ബോളിവുഡും തെന്നിന്ത്യൻ സിനിമയും തമ്മിലുള്ള വ്യത്യാസത്തെക്കുറിച്ചും വർഷങ്ങൾക്കിപ്പുറം ഇന്ത്യൻ സിനിമയിലുണ്ടായ വലിയ മാറ്റത്തെക്കുറിച്ചും തുറന്നുപറഞ്ഞ് യുവനടൻ സന്ദീപ് കിഷൻ. തന്റെ പുതിയ നെറ്റ്ഫ്ലിക്സ് പരമ്പരയായ ‘സൂപ്പർ സുബ്ബു’വിന്റെ പ്രൊമോഷന്റെ ഭാഗമായി നൽകിയ അഭിമുഖത്തിലാണ് താരം കരിയറിന്റെ തുടക്കകാലത്തുണ്ടായ അനുഭവം പങ്കുവെച്ചത്. 2010-ൽ തന്റെ ആദ്യ ഹിന്ദി ചിത്രം പുറത്തിറങ്ങിയ സമയത്ത് മുംബൈയിൽ സിനിമ മീറ്റിങ്ങുകൾക്ക് പോകുമ്പോൾ, താൻ ഒരു തെന്നിന്ത്യൻ നടനാണെന്ന കാര്യം ആരോടും പറയരുതെന്ന് അവിടുത്തുകാർ ആവശ്യപ്പെട്ടിരുന്നതായി സന്ദീപ് വെളിപ്പെടുത്തുന്നു. പകരം ‘ഷോർ ഇൻ ദ സിറ്റി’ എന്ന സിനിമയിലൂടെ വരുന്ന ആളാണെന്ന് മാത്രം പറയാനായിരുന്നു നിർദ്ദേശം.
എന്നാൽ ഇന്ന് കാലം മാറിയെന്നും അന്ന് മാറ്റിനിർത്താൻ ശ്രമിച്ച അതേ ആളുകൾ തന്നെ ഇന്ന് ‘തെന്നിന്ത്യൻ നടൻ സന്ദീപ് കിഷൻ’ എന്ന് ബഹുമാനത്തോടെ വിശേഷിപ്പിക്കുന്നുണ്ടെന്നും താരം ചൂണ്ടിക്കാണിക്കുന്നു. ഇത് തന്റെ മാത്രം വളർച്ചയല്ല, മറിച്ച് തെന്നിന്ത്യൻ സിനിമയ്ക്കും അത് വരുന്ന ഇടങ്ങൾക്കും ഇന്ന് ഇന്ത്യൻ സിനിമയിൽ ലഭിക്കുന്ന വലിയ അംഗീകാരത്തിന്റെ തെളിവാണ്. ഇപ്പോൾ മുംബൈയിലുള്ള ഒട്ടനവധി നടീനടന്മാർ ഹൈദരാബാദിൽ വന്ന് ജോലി ചെയ്യാൻ ആത്മാർത്ഥമായി ആഗ്രഹിക്കുന്നുണ്ട്. തെലുങ്ക് സിനിമ മാത്രമല്ല, മലയാളം, കന്നഡ, തമിഴ് സിനിമകളെല്ലാം ഇന്ന് ബോളിവുഡിനൊപ്പം വലിയ തലത്തിലേക്ക് ഉയർന്നു കഴിഞ്ഞതായും ഹിന്ദി സിനിമകളുടെ വലിയ ആരാധകൻ കൂടിയായ സന്ദീപ് കിഷൻ കൂട്ടിച്ചേർത്തു.
