2026-ലെ കേന്ദ്ര ബജറ്റിൽ മധ്യവർഗ നികുതിദായകർക്ക് വലിയ നികുതിയിളവുകൾ ലഭിച്ചില്ലെങ്കിലും, പ്രായോഗികമായ ചില മാറ്റങ്ങൾ ആശ്വാസമാകുന്നു. നികുതി ഘടനയിൽ മാറ്റം വരുത്തുന്നതിന് പകരം നടപടിക്രമങ്ങൾ ലളിതമാക്കുന്നതിലാണ് ഇത്തവണ ശ്രദ്ധ നൽകിയിരിക്കുന്നത്. മധ്യവർഗക്കാർ അറിഞ്ഞിരിക്കേണ്ട പ്രധാന അഞ്ച് പ്രഖ്യാപനങ്ങൾ താഴെ നൽകുന്നു.
നികുതി ഇളവുകൾ തുടരും
പുതിയ നികുതി വ്യവസ്ഥയ്ക്ക് കീഴിലുള്ള ആദായനികുതി സ്ലാബുകളിൽ മാറ്റമില്ല. ഇത് പ്രകാരം 12 ലക്ഷം രൂപ വരെ വാർഷിക വരുമാനമുള്ള ശമ്പളക്കാർക്കും പെൻഷൻകാർക്കും നികുതി നൽകേണ്ടി വരില്ല. പഴയ നികുതി വ്യവസ്ഥ സ്വീകരിക്കുന്നവർക്കും നിലവിലുള്ള ആനുകൂല്യങ്ങൾ മാറ്റമില്ലാതെ തുടരും.
ഐടിആർ പുതുക്കാൻ കൂടുതൽ സമയം
ആദായനികുതി റിട്ടേണിലെ തെറ്റുകൾ തിരുത്തി പുതുക്കിയ റിട്ടേൺ ഫയൽ ചെയ്യാനുള്ള സമയം 9 മാസത്തിൽ നിന്ന് 12 മാസമായി വർദ്ധിപ്പിച്ചു. എന്നാൽ ഒമ്പത് മാസത്തിന് ശേഷം ഫയൽ ചെയ്യുന്ന റിട്ടേണുകൾക്ക് പിഴ ഈടാക്കും. 5 ലക്ഷം രൂപ വരെ വരുമാനമുള്ളവർക്ക് 1,000 രൂപയും അതിന് മുകളിലുള്ളവർക്ക് 5,000 രൂപയുമാണ് പിഴ.
Also Read: വീട്ടിലിരുന്ന് ലക്ഷങ്ങൾ നേടാം; ഓൺലൈൻ ബിസിനസ് തുടങ്ങാൻ ഈ കാര്യങ്ങൾ അറിഞ്ഞിരിക്കണം!
വിദേശ യാത്രകൾക്ക് കുറഞ്ഞ ടിസിഎസ്
വിദേശ ടൂർ പാക്കേജുകൾ ബുക്ക് ചെയ്യുന്നവർക്ക് വലിയ ആശ്വാസമാണ് ഈ പ്രഖ്യാപനം. മുൻപ് 10 ലക്ഷത്തിന് മുകളിലുള്ള പാക്കേജുകൾക്ക് 20% ടിസിഎസ് നൽകണമായിരുന്നു. ഇനി മുതൽ തുക എത്രയായാലും 2% എന്ന ഏകീകൃത ടിസിഎസ് മാത്രമേ ഈടാക്കൂ. ഇത് വിദേശ യാത്രകൾക്കുള്ള മുൻകൂർ ചിലവ് കുറയ്ക്കാൻ സഹായിക്കും.
വിദേശത്തെ പഠനത്തിനും ചികിത്സയ്ക്കും ഇളവ്
വിദ്യാഭ്യാസ വായ്പകൾ അല്ലാത്ത വിദേശ പഠന ആവശ്യങ്ങൾക്കും മെഡിക്കൽ ചികിത്സയ്ക്കുമായി പണം വിദേശത്തേക്ക് അയക്കുമ്പോൾ ഈടാക്കുന്ന ടിസിഎസ് നിരക്ക് 5 ശതമാനത്തിൽ നിന്ന് 2 ശതമാനമായി കുറച്ചു. വാർഷിക പരിധി 10 ലക്ഷമായി തുടരും. ഇത് പഠനത്തിനും ചികിത്സയ്ക്കുമായി പണം കണ്ടെത്തുന്ന കുടുംബങ്ങൾക്ക് വലിയ ആശ്വാസമാകും.
അപകട നഷ്ടപരിഹാരത്തിന് നികുതിയില്ല
മോട്ടോർ വാഹന അപകട നഷ്ടപരിഹാരമായി ലഭിക്കുന്ന തുകയുടെ പലിശയ്ക്ക് ഇനി ആദായനികുതി നൽകേണ്ടതില്ല. മുൻപ് ഇതിന് ടിഡിഎസ് ബാധകമായിരുന്നു. പുതിയ നിയമപ്രകാരം ഇത്തരം പലിശ വരുമാനത്തിന് പൂർണ്ണ നികുതി ഇളവ് ലഭിക്കും.
