ്’ ആപ്പ് ഡൗൺലോഡ് ചെയ്ത് ബുക്ക് ചെയ്യാവുന്നതാണ്. ക്രെഡിറ്റ്, ഡെബിറ്റ്, നോൽ കാർഡുകൾ വഴി യാത്രാക്കൂലി അടയ്ക്കാനും സാധിക്കും.
