ഇന്ത്യയൊട്ടാകെ സ്വാതന്ത്ര്യദിനം ആഘോഷിക്കുന്നത് ആഗസ്റ്റ് 15-ന്റെ രാവിലെയാണെങ്കിലും, രാജ്യം ഉറങ്ങിക്കിടക്കുന്ന ആ രാത്രിയുടെ യാമങ്ങളിൽ, കൃത്യമായി ആഗസ്റ്റ് 14-ന്റെ അർദ്ധരാത്രിയിൽ ദേശീയ പതാക ഉയർത്തി ചരിത്രം കുറിക്കുന്ന ഒരു അത്ഭുത നഗരം നമ്മുടെ രാജ്യത്തുണ്ട്. ബിഹാറിലെ പൂർണിയ എന്ന ചെറിയ നഗരമാണ് സ്വാതന്ത്ര്യം യാഥാർത്ഥ്യമായ ആ നിർണായക നിമിഷത്തിൽ തന്നെ പതാക ഉയർത്തി പതിറ്റാണ്ടുകളായി ഈ ആചാരം അഭിമാനത്തോടെ കാത്തുസൂക്ഷിക്കുന്നത്.
1947 ആഗസ്റ്റ് 14-ന്റെ അർദ്ധരാത്രിയിൽ രാജ്യം മുഴുവൻ സ്വാതന്ത്ര്യത്തിനായി ഉറ്റുനോക്കിയിരുന്ന ചരിത്രനിമിഷങ്ങളിലേക്കാണ് ഈ ആചാരം നീളുന്നത്. അഖില ഇന്ത്യ റേഡിയോയിലൂടെ ‘ഇന്ത്യ സ്വതന്ത്രമായിരിക്കുന്നു’ എന്ന ആ ചരിത്രപ്രധാനമായ പ്രഖ്യാപനം പുറത്തുവന്ന ആ നിമിഷം, ബിഹാറിലെ പൂർണിയയിൽ നിന്നുള്ള രാമേശ്വർ പ്രസാദ് സിംഗ് എന്ന സ്വാതന്ത്ര്യസമര സേനാനി സൂര്യോദയത്തിനായി കാത്തിരിക്കാൻ തയ്യാറായില്ല. തുടർന്ന് രാംരതൻ സാഹ, ഷംസുൽ ഹഖ് എന്നീ രണ്ട് സുഹൃത്തുക്കളോടൊപ്പം രാത്രിയുടെ മറവിൽ നഗരത്തിലേക്ക് ഇറങ്ങിയ അദ്ദേഹം, അന്നത്തെ പൂർണിയയുടെ മധ്യഭാഗത്ത്, അതായത് ഇന്ന് ‘ഝണ്ട ചൗക്ക്’ എന്നറിയപ്പെടുന്ന ചരിത്രപ്രധാനമായ സ്ഥലത്ത് പുതിയ ദേശീയ പതാക ഉയർത്തുകയായിരുന്നു.
പതാക ഉയർന്ന ആ നിമിഷം അവിടെ ഒത്തുകൂടിയ ജനങ്ങൾ ആവേശത്തോടെ ആർത്തുവിളിക്കുകയായിരുന്നു. റേഡിയോയിലൂടെ മാത്രം കേട്ടറിഞ്ഞ സ്വാതന്ത്ര്യം തങ്ങൾക്ക് കണ്ണുകൊണ്ട് കാണാനും തൊട്ടറിയാനുമുള്ള അനുഭവമായി മാറിയ ആ രാത്രിയുടെ ഓർമ്മകൾ ഇന്നും ഈ നഗരം അതേ വികാരത്തോടെയാണ് നിലനിർത്തുന്നത്. പതിറ്റാണ്ടുകൾക്കിപ്പുറവും ആഗസ്റ്റ് 14-ന്റെ രാത്രിയിൽ പൂർണിയയിലെ ജനങ്ങൾ ‘ഝണ്ട ചൗക്കിൽ’ വീണ്ടും ഒത്തുകൂടി, അന്നവർ ആദ്യമായി പതാക ഉയർത്തിയ ആ കൃത്യസമയത്ത് തന്നെ ഇന്നും ദേശീയ പതാക ഉയർത്താറുണ്ട്. ഈ സംഭവത്തോടെ ‘ഝണ്ട ചൗക്ക്’ തന്നെ ആ നാടിന്റെ ഏറ്റവും പ്രധാനപ്പെട്ട നാഴികക്കല്ലായി മാറിക്കഴിഞ്ഞിരിക്കുന്നു.
രാജ്യം മുഴുവൻ ആഗസ്റ്റ് 15-ന്റെ രാവിലത്തെ ആഘോഷങ്ങൾക്കായി കാത്തിരിക്കുമ്പോൾ, സ്വാതന്ത്ര്യത്തിന്റെ ആ യഥാർത്ഥ നിമിഷത്തെ ഏറ്റവും ആദ്യം അടയാളപ്പെടുത്തി അഭിമാനത്തോടെ തലയുയർത്തി നിൽക്കുകയാണ് ബിഹാറിലെ ഈ കൊച്ചു നഗരം. ചരിത്രത്തോട് നീതി പുലർത്തുന്ന ഈ അപൂർവ്വ ആചാരം ഏതൊരു ഭാരതീയന്റെയും നെഞ്ചിനെ അഭിമാനത്താൽ നിറയ്ക്കുന്ന ഒന്നാണ്
