ഇന്റർനെറ്റ് വേഗതയും എന്റർടൈൻമെന്റ് ആനുകൂല്യങ്ങളും തേടുന്നവർക്കായി ബിഎസ്എൻഎൽ പുത്തൻ ഓഫർ അവതരിപ്പിച്ചു. ബിഎസ്എൻഎൽ ‘സൂപ്പർസ്റ്റാർ പ്രീമിയം പ്ലസ്’ എന്ന ബ്രോഡ്ബാൻഡ് പ്ലാൻ ഇപ്പോൾ 20 ശതമാനം ഡിസ്കൗണ്ടിൽ സ്വന്തമാക്കാം. നിലവിൽ 999 രൂപ നിരക്കുള്ള ഈ പ്രീമിയം പ്ലാൻ, പ്രത്യേക നിബന്ധനകൾക്ക് വിധേയമായി പ്രതിമാസം വെറും 799 രൂപയ്ക്ക് ലഭ്യമാകും. ബിഎസ്എൻഎല്ലിന്റെ ഔദ്യോഗിക സോഷ്യൽ മീഡിയ അക്കൗണ്ടുകളിലൂടെയാണ് ഈ സന്തോഷവാർത്ത അറിയിച്ചിരിക്കുന്നത്. 2026 മാർച്ച് 31 വരെയാണ് ഈ ഓഫർ ആസ്വദിക്കാൻ സാധിക്കുക.
സൂപ്പർസ്റ്റാർ പ്രീമിയം പ്ലസ് പ്ലാനിലൂടെ 200 Mbps എന്ന അതിവേഗ ഇന്റർനെറ്റാണ് ഉപയോക്താക്കൾക്ക് ലഭിക്കുന്നത്. ഇതിനു പുറമേ പ്രതിമാസം 5000 ജിബി ഹൈസ്പീഡ് ഡാറ്റയും ഈ പ്ലാൻ വാഗ്ദാനം ചെയ്യുന്നു. വിനോദത്തിനായി ഡിസ്നി പ്ലസ് ഹോട്ട്സ്റ്റാർ, സോണിലൈവ്, സീ5, ഹംഗാമ, ലയൺസ്ഗേറ്റ് പ്ലേ തുടങ്ങിയ നിരവധി പ്രമുഖ ഒടിടി പ്ലാറ്റ്ഫോമുകളുടെ സബ്സ്ക്രിപ്ഷനും ഈ പ്ലാനിനൊപ്പം തികച്ചും സൗജന്യമായി ലഭിക്കും. ഒരു കുടുംബത്തിലെ മുഴുവൻ അംഗങ്ങളുടെയും ഇന്റർനെറ്റ്, എന്റർടൈൻമെന്റ് ആവശ്യങ്ങൾ നിറവേറ്റാൻ ഈ പ്ലാൻ അനുയോജ്യമാണ്.
Also Read: ഐടി മേഖലയിൽ നിയമന മാന്ദ്യം; മുൻനിര കമ്പനികളിലെ ജീവനക്കാരുടെ എണ്ണത്തിൽ കുറവ്
യഥാർത്ഥത്തിൽ 999 രൂപയുള്ള ഈ പ്ലാൻ 799 രൂപ നിരക്കിൽ ലഭിക്കാൻ ഒരു നിശ്ചിത നിബന്ധനയുണ്ട്. ഉപയോക്താക്കൾ 12 മാസത്തെ പ്ലാൻ തുക (വാർഷിക വരിക്കാർ) ഒറ്റത്തവണയായി മുൻകൂട്ടി അടയ്ക്കേണ്ടതുണ്ട്. ഇങ്ങനെ ചെയ്യുമ്പോൾ മൊത്തം തുകയിൽ 20 ശതമാനം ഇളവ് ലഭിക്കുകയും, അതുവഴി പ്രതിമാസ ചിലവ് 799 രൂപയായി കുറയുകയും ചെയ്യും. വാർഷിക പ്ലാൻ എടുക്കുന്നതിലൂടെ ഉപയോക്താക്കൾക്ക് ഏകദേശം 2397 രൂപയോളം ലാഭിക്കാൻ സാധിക്കുമെന്ന് ബിഎസ്എൻഎൽ അധികൃതർ വ്യക്തമാക്കുന്നു.
