സെക്രട്ടറിയേറ്റ് മാർച്ചിൽ പങ്കെടുത്ത എസ്.എഫ്.ഐ പ്രവർത്തകർക്കെതിരെ കടുത്ത നടപടിയുമായി പൊലീസ്. സംസ്ഥാന സെക്രട്ടറി പി.എസ്. സഞ്ജീവ്, പ്രസിഡന്റ് ശിവപ്രസാദ് എന്നിവരടക്കം 30 പേർക്കെതിരെയാണ് വധശ്രമം ഉൾപ്പെടെ കേസെടുത്തത്. കണ്ടാലറിയാവുന്ന 200 പ്രവർത്തകരെയും പ്രതിപ്പട്ടികയിൽ ഉൾപ്പെടുത്തി. ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥരെ ആക്രമിച്ചെന്ന പരാതിയിലാണ് കേസ്. കലാപാഹ്വാനം, കൃത്യനിർവഹണം തടസ്സപ്പെടുത്തൽ തുടങ്ങിയ 17 വകുപ്പുകളാണ് ചുമത്തിയിരിക്കുന്നത്.
കഴിഞ്ഞ ദിവസത്തെ സെക്രട്ടറിയേറ്റ് മാർച്ചിൽ വനിതാ പ്രവർത്തകർ ഉൾപ്പെടെ പരിക്കേറ്റതിൽ പ്രതിഷേധിച്ച് ഇന്ന് നടത്തിയ സമരത്തിലും സംഘർഷമുണ്ടായി. ഇതിനിടെ പൊലീസ് ഉദ്യോഗസ്ഥനെ സഞ്ജീവ് മർദിക്കുന്ന ദൃശ്യങ്ങൾ പുറത്തുവന്നു. അതേസമയം, കഴിഞ്ഞ ദിവസത്തെ മാർച്ചിൽ ലാത്തിച്ചാർജ് നടത്തേണ്ടിവന്നത് പ്രവർത്തകരുടെ അക്രമത്തെ തുടർന്നാണെന്നാണ് പൊലീസ് റിപ്പോർട്ട്. കൺട്രോൾ റൂം എ.സി.പിയുടെ കഴുത്തിൽ പി.എസ്. സഞ്ജീവ് കുത്തിപ്പിടിച്ചെന്നും ഇതാണ് പൊലീസ് ലാത്തി വീശാൻ ഇടയാക്കിയതെന്നും റിപ്പോർട്ടിലുണ്ട്. വനിതാ പ്രവർത്തകയുടെ മുഖത്തേറ്റ മുറിവ് പൊലീസ് ഷീൽഡ് കൊണ്ടാണെന്നും റിപ്പോർട്ടിൽ പറയുന്നു.
ALSO READ;‘സ്ത്രീകളെയല്ല, ഉപദേശിക്കേണ്ടത് പുരുഷന്മാരെ..! കാന്തപുരത്തിന് പാലൊളിയുടെ മറുപടി
വന്ദേമാതരം ആലാപനത്തെച്ചൊല്ലിയ പ്രതിഷേധമാണ് സംഘർഷത്തിലേക്ക് നീങ്ങിയത്
കേരള സർവകലാശാലയിൽ സംഘടിപ്പിച്ച ദേശീയ കായിക ദിന പരിപാടിയിൽ വന്ദേമാതരം പൂർണമായി ആലപിച്ചതിനെതിരെയാണ് എസ്.എഫ്.ഐ പ്രവർത്തകർ പ്രതിഷേധിച്ചത്. ഇതിനെ തുടർന്നുണ്ടായ പൊലീസ് നടപടിയാണ് പിന്നീട് സംഘർഷത്തിലേക്ക് മാറിയത്. പൊലീസ് നടപടിക്കെതിരെ രൂക്ഷ വിമർശനവും ഉയർന്നു. വിദ്യാർഥികൾക്കെതിരെ പൊലീസ് ക്രൂരമായ ആക്രമണം നടത്തിയെന്നും കുറ്റക്കാരായ ഉദ്യോഗസ്ഥർക്കെതിരെ കർശന നടപടി വേണമെന്നും പ്രതിപക്ഷ നേതാവ് പിണറായി വിജയൻ ആവശ്യപ്പെട്ടിരുന്നു.
അതേസമയം, സംഭവത്തിൽ പൊലീസ് രജിസ്റ്റർ ചെയ്ത കേസ് എസ്.എഫ്.ഐ പ്രവർത്തകർക്കെതിരായ നിയമനടപടി കൂടുതൽ ശക്തമാക്കുന്നതാണ്. മാർച്ചിനിടെയുണ്ടായ സംഘർഷം, പൊലീസുമായുള്ള ഏറ്റുമുട്ടൽ, പ്രവർത്തകരുടെ പരിക്ക് എന്നിവയെച്ചൊല്ലിയുള്ള ആരോപണപ്രത്യാരോപണങ്ങൾക്കിടെയാണ് ഇപ്പോൾ വധശ്രമം ഉൾപ്പെടെ 17 വകുപ്പുകൾ ചുമത്തി കേസ് എടുത്തിരിക്കുന്നത്.
