ഇന്നത്തെ കാലത്ത് ജീവിതശൈലീ രോഗങ്ങളിൽ പ്രധാന വില്ലനായി മാറിയിരിക്കുകയാണ് രക്തസമ്മർദ്ദം അഥവാ ഹൈപ്പർടെൻഷൻ. ഇത് പിന്നീട് ഹൃദയാഘാതം, പക്ഷാഘാതം തുടങ്ങിയ ഗുരുതരമായ ആരോഗ്യപ്രശ്നങ്ങളിലേക്ക് നയിക്കുന്നു. ടെൻഷൻ, ഉറക്കക്കുറവ് തുടങ്ങിയ ഘടകങ്ങൾ രക്തസമ്മർദ്ദം വർദ്ധിപ്പിക്കുന്നതിൽ പ്രധാന പങ്കുവഹിക്കുന്നുണ്ട്. എന്നാൽ ചിട്ടയായ വ്യായാമത്തിലൂടെയും ഭക്ഷണക്രമത്തിലൂടെയും ഈ അവസ്ഥയെ ഒരു പരിധിവരെ നിയന്ത്രിക്കാൻ സാധിക്കുമെന്ന് ആരോഗ്യവിദഗ്ധർ ചൂണ്ടിക്കാട്ടുന്നു.
ബ്രിട്ടനിലെ യൂണിവേഴ്സിറ്റി ഓഫ് എക്സെറ്റർ നടത്തിയ പുതിയ പഠനപ്രകാരം, ബീറ്റ്റൂട്ട് ജ്യൂസ് കുടിക്കുന്നത് പ്രായമായവരിൽ രക്തസമ്മർദ്ദം കുറയ്ക്കാൻ സഹായിക്കുമെന്ന് കണ്ടെത്തൽ. ബീറ്റ്റൂട്ടിൽ ധാരാളമായി അടങ്ങിയിരിക്കുന്ന ‘നൈട്രേറ്റ്’ ആണ് ഇതിന് സഹായിക്കുന്നത്. ശരീരത്തിലെത്തുന്ന ഈ നൈട്രേറ്റ് ‘നൈട്രിക് ഓക്സൈഡ്’ ആയി മാറുകയും, ഇത് രക്തക്കുഴലുകളെ വികസിപ്പിച്ച് രക്തയോട്ടം എളുപ്പമാക്കുകയും ചെയ്യുന്നു. ഈ പ്രവർത്തനം രക്തസമ്മർദ്ദം കുറയ്ക്കാൻ സഹായിക്കുന്നു.
Also Read: എന്തുകൊണ്ടാണ് ഈ നിഗൂഢ ഭൂകമ്പങ്ങൾ അമേരിക്കയിൽ മാത്രം സംഭവിക്കുന്നത്? വ്യോമിംഗ് ക്രാറ്റണിന്റെ രഹസ്യം!
അതേസമയം, പ്രായമായവരിൽ ഈ രീതി ഫലപ്രദമാണെങ്കിലും യുവാക്കളിൽ ബീറ്റ്റൂട്ട് ജ്യൂസ് കുടിച്ചതുകൊണ്ട് രക്തസമ്മർദ്ദത്തിൽ കാര്യമായ മാറ്റങ്ങളൊന്നും ഉണ്ടാകുന്നില്ലെന്നും പഠനം വ്യക്തമാക്കുന്നു. എന്തായാലും, ചിട്ടയായ ഭക്ഷണക്രമത്തിന്റെ ഭാഗമായി ബീറ്റ്റൂട്ട് ജ്യൂസ് ഉൾപ്പെടുത്തുന്നത് ഹൃദയാരോഗ്യം സംരക്ഷിക്കാൻ സഹായിക്കുന്ന മികച്ചൊരു മാർഗ്ഗമാണെന്ന് വിദഗ്ധർ അഭിപ്രായപ്പെടുന്നു.
