ചെന്നൈ: ചെന്നൈയില്‍ 26കാരന്‍ ഭക്ഷ്യവിഷബാധയേറ്റ് മരിച്ചു. ചിക്കന്‍ ന്യൂഡില്‍സ് കഴിച്ച യുവാവാണ് ഭക്ഷ്യവിഷബാധയേറ്റ് മരിച്ചത്. വിഴുപുരം കീഴ്‌പെരുമ്പാക്കത്തെ മനോജ്കുമാറാണ് മരിച്ചത്. വിഴുപുരത്തെ ഒരു ഹോട്ടലില്‍ നിന്നും ചിക്കന്‍ ന്യൂഡില്‍സ് കഴിച്ച മനോജിന് മൂന്നു ദിവസമായി വയറിളക്കമായിരുന്നു.
ഇതേതുടര്‍ന്ന് യുവാവ് വീട്ടില്‍ വിശ്രമത്തിലായിരുന്നു. കഴിഞ്ഞ ദിവസം മനോജിന് ശ്വാസതടസം അനുഭവപ്പെടുകയും കുഴഞ്ഞുവീഴുകയും ചെയ്തു. തുടർന്ന് വിഴുപുരം ജില്ലാ ഗവ ആശുപത്രിയില്‍ പ്രവേശിപ്പിക്കുകയായിരുന്നു. എന്നാല്‍ ആശുപത്രിയില്‍ എത്തുന്നതിന് മുമ്പ് മരണം സംഭവിച്ചെന്ന് ആശുപത്രി അധികൃതര്‍ വ്യക്തമാക്കി. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു.
