സുസുക്കി മോട്ടോർസൈക്കിൾ ഇന്ത്യ തങ്ങളുടെ പ്രശസ്തമായ ജിക്സർ മോട്ടോർസൈക്കിൾ ശ്രേണി പുതിയ വർണ്ണ ഓപ്ഷനുകളോടെ വിപണിയിലിറക്കി. ജിക്സർ, ജിക്സർ SF, ജിക്സർ 250, ജിക്സർ SF 250, ഫ്ലെക്സ് ഫ്യൂവൽ പതിപ്പായ ജിക്സർ SF 250 FFV എന്നീ അഞ്ച് മോഡലുകളിലാണ് കമ്പനി മാറ്റങ്ങൾ വരുത്തിയിട്ടുള്ളത്. അടിസ്ഥാന മോഡലായ ജിക്സറിന് 1.37 ലക്ഷം രൂപ മുതൽ ഏറ്റവും ഉയർന്ന മോഡലായ ജിക്സർ SF 250 FFV-ക്ക് 1.98 ലക്ഷം രൂപ വരെയാണ് വില വരുന്നത്. എഞ്ചിനിലോ മറ്റ് സാങ്കേതിക സൗകര്യങ്ങളിലോ മാറ്റങ്ങളില്ലാതെ പൂർണ്ണമായും വിഷ്വൽ അപ്‌ഡേറ്റുകളോടെയാണ് ബൈക്കുകൾ എത്തിയിരിക്കുന്നത്.
155 സിസി വിഭാഗത്തിലെ ജിക്സർ, ജിക്സർ SF മോഡലുകൾക്ക് ആകർഷകമായ ഡ്യുവൽ-ടോൺ കളർ ഓപ്ഷനുകൾ ലഭിക്കുന്നുണ്ട്. മെറ്റാലിക് ഊർട്ട് ഗ്രേ, പേൾ ബ്ലേസ് ഓറഞ്ച് തുടങ്ങിയ പുതിയ കളർ കോമ്പിനേഷനുകൾ ഇവയ്ക്ക് കൂടുതൽ സ്പോർട്ടി ലുക്ക് നൽകുന്നു. 13 ബിഎച്ച്പി കരുത്തും 13.8 എൻഎം ടോർക്കും ഉത്പാദിപ്പിക്കുന്ന 155 സിസി എഞ്ചിൻ തന്നെയാണ് ഇതിൽ ഉപയോഗിച്ചിരിക്കുന്നത്. കൂടാതെ എൽഇഡി ലൈറ്റിംഗ്, സിംഗിൾ-ചാനൽ എബിഎസ്, സുസുക്കി റൈഡ് കണക്ട് എന്നീ സവിശേഷതകളും ഇതിൽ നിലനിർത്തിയിട്ടുണ്ട്.
250 സിസി മോഡലുകളായ ജിക്സർ 250, ജിക്സർ SF 250 എന്നിവയ്ക്കായി സുസുക്കി പുതിയ ഗ്ലാസ് സ്പാർക്കിൾ ബ്ലാക്ക്, മെറ്റാലിക് ഊർട്ട് ഗ്രേ കളർ സ്കീം അവതരിപ്പിച്ചു. 26.5 പിഎസ് കരുത്തുറ്റ 250 സിസി എഞ്ചിനാണ് ഇവയ്ക്കുള്ളത്. 85 ശതമാനം വരെ എത്തനോൾ കലർന്ന ഇന്ധനത്തിൽ പ്രവർത്തിക്കുന്ന ഫ്ലെക്സ്-ഫ്യുവൽ പതിപ്പായ ജിക്സർ SF 250 FFV-ക്ക് 27 ബിഎച്ച്പി കരുത്ത് ലഭിക്കും. ഇതോടെ ഉത്സവ സീസണിന് മുന്നോടിയായി വാഹനം വാങ്ങാൻ ആഗ്രഹിക്കുന്നവർക്ക് കൂടുതൽ മികച്ച കളർ ഓപ്ഷനുകൾ തെരഞ്ഞെടുക്കാൻ സാധിക്കും.
