സ്പോർട്സ് കാറുകളുടെ വിട്ടുവീഴ്ചയില്ലാത്ത പ്രകടനവും ഇലക്ട്രിക് ഡ്രൈവിന്റെ നവീന പവറും ഒന്നിച്ചുചേർത്ത് പോർഷെയുടെ പുതിയ കയേൻ ഇലക്ട്രിക് ഇന്ത്യൻ വിപണിയിൽ ഔദ്യോഗികമായി അവതരിപ്പിച്ചു. പോർഷെയുടെ ഏറ്റവും ജനപ്രിയമായ എസ്‌യുവി നിരയിലെ ഈ പുതിയ ഇലക്ട്രിക് പതിപ്പ് രാജ്യത്തെ ആഡംബര വാഹന വിപണിയിൽ വലിയ ചലനങ്ങളാണ് സൃഷ്ടിക്കുന്നത്.
രണ്ട് വ്യത്യസ്ത വേരിയന്റുകളിലാണ് പുതിയ കയേൻ ഇലക്ട്രിക് വിപണിയിൽ എത്തിയിരിക്കുന്നത്. 113kWh കരുത്തുറ്റ ബാറ്ററിയുമായി എത്തുന്ന ബേസ് വേരിയന്റിന് 408 എച്ച്പി കരുത്തും 750 എൻഎം ടോർക്കുമാണ് ഉള്ളത്. ലോഞ്ച് കൺട്രോൾ സഹായത്തോടെ ഇത് 442 എച്ച്പിയായും 835 എൻഎം ആയും ഉയർത്താൻ സാധിക്കും. പൂജ്യത്തിൽ നിന്ന് 100 കിലോമീറ്റർ വേഗതയിലെത്താൻ വെറും 4.8 സെക്കൻഡ് മാത്രം മതിയാകുന്ന ഈ മോഡലിന്റെ ടോപ് സ്പീഡ് മണിക്കൂറിൽ 230 കിലോമീറ്ററാണ്. 1,77,27,000 രൂപയാണ് ഇതിന്റെ അടിസ്ഥാന എക്സ്‌ഷോറൂം വില.
Also Read: വിമാനയാത്രയ്ക്ക് വൻ തിരിച്ചടി; ഇന്ധനവില കുതിച്ചുയർന്നു, ടിക്കറ്റ് നിരക്ക് വീണ്ടും വർധിച്ചേക്കും
കൂടുതൽ ആവേശകരമായ പെർഫോമൻസ് ആഗ്രഹിക്കുന്നവർക്കായി കയേൻ ടർബോ ഇലക്ട്രിക് പതിപ്പും കമ്പനി അവതരിപ്പിച്ചിട്ടുണ്ട്. 857 എച്ച്പി കരുപ്പും 1360 എൻഎം ടോർക്കും നൽകുന്ന ഈ വേരിയന്റ്, ലോഞ്ച് കൺട്രോൾ ഉപയോഗപ്പെടുത്തുമ്പോൾ 1156 എച്ച്പിയായും 1500 എൻഎം ആയും ശക്തി പ്രാപിക്കും. വെറും 2.5 സെക്കൻഡിൽ 100 കിലോമീറ്റർ വേഗത കൈവരിക്കുന്ന ടർബോ പതിപ്പിന്റെ ടോപ് സ്പീഡ് മണിക്കൂറിൽ 260 കിലോമീറ്ററാണ്. 2,27,51,000 രൂപയാണ് ഇതിന്റെ എക്സ്‌ഷോറൂം വില.
ഇലക്ട്രിക് വാഹന യുഗത്തിലേക്ക് ചുവടുവെക്കുമ്പോഴും പരമ്പരാഗത പെട്രോൾ പ്രേമികളെ കൈവിടാൻ പോർഷെ തയ്യാറായിട്ടില്ലെന്നതാണ് ശ്രദ്ധേയമായ മറ്റൊരു കാര്യം. ഇലക്ട്രിക് മോഡലുകൾക്കൊപ്പം പെട്രോൾ കയേൻ പതിപ്പുകളുടെ വിൽപനയും അടുത്ത ദശകത്തിലും തുടരുമെന്ന് കമ്പനി വ്യക്തമാക്കിയിട്ടുണ്ട്. ഐസിഇ, ഇവി എന്നീ രണ്ട് മാർഗങ്ങളും ഒരുമിച്ച് കൊണ്ടുപോകുന്ന തന്ത്രമാണ് ഇന്ത്യൻ വിപണിയിൽ ബ്രാൻഡ് സ്വീകരിച്ചിരിക്കുന്നത്. ഇത് ഉപഭോക്താക്കൾക്ക് തങ്ങളുടെ താൽപ്പര്യത്തിനനുസരിച്ച് വാഹനം തിരഞ്ഞെടുക്കാൻ വലിയ അവസരം നൽകുന്നു.
കയേൻ മോഡലിന്റെ അന്തർലീനമായ കുടുംബ യാത്രാ ഉപയോഗക്ഷമതയും ദൈനംദിന സൗകര്യങ്ങളും ഒട്ടും ചോർന്നുപോകാതെയാണ് പുതിയ ഇലക്ട്രിക് പതിപ്പിലും നിലനിർത്തിയിരിക്കുന്നത്. പോർഷെയുടെ തനതായ എൻജിനീയറിങ് മികവും ഡ്രൈവിങ് ആവേശവും പുതിയ കാലത്തിന്റെ ഇലക്ട്രിക് സാങ്കേതികവിദ്യക്കൊപ്പം കോർത്തിണക്കിയാണ് കയേൻ ഇലക്ട്രിക് നിരത്തുകളിലേക്ക് എത്തുന്നതെന്ന് കമ്പനി അധികൃതർ വ്യക്തമാക്കുന്നു
