ഇന്ത്യൻ മിഡ്-സൈസ് എസ്‌യുവി വിപണിയിൽ പോരാട്ടം കടുപ്പിച്ച് നിസ്സാൻ തങ്ങളുടെ പുതിയ താരമായ ‘ടെക്ടൺ’ പുറത്തിറക്കി. 10.49 ലക്ഷം രൂപ മുതൽ 18.59 ലക്ഷം രൂപ വരെയാണ് (എക്‌സ്-ഷോറൂം) ഈ പ്രീമിയം എസ്‌യുവിയുടെ വില. ഇതിനകം ബുക്കിംഗ് ആരംഭിച്ചിട്ടുള്ള വാഹനത്തിന്റെ വിതരണം ജൂലൈ 20-ന് ആരംഭിക്കുമെന്ന് നിസ്സാൻ ഇന്ത്യ അറിയിച്ചു.
ഹ്യുണ്ടായി ക്രെറ്റ, കിയ സെൽറ്റോസ്, മാരുതി സുസുക്കി ഗ്രാൻഡ് വിറ്റാര, ടൊയോട്ട അർബൻ ക്രൂയിസർ ഹൈറൈഡർ, ഹോണ്ട എലിവേറ്റ് തുടങ്ങിയ വമ്പന്മാരുമായാണ് ടെക്ടൺ കൊമ്പുകോർക്കുന്നത്. റെനോ ഡസ്റ്ററിന്റെ അതേ പ്ലാറ്റ്‌ഫോമിൽ വികസിപ്പിച്ചെടുത്ത ടെക്ടൺ, നിസ്സാന്റെ പ്രശസ്തമായ പട്രോൾ എസ്‌യുവിയിൽ നിന്ന് പ്രചോദനം ഉൾക്കൊണ്ട ഡിസൈനിലാണ് ഒരുക്കിയിരിക്കുന്നത്. വലിയ ഫ്രണ്ട് ഗ്രിൽ, എൽഇഡി ഹെഡ്‌ലാമ്പുകൾ, കണക്റ്റഡ് എൽഇഡി ഡിആർഎല്ലുകൾ, മസ്കുലർ ബോണറ്റ് എന്നിവ വാഹനത്തിന് കൂടുതൽ കരുത്താർന്ന ലുക്ക് നൽകുന്നു.
ഫീച്ചറുകളാൽ സമ്പന്നം: പ്രീമിയം അനുഭവം നൽകുന്നതിനായി അത്യാധുനിക ഫീച്ചറുകളാണ് ടെക്ടണിൽ ഉൾപ്പെടുത്തിയിരിക്കുന്നത്. 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 10.25 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഗൂഗിൾ ഇന്റഗ്രേഷൻ എന്നിവ ഇതിന്റെ പ്രത്യേകതയാണ്. പനോരമിക് സൺറൂഫ്, വെന്റിലേറ്റഡ് സീറ്റുകൾ, വയർലെസ് ചാർജിങ്, ഡ്യുവൽ-സോൺ ഓട്ടോമാറ്റിക് ക്ലൈമറ്റ് കൺട്രോൾ എന്നിവയും ലഭ്യമാണ്.
സുരക്ഷയിൽ വിട്ടുവീഴ്ചയില്ല: സുരക്ഷയ്ക്ക് മുൻഗണന നൽകുന്ന ടെക്ടണിൽ ആറ് എയർബാഗുകൾ, 360 ഡിഗ്രി ക്യാമറ, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ടയർ പ്രഷർ മോണിറ്ററിംഗ് സിസ്റ്റം എന്നിവയുണ്ട്. ഉയർന്ന വേരിയന്റുകളിൽ ലെവൽ 2 അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ് (ADAS) സംവിധാനവും കമ്പനി നൽകുന്നുണ്ട്.
Also Read:സമയനിഷ്ഠയിൽ വിസ്മയം തീർത്ത് എയർ ഇന്ത്യ; ആഗോള തലത്തിൽ നാലാം സ്ഥാനത്ത്
എഞ്ചിൻ കരുത്ത്: രണ്ട് പെട്രോൾ എഞ്ചിൻ ഓപ്ഷനുകളിലാണ് ടെക്ടൺ എത്തുന്നത്.
100 bhp കരുത്തുള്ള 1.0 ലിറ്റർ ടർബോ പെട്രോൾ യൂണിറ്റ്.
163 bhp കരുത്തുള്ള 1.3 ലിറ്റർ ടർബോ പെട്രോൾ എഞ്ചിൻ. രണ്ട് എഞ്ചിനുകൾക്കൊപ്പവും 6-സ്പീഡ് മാനുവൽ ഗിയർബോക്സ് ലഭ്യമാണ്. 1.3 ലിറ്റർ എഞ്ചിനിൽ 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് (DCT) ഓപ്ഷനും ലഭിക്കും.
നിസ്സാൻ ആഗോളതലത്തിൽ നടപ്പിലാക്കുന്ന ‘വൺ കാർ, വൺ വേൾഡ്’ തന്ത്രത്തിന്റെ ഭാഗമായാണ് ടെക്ടൺ പുറത്തിറങ്ങുന്നത്. ചെന്നൈയിലെ റെനോ-നിസാൻ അലയൻസ് പ്ലാന്റിൽ നിർമ്മിക്കുന്ന ഈ വാഹനം ഇന്ത്യയിൽ മാത്രമല്ല, വിദേശ വിപണികളിലേക്കും കയറ്റുമതി ചെയ്യുമെന്ന് കമ്പനി വ്യക്തമാക്കി.
