ന്യൂയോർക്ക് : വിദേശ വ്യവസായികളെ ഇന്ത്യയില്‍ നിക്ഷേപത്തിനായി ക്ഷണിച്ച്‌ പ്രധാനമന്ത്രി നരേന്ദ്രമോദി. ഇന്ത്യയോടൊപ്പം പങ്കാളികളാകാൻ ഇതാണ് ഏറ്റവും മികച്ച അവസരമെന്നും അദ്ദേഹം യുഎസിൽ പറഞ്ഞു.
ന്യൂയോര്‍ക്കില്‍ നടക്കുന്ന ബ്ലൂംബെര്‍ഗ് ഗ്ലോബല്‍ ബിസിനസ് ഫോറത്തില്‍ സംസാരിക്കുകയായിരുന്നു മോദി. കഴിഞ്ഞ അഞ്ച് വര്‍ഷം രാജ്യം നേടിയ നേട്ടങ്ങളും പുരോഗതികളും ഫോറത്തില്‍ പ്രധാനമന്ത്രി എടുത്തു പറഞ്ഞു.
നിങ്ങളുടെ ആഗ്രഹങ്ങളും ഞങ്ങളുടെ സ്വപ്നങ്ങളും ഇണക്കമുള്ളതാണ്. യുഎസിന്റെ സാങ്കേതിക വിദ്യയും ഇന്ത്യയുടെ ബുദ്ധിയും ലോകത്തെ മാറ്റിമറിക്കും. ഇന്ത്യയും യുഎസും ചേർന്നാൽ ആഗോള സാമ്പത്തിക വളർച്ച കൂടുതൽ വേഗത്തിലാകും. അവിടെ എന്തെങ്കിലും വിടവ് അനുഭവപ്പെട്ടാല്‍ പാലമായി ഞാൻ നിൽ‌ക്കും– ബ്ലൂംബെർഗ് ഗ്ലോബൽ ബിസിനസ് ഫോറത്തിൽ പ്രധാനമന്ത്രി പറഞ്ഞു.
ഞങ്ങളുടെ ജനാധിപത്യവും ജുഡീഷ്യറിയും നിക്ഷേപത്തിന് സുരക്ഷ ഉറപ്പാക്കുന്നുണ്ട്. നമ്മുടെ ജനസംഖ്യാശാസ്‌ത്രം ഇന്ത്യയെ ഏറ്റവും മികച്ച എഞ്ചിനീയറിംഗ് ഗവേഷണ-വികസന താവളങ്ങളിലൊന്നാക്കി മാറ്റുന്നു. ഞങ്ങളുടെ പ്രതിരോധ മേഖല മുമ്പൊന്നുമില്ലാത്ത രീതിയില്‍ നിക്ഷേപകര്‍ക്കായി തുറന്നിട്ടിട്ടുണ്ടെന്നും മോദി വ്യക്തമാക്കി.
