മെക്കയുടെ ആകാശപരിധിയിലേക്ക് കടക്കുന്നതിന് മുമ്പ് തെക്ക് ഭാഗത്ത് ഒരു ഡ്രോൺ സൗദി വ്യോമപ്രതിരോധം തകർത്തതോടെയാണ് വീണ്ടും ഹൂതികൾ ചർച്ചയാകുന്നത്. സൗദി അറേബ്യയുടെ നേതൃത്വത്തിലുള്ള സഖ്യസേനയാണ് ഡ്രോൺ തകർത്തതായി അറിയിച്ചത്. രണ്ട് വിശുദ്ധ പള്ളികളുടെയും തീർഥാടകരുടെയും സുരക്ഷ ‘റെഡ് ലൈൻ’ ആണെന്നും കൂടുതൽ ആക്രമണങ്ങൾ തടയാൻ പ്രതിരോധ നടപടികൾ സ്വീകരിക്കുമെന്നും സഖ്യസേന വക്താവ് തുർക്കി അൽ മാലികി വ്യക്തമാക്കി. എന്നാൽ മെക്കയെ ലക്ഷ്യമിട്ടെന്ന സൗദിയുടെ ആരോപണം ഹൂതികൾ നിഷേധിച്ചു.
ഇത് ഒറ്റപ്പെട്ട സംഭവമല്ലെന്നാണ് പശ്ചാത്തലം വ്യക്തമാക്കുന്നത്. 2015ൽ യെമൻ ആഭ്യന്തരയുദ്ധത്തിൽ സൗദി ഇടപെട്ടതുമുതൽ ഹൂതികൾക്കെതിരെ വർഷങ്ങളായി സൈനിക നടപടികൾ തുടരുകയാണ്. എന്നിട്ടും ഹൂതികളുടെ സൈനിക ശേഷി വർധിച്ചു. ബാലിസ്റ്റിക്, ക്രൂസ് മിസൈലുകൾ, ഡ്രോണുകൾ, കപ്പൽവിരുദ്ധ മിസൈലുകൾ, നാവിക ഡ്രോണുകൾ എന്നിവ ഉൾപ്പെടുന്ന ആയുധശേഖരം അവർക്കുണ്ടെന്നാണ് റിപ്പോർട്ടുകൾ. 2024ലെ യുഎൻ വിദഗ്ധരുടെ റിപ്പോർട്ട് പ്രകാരം 2015ൽ ഏകദേശം 30,000 ആയിരുന്ന ഹൂതി അംഗസംഖ്യ 2024ൽ 3.5 ലക്ഷം വരെ ഉയർന്നതായും കണക്കാക്കുന്നു. ഇറാൻ ആയുധസഹായം നൽകുന്നുവെന്ന ആരോപണം നിഷേധിക്കുന്നുണ്ടെങ്കിലും, യുഎൻ വിദഗ്ധരുടെ കണ്ടെത്തലുകളും പിടിച്ചെടുത്ത ആയുധക്കടത്തുകളും ഹൂതികൾക്ക് വിപുലമായ സൈനിക ബന്ധങ്ങളുണ്ടെന്ന് ചൂണ്ടിക്കാട്ടുന്നു.
ഇതിനിടെ യെമനിലെ ഹൂതികൾ ചെങ്കടലിന്റെ തെക്കൻ കവാടമായ ബാബ് അൽ-മന്ദബ് മേഖലയിലേക്കും മുന്നേറിയിട്ടുണ്ട്. ചെങ്കടലിനെയും ഏഡൻ ഉൾക്കടലിനെയും ബന്ധിപ്പിക്കുന്ന ഈ കടലിടുക്ക് ആഗോള കപ്പൽഗതാഗതത്തിന് നിർണായകമാണ്. സൗദിയുടെ തന്ത്രപ്രധാനമായ ഈസ്റ്റ്-വെസ്റ്റ് എണ്ണ പൈപ്പ്‌ലൈൻ ആക്രമണത്തെ തുടർന്ന് അടച്ചുപൂട്ടേണ്ട സാഹചര്യമുണ്ടായതും മേഖലയിലെ സമ്മർദം വർധിപ്പിച്ചു. ചെങ്കടൽ വഴിയുള്ള കപ്പൽഗതാഗതത്തിലും എണ്ണവിതരണത്തിലും ഇതിന്റെ പ്രത്യാഘാതം തുടരുകയാണ്.
അതേസമയം സൗദി കിരീടാവകാശി മുഹമ്മദ് ബിൻ സൽമാൻ ഈജിപ്തിലെത്തി പ്രസിഡന്റ് അബ്ദുൽ ഫത്താഹ് അൽ-സിസിയുമായി ചർച്ച നടത്തി. ചെങ്കടലിലൂടെയും ബാബ് അൽ-മന്ദബിലൂടെയും സുരക്ഷിതമായ കപ്പൽഗതാഗതം ഉറപ്പാക്കേണ്ടതിന്റെ പ്രാധാന്യം ഇരുവരും ചൂണ്ടിക്കാട്ടി. ഇതിനിടെയാണ് അമേരിക്കൻ ഉദ്യോഗസ്ഥർ ഒമാനിൽ ഹൂതി പ്രതിനിധികളുമായി കൂടിക്കാഴ്ച നടത്തിയെന്ന റിപ്പോർട്ടും പുറത്തുവന്നത്. അതായത്, സൗദി പ്രതിരോധവും ശക്തമായ മുന്നറിയിപ്പും നൽകുമ്പോൾ ഹൂതികൾ സൈനിക ശേഷി പ്രകടിപ്പിക്കുകയും വാഷിങ്ടൺ നയതന്ത്ര ചർച്ചകൾക്ക് വഴി തേടുകയും ചെയ്യുന്ന സാഹചര്യമാണിപ്പോൾ. മെക്കയെ ചുറ്റിപ്പറ്റിയുള്ള ‘റെഡ് ലൈൻ’ പ്രഖ്യാപനം അതുകൊണ്ടുതന്നെ ഒരു ഡ്രോൺ സംഭവത്തിനപ്പുറം ചെങ്കടലിലെയും മധ്യപൂർവദേശത്തെയും വലിയ സംഘർഷത്തിന്റെ സൂചന കൂടിയാണ്.
