പശ്ചിമ ബംഗാളിലെ ഭരണകക്ഷിയായ തൃണമൂൽ കോൺഗ്രസിനെ പ്രതിസന്ധിയിലാക്കി പാർട്ടിയിൽ ആഭ്യന്തര കലഹം രൂക്ഷമാകുന്നു. പാർട്ടി അധ്യക്ഷ മമത ബാനർജിയുടെ ഏറ്റവും വിശ്വസ്തനും ലോക്സഭയിലെ മുതിർന്ന നേതാവുമായ സുദിപ് ബന്ദോപാധ്യായ് വിമതപക്ഷത്തേക്ക് കൂറുമാറിയതാണ് ഏറ്റവും പുതിയ രാഷ്ട്രീയ സാഹചര്യം. തൃണമൂലിലെ വിമത നീക്കങ്ങൾക്ക് നേതൃത്വം നൽകുന്ന ശതാബ്ദി റോയിക്കൊപ്പം ഡൽഹിയിലെത്തി കേന്ദ്രമന്ത്രി ഭൂപേന്ദർ യാദവുമായി സുദിപ് ബന്ദോപാധ്യായ് കൂടിക്കാഴ്ച നടത്തി. പശ്ചിമ ബംഗാൾ പ്രതിപക്ഷ നേതാവ് സുവേന്ദു അധികാരിയും ഈ ചർച്ചകളിൽ പങ്കാളിയായി.
നേരത്തെ വിമത നീക്കങ്ങളിൽ നിന്ന് വിട്ടുനിന്ന സുദിപ് ബന്ദോപാധ്യായുടെ ഈ ചുവടുമാറ്റം മമത ബാനർജിക്ക് വലിയ തിരിച്ചടിയാണ് നൽകുന്നത്. ഇദ്ദേഹം കൂടി വിമതർക്കൊപ്പം ചേർന്നതോടെ, ലോക്സഭയിലെ വിമത എംപിമാരുടെ എണ്ണം 20 ആയി ഉയർന്നു. ആകെ 29 ലോക്സഭാ അംഗങ്ങളുള്ള തൃണമൂലിൽ, പാർട്ടി പിളർത്താൻ ആവശ്യമായ മൂന്നിൽ രണ്ട് ഭൂരിപക്ഷം വിമതർ ഇതിനകം മറികടന്നു കഴിഞ്ഞു.
Also Read:ഇന്ത്യൻ കരസേനയുടെ അമരത്തേക്ക് പുതിയ നായകൻ; ലെഫ്റ്റനന്റ് ജനറൽ ധീരജ് സേത്ത് കരസേനാ മേധാവിയാകും!
ലോക്സഭയിൽ ദീർഘകാലമായി തൃണമൂൽ പാർലമെന്ററി പാർട്ടി നേതാവായിരുന്ന സുദിപ് ബന്ദോപാധ്യായുടെ ഈ തീരുമാനം, 2026-ലെ നിയമസഭാ തിരഞ്ഞെടുപ്പിലെ പരാജയത്തിന് ശേഷം പാർട്ടിയിൽ ഉടലെടുത്ത പൊട്ടിത്തെറി കൂടുതൽ വഷളായതായി വ്യക്തമാക്കുന്നു. എൻഡിഎ മുന്നണിക്കൊപ്പം പ്രത്യേക വിഭാഗമായി ഇരിക്കാൻ അനുമതി തേടി ലോക്സഭാ സ്പീക്കർ ഓം ബിർളയെ കാണാനാണ് വിമതവിഭാഗത്തിന്റെ നീക്കം. ഈ രാഷ്ട്രീയ നീക്കം ബംഗാളിലെ തൃണമൂലിന്റെ അടിത്തറയ്ക്ക് തന്നെ വലിയ വെല്ലുവിളിയായി മാറിയിരിക്കുകയാണ്.
