സൈനിക വ്യോമയാന ചരിത്രത്തിൽ പുതിയൊരു അധ്യായം രചിച്ചുകൊണ്ട് F-15IA യുദ്ധവിമാനം പറന്നുയരുകയാണ്. വെറും ഒരു യുദ്ധവിമാനം എന്നതിലുപരി, ശത്രുരാജ്യങ്ങളുടെ ഉറക്കം കെടുത്തുന്ന തന്ത്രപരമായ കരുത്താണ് ഈ വിമാനം. ഇന്ധനം നിറയ്ക്കാതെ തന്നെ യുദ്ധമുഖത്ത് 1,270 കിലോമീറ്റർ ദൂരപരിധിയിൽ പോരാടാൻ കഴിയുമെന്നത് ഇതിന്റെ ഏറ്റവും വലിയ പ്രത്യേകതയാണ്. ആധുനിക യുദ്ധക്കളത്തിൽ ദൂരപരിധി എന്നത് ഒരു വിമാനത്തിന്റെ ഏറ്റവും വലിയ കരുത്താണ്. കൺഫോർമൽ ഫ്യുവൽ ടാങ്കുകളുടെയും എക്സ്റ്റേണൽ ഡ്രോപ്പ് ടാങ്കുകളുടെയും സഹായത്തോടെ, ഈ ദൂരപരിധി 4,000 കിലോമീറ്റർ വരെ ഉയർത്താൻ കഴിയുമെന്നതാണ് ലോകത്തെ അത്ഭുതപ്പെടുത്തുന്നത്.
സൈനിക ഭാഷയിൽ പറഞ്ഞാൽ ‘കോംബാറ്റ് റേഡിയസ്’ അഥവാ ആയുധങ്ങളുമായി പോയി തിരികെ വരാനുള്ള ദൂരം 1,270 കിലോമീറ്ററാണ്. എന്നാൽ, ആയുധഭാരമില്ലാതെ ദൂരത്തേക്ക് മാത്രം പറക്കുന്ന ‘ഫെറി റേഞ്ച്’ 4,000 കിലോമീറ്ററാണ്. ഈ സവിശേഷത ഇസ്രായേലി വ്യോമസേനയ്ക്ക് വലിയൊരു ആശ്വാസമാണ്. ശത്രുക്കളുടെ വ്യോമപ്രതിരോധ സംവിധാനങ്ങളുടെ കണ്ണുവെട്ടിച്ച്, ടാങ്കർ വിമാനങ്ങളുടെ സഹായമില്ലാതെ തന്നെ വിദൂര ലക്ഷ്യങ്ങളിൽ ആക്രമണം നടത്താൻ ഈ വിമാനത്തിന് സാധിക്കും. അമിതമായ വലിച്ചിടൽ (Drag) ഇല്ലാതെ ഇന്ധനശേഷി വർദ്ധിപ്പിക്കുന്ന ‘കൺഫോർമൽ ഇന്ധന ടാങ്കുകൾ’ (CFT) ആണ് ഈ വിമാനത്തിന്റെ കുതിപ്പിന് പിന്നിലെ രഹസ്യം.
ALSO READ; കള്ളം പറഞ്ഞ് കഴുത്തറക്കുന്ന ട്രംപ്..! കത്തിവെക്കാൻ മധ്യസ്ഥത വഹിക്കുന്നത് ഖത്തറും പാകിസ്ഥാനും
13,380 കിലോഗ്രാം വരെ ഭാരമേറിയ ആയുധങ്ങൾ വഹിക്കാൻ ശേഷിയുള്ള ഈ വിമാനം, ബങ്കർ-ബസ്റ്റർ ബോംബുകൾ സജ്ജമാക്കുമ്പോൾ എയറോഡൈനാമിക് ഡ്രാഗ് വർദ്ധിക്കുമെങ്കിലും അതിന്റെ കരുത്ത് ഒട്ടും ചോർന്നുപോകുന്നില്ല. മൂന്ന് ബാഹ്യ ഡ്രോപ്പ് ടാങ്കുകൾ വഹിക്കാൻ ഇതിന് കഴിയും. പറക്കലിനിടയിൽ ടാങ്കുകൾ കാലിയായാൽ ഉപേക്ഷിച്ച് ഭാരം കുറയ്ക്കാനും വേഗത വീണ്ടെടുക്കാനും പൈലറ്റുമാർക്ക് സാധിക്കും. ആധുനിക യുദ്ധതന്ത്രങ്ങളിൽ ഇന്ധനം നിറയ്ക്കുന്ന മന്ദഗതിയിലുള്ള ടാങ്കർ വിമാനങ്ങളെ ആശ്രയിക്കാതെ, ശത്രുവിന്റെ ഹൃദയഭാഗത്ത് എത്തി ആക്രമണം നടത്തി തിരിച്ചുവരാൻ F-15IA-യെ സഹായിക്കുന്നത് ഈ അസാധാരണ ദൂരപരിധിയാണ്.
