ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തിന് ഇറാൻ പുതിയ നിയന്ത്രണങ്ങൾ ഏർപ്പെടുത്തി. ലോകത്തെ ആകെ എണ്ണ വിതരണത്തിന്റെ 20 ശതമാനവും കടന്നുപോകുന്ന ഈ തന്ത്രപ്രധാനമായ ജലപാതയിൽ “പരമാധികാര ഭരണ സംവിധാനം” നടപ്പിലാക്കാനാണ് ഇറാന്റെ തീരുമാനം. ഇതനുസരിച്ച്, കടലിടുക്കിലൂടെ സഞ്ചരിക്കാൻ ആഗ്രഹിക്കുന്ന കപ്പലുകൾ പേർഷ്യൻ ഗൾഫ് സ്ട്രെയിറ്റ് അതോറിറ്റിയുമായി ബന്ധപ്പെടുകയും ഇ-മെയിൽ വഴി മുൻകൂർ അനുമതി വാങ്ങുകയും വേണം. അമേരിക്കയും ഇസ്രയേലും നടത്തിയ ആക്രമണങ്ങളെത്തുടർന്ന് മേഖലയിൽ യുദ്ധം രൂക്ഷമായ സാഹചര്യത്തിലാണ് ഇറാൻ ഇത്തരമൊരു കടുത്ത നീക്കം നടത്തുന്നത്.
ഇസ്രയേലുമായും അമേരിക്കയുമായും ബന്ധമുള്ള കപ്പലുകൾക്ക് കർശനമായ നിയന്ത്രണങ്ങൾ ഏർപ്പെടുത്തുന്നതിനൊപ്പം, മറ്റ് കപ്പലുകൾക്ക് ടോൾ സംവിധാനം കൊണ്ടുവരാനുള്ള നിയമനിർമ്മാണവും ഇറാൻ പാർലമെന്റ് പരിഗണിക്കുന്നുണ്ട്. വെടിനിർത്തൽ ചർച്ചകൾ പരാജയപ്പെട്ടതോടെ മേഖലയിൽ സംഘർഷം വർദ്ധിച്ചിരിക്കുകയാണ്. ഇതിനിടെ, ഹോർമുസ് കടലിടുക്കിലെ കപ്പലുകൾക്ക് അകമ്പടി സേവിക്കാൻ അമേരിക്കൻ സൈന്യം എത്തുമെന്ന് ഡോണൾഡ് ട്രംപ് പ്രഖ്യാപിച്ചിരുന്നു. എന്നാൽ, അമേരിക്കൻ സൈന്യം കടലിടുക്കിലേക്ക് പ്രവേശിക്കാൻ ശ്രമിച്ചാൽ ആക്രമിക്കുമെന്ന് ഇറാൻ സൈനിക കമാൻഡ് കടുത്ത മുന്നറിയിപ്പ് നൽകിയിട്ടുണ്ട്.
Also Read: കടലിൽ കുടുങ്ങിയ കപ്പലിനെ എവിടെ അടുപ്പിക്കും? ഹാന്റവൈറസ് രോഗികളെ ഒഴിപ്പിക്കാൻ നീക്കം
അമേരിക്കയും സഖ്യകക്ഷികളും ഉപരോധങ്ങളിലൂടെയും വെടിനിർത്തൽ ലംഘനങ്ങളിലൂടെയും ഊർജ്ജ ഗതാഗതത്തിന്റെ സുരക്ഷ അപകടത്തിലാക്കിയിരിക്കുകയാണെന്ന് ഇറാൻ ആരോപിക്കുന്നു. അതേസമയം, പാക് അഭ്യർത്ഥന മാനിച്ചും സംഘർഷം ലഘൂകരിക്കുന്നതിനുമായി ട്രംപ് തന്റെ പുതിയ പദ്ധതികൾ താൽക്കാലികമായി നിർത്തിവച്ചതായും റിപ്പോർട്ടുകൾ സൂചിപ്പിക്കുന്നു. അന്താരാഷ്ട്ര കപ്പലുകൾ പാലിക്കേണ്ട പുതിയ നിയമങ്ങളും ട്രാൻസിറ്റ് പെർമിറ്റും സംബന്ധിച്ച വിശദാംശങ്ങൾ പിജിഎസ്എ വഴി കപ്പൽ കമ്പനികൾക്ക് ലഭ്യമാക്കുമെന്നും ഇറാൻ ഭരണകൂടം അറിയിച്ചു.
