നെറ്റിനെ കുറ്റം പറയുന്നതിന് മുൻപ് ഇതൊന്നു നോക്കൂ; വൈഫൈ സ്പീഡ് കൂട്ടാൻ ഇതാ ചില എളുപ്പവഴികൾ

വൈഫൈ സ്പീഡ് കുറയുമ്പോൾ ഇന്റർനെറ്റ് സേവനദാതാക്കളെ കുറ്റം പറയുന്നതിന് മുൻപ് നിങ്ങളുടെ വൈഫൈ റൂട്ടർ ഇരിക്കുന്ന സ്ഥാനം കൂടി ഒന്ന് പരിശോധിക്കുന്നത് നന്നായിരിക്കും. റൂട്ടർ വീടിന്റെ ഏതെങ്കിലും ഒരു മൂലയിൽ സ്ഥാപിക്കുന്നതിന് പകരം ഏകദേശം മധ്യഭാഗത്തായി വെക്കുന്നത് എല്ലാ മുറികളിലേക്കും സിഗ്നൽ തുല്യമായി എത്താൻ സഹായിക്കും. കൂടാതെ, തറയോട് ചേർന്ന താഴ്ന്ന ഭാഗങ്ങളിൽ റൂട്ടർ വെക്കാതെ ടേബിളിന്റെയോ ഷെൽഫിന്റെയോ മുകളിൽ അല്പം ഉയരത്തിൽ വെക്കുന്നത് മികച്ച കവറേജ് ലഭിക്കാൻ ഇടയാക്കും.

റൂട്ടറിന്റെ പ്രവർത്തനം സുഗമമാകാൻ സിഗ്നലുകളെ തടയുന്ന ചുമരുകളും വാതിലുകളും കുറവുള്ള തുറസ്സായ സ്ഥലം തിരഞ്ഞെടുക്കുന്നതാണ് ഉചിതം. എന്നാൽ ചില സ്ഥലങ്ങളിൽ റൂട്ടർ സ്ഥാപിക്കുന്നത് ഒഴിവാക്കുകയും വേണം. പ്രത്യേകിച്ച് ടിവി, ഫ്രിഡ്ജ്, മൈക്രോവേവ് ഓവൻ തുടങ്ങിയ ഇലക്ട്രോണിക് ഉപകരണങ്ങൾക്ക് സമീപം റൂട്ടർ വെക്കരുത്. ഇത്തരം ഉപകരണങ്ങളിൽ നിന്നുണ്ടാകുന്ന ഇലക്ട്രോ മാഗ്നറ്റിക് തരംഗങ്ങൾ വൈഫൈ സിഗ്നലുകളിൽ തടസ്സമുണ്ടാക്കാൻ സാധ്യതയുണ്ട്.

Also Read: പഴയ ജിമെയിൽ ഐഡി മാറ്റണോ? കാത്തിരുന്ന ഫീച്ചർ എത്തി; ഇനി ഇമെയിൽ വിലാസം എളുപ്പത്തിൽ എഡിറ്റ് ചെയ്യാം!‌

കോർണർ മുറികളിലോ സ്റ്റെയർകേസിന് താഴെയോ റൂട്ടർ സ്ഥാപിക്കുന്നത് കവറേജ് കുറയ്ക്കും. റൂട്ടർ പഴയതാണെങ്കിൽ അതിന്റെ ഫേംവെയർ കൃത്യമായി അപ്ഡേറ്റ് ചെയ്യുന്നുണ്ടെന്ന് ഉറപ്പുവരുത്തുക. വീട് വലുതാണെങ്കിൽ സിഗ്നൽ എത്താത്ത ഇടങ്ങളിൽ വൈഫൈ എക്സ്റ്റൻഡറുകൾ ഉപയോഗിക്കുന്നത് സ്പീഡ് വർദ്ധിപ്പിക്കാൻ സഹായിക്കും. ഇത്തരം ചെറിയ മാറ്റങ്ങൾ വരുത്തുന്നതിലൂടെ തന്നെ ഇന്റർനെറ്റ് വേഗതയിൽ വലിയ മാറ്റം പ്രകടമാകും.