വാഷിംഗ്ടണ്‍: മിസ്റ്റര്‍ ബീന്‍ ആയി അഭിനയിച്ച റൊവാന്‍ അറ്റ്കിന്‍സന്‍(62) ലോസ് ഏയ്ഞ്ചല്‍സിലുണ്ടായ കാറപകടത്തില്‍ അന്തരിച്ചു എന്നൊരു ബ്രേക്കിംഗ് വാര്‍ത്ത ടൈംലൈനിലെത്തിയാല്‍ ലിങ്ക് ഓപ്പണ്‍ ചെയ്യരുത് എന്നാണ് ഫോക്‌സ് ന്യൂസ് റിപ്പോര്‍ട്ട് ചെയ്തു. ലിങ്കില്‍ ക്ലിക്ക് ചെയ്താല്‍ കമ്പ്യൂട്ടര്‍ ഹാക്ക് ചെയ്യപ്പെടാനുള്ള സാധ്യതകളും ഉണ്ടെന്ന് ഫോക്‌സ് ന്യൂസ് മുന്നറിയിപ്പ് നല്‍കി.
വൈറസ് കയറിയാല്‍ സപ്പോര്‍ട്ടിംഗ് നമ്പറിലേക്ക് വിളിക്കാന്‍ ആവശ്യപ്പെടുമെന്നും ആ നമ്പറില്‍ വിളിക്കരുത് എന്നും ഫോക്‌സ് വ്യക്തമാക്കി. ഫോണ്‍ വിളിച്ചു കഴിഞ്ഞാല്‍ ക്രെഡിറ്റ് കാര്‍ഡ് വിവരങ്ങള്‍ നല്‍കിയാല്‍ മാത്രമേ കമ്പ്യൂട്ടര്‍ നന്നാക്കാന്‍ സാധിക്കുകയുള്ളു. തെറ്റിദ്ധരിപ്പിച്ച് കമ്പ്യൂട്ടറുകളില്‍ വൈറസ് കയറ്റി പണം തട്ടുകയാണ് ഹാക്കര്‍മാരുടെ ലക്ഷ്യമെന്നും റിപ്പോര്‍ട്ടില്‍ പറയുന്നു.
ഇതാദ്യമായല്ല മിസ്റ്റര്‍ ബീന്‍ ആയി അഭിനയിച്ച റൊവാന്‍ അറ്റ്കിന്‍സന്‍ മരിച്ചുവെന്ന് വ്യാജവാര്‍ത്ത പരക്കുന്നത്. ബുധനാഴ്ചയായിരുന്നു സമൂഹമാധ്യമങ്ങളില്‍ വീണ്ടും മിസ്റ്റര്‍ ബീനിന്റെ മരണ വാര്‍ത്ത പ്രചരിച്ചത്. ട്വിറ്ററിലും ഫേസ്ബുക്കിലും വളരെപ്പെട്ടെന്ന് വാര്‍ത്ത പ്രചരിച്ചതോടെയാണ് വ്യാജമാണെന്ന് മാധ്യമ റിപ്പോര്‍ട്ടുകള്‍ പുറത്തുവന്നത്.
