ചെന്നൈ: സീസണിലെ മൂന്നാം മത്സരത്തില് സണ്റൈസേഴ്സ് ഹൈദരാബാദിനെ 13 റണ്സിന് തോല്പിച്ച് മുംബൈ ഇന്ത്യന്സ്. മുംബൈയുടെ 150 റണ്സ് പിന്തുടര്ന്ന ഹൈദരാബാദ് മൂന്ന് വീതം വിക്കറ്റ് നേടിയ ബോള്ട്ട്-ചാഹര് സഖ്യത്തിന്റെ ആക്രമണത്തില് 19.4 ഓവറില് 137 റണ്സില് പുറത്തായി. ഇതോടെ കളിച്ച മൂന്ന് മത്സരങ്ങളും തോല്വിയായി ഡേവിഡ് വാര്ണറുടേയും സംഘത്തിന്റേയും വിധി.
ഭുവിയുടെ അവസാന ഓവറില് പൊള്ളാര്ഡിന്റെ രണ്ട് സിക്സര് സഹിതം പിറന്ന 17 റണ്സാണ് മുംബൈയെ പൊരുതാവുന്ന സ്കോറിലെത്തിച്ചത്. മുംബൈ 16 ഓവറില് 107-3 എന്ന നിലയിലായിരുന്നു. കീറോണ് പൊള്ളാര്ഡും ഇഷാന് കിഷനും ക്രീസില് നില്ക്കേ അവസാന നാല് ഓവറുകളില് കൂറ്റനടികളുടെ പ്രതീക്ഷയിലായിരുന്നു മുംബൈ. എന്നാല് മുജീബ് വീണ്ടും നിര്ണായക വിക്കറ്റുമായി കളിമാറ്റി. 17-ാം ഓവറിലെ അഞ്ചാം പന്തില് കിഷന്(21 പന്തില് 12) വിക്കറ്റിന് പിന്നില് ബെയര്സ്റ്റോയുടെ കൈകളില് കുരുങ്ങി.
ഹൈദരാബാദിനായി വിജയ് ശങ്കറും മുജീബ് റഹ്മാനും രണ്ട് വീതവും, ഖലീല് അഹമ്മദ് ഒരു വിക്കറ്റും വീഴ്ത്തി. മറുപടി ബാറ്റിംഗില് ഗംഭീര തുടക്കമാണ് ഡേവിഡ് വാര്ണറും ജോണി ബെയര്സ്റ്റോയും സണ്റൈസേഴ്സിന് നല്കിയത്. ബെയര്സ്റ്റോ 22 പന്തില് നാല് സിക്സറുകളും മൂന്ന് ഫോറും സഹിതം 43 റണ്സ് നേടി.