കൗതുകമുണർത്തുന്ന ഒരു ചെറിയ മാറ്റമാണ് ഇന്ന് ലോകമെമ്പാടുമുള്ള ഹോട്ടലുകളിൽ സംഭവിച്ചിരിക്കുന്നത്. ബജറ്റ് സ്റ്റേകൾ മുതൽ ആഡംബര റിസോർട്ടുകൾ വരെ കൈകളിൽ ഭാരമുള്ള ലോഹച്ചാവികൾക്ക് പകരം ഇലക്ട്രോണിക് കീ കാർഡുകൾ നൽകിത്തുടങ്ങിയിട്ട് കാലമേറെയായി. എന്നാൽ, ഇത് വെറുമൊരു സൗകര്യത്തിന് വേണ്ടിമാത്രമാണെന്ന് കരുതുന്നുണ്ടോ? അതിനു പിന്നിൽ അതിശയിപ്പിക്കുന്ന മറ്റ് ചില സുരക്ഷാ കാരണങ്ങളും സാങ്കേതിക നേട്ടങ്ങളുമുണ്ട്.
ലോഹച്ചാവികൾ നഷ്ടപ്പെട്ടാൽ ആകെ മൊത്തം ലോക്ക് മാറ്റിവെക്കേണ്ട വലിയ ബാധ്യതയാണ് കീ കാർഡുകൾ ഒഴിവാക്കുന്നത്. ഒരു കാർഡ് നഷ്ടപ്പെടുകയോ മോഷ്ടിക്കപ്പെടുകയോ ചെയ്താൽ, നിമിഷനേരം കൊണ്ട് ആ കാർഡ് നിഷ്ക്രിയമാക്കാൻ (deactivate) ഹോട്ടൽ അധികൃതർക്ക് സാധിക്കും. മാത്രമല്ല, പുതിയൊരു കീ കാർഡ് മിനിറ്റുകൾക്കകം അതിവേഗം തയ്യാറാക്കി നൽകാനും കഴിയും. ഒരു അതിഥിയുടെ ചെക്ക്-ഇൻ സമയം മുതൽ ചെക്ക്-ഔട്ട് വരെ മാത്രം പ്രവർത്തിക്കുന്ന രീതിയിലാണ് ഈ കാർഡുകൾ പ്രോഗ്രാം ചെയ്തിരിക്കുന്നത്. അതുകൊണ്ട് തന്നെ അനധികൃത കടന്നുകയറ്റങ്ങൾ പൂർണ്ണമായും തടയാനും ഇതിലൂടെ സാധിക്കുന്നു.
റൂം തുറക്കാൻ മാത്രമല്ല, ലിഫ്റ്റുകൾ, ജിമ്മുകൾ, സ്വിമ്മിംഗ് പൂളുകൾ, ലൗഞ്ചുകൾ എന്നിവയിലേക്കും ഈ ഒരൊറ്റ കാർഡ് ഉപയോഗിച്ച് പ്രവേശനം നേടാം. ഇതിനുപുറമെ, ഹോട്ടലുകളിലെ വൈദ്യുതി ഉപഭോഗം കുറയ്ക്കുന്നതിൽ കീ കാർഡുകൾ നിർണായക പങ്ക് വഹിക്കുന്നുണ്ട്. മുറിക്കുള്ളിലെ പ്രത്യേക സ്ലോട്ടിൽ കീ കാർഡ് വെച്ചാൽ മാത്രമേ ലൈറ്റുകളും എയർകണ്ടീഷണറും പ്രവർത്തിക്കൂ. കാർഡ് എടുത്തുമാറ്റിയാൽ വൈദ്യുതി സ്വയം നിലയ്ക്കുമെന്നതിനാൽ വലിയ തോതിലുള്ള ഊർജ്ജ നഷ്ടമാണ് ഇതിലൂടെ ഒഴിവാകുന്നത്.
ഹോട്ടൽ ജീവനക്കാരെ സംബന്ധിച്ചിടത്തോളം റൂം ആക്സസുകൾ നിരീക്ഷിക്കാനും സുരക്ഷാ സംവിധാനങ്ങൾ കൂടുതൽ കാര്യക്ഷമമായി കൈകാര്യം ചെയ്യാനും ഈ ഡിജിറ്റൽ സംവിധാനം ഏറെ സഹായകരമാണ്. സാങ്കേതികവിദ്യയുടെ ഈ പുതിയ മാറ്റം ഹോട്ടൽ വ്യവസായത്തെ കൂടുതൽ സുരക്ഷിതവും ലളിതവുമാക്കി മാറ്റിയിരിക്കുകയാണ് എന്ന് സാരം.
