ഇന്‍ഡിഗോ എയര്‍ലൈന്‍സ് ഉയര്‍ന്ന ജീവനക്കാരുടെ ശമ്പളം വെട്ടിക്കുറയ്ക്കുന്നു. കൊറോണ വ്യാപനത്തെതുടര്‍ന്ന് വരുമാനത്തില്‍ വന്‍ ഇടിവുവന്ന സാഹചര്യത്തിലാണ് ഇത്തരമൊരു തീരുമാനവുമായി ഇന്‍ഡിഗോ എത്തിയത്. ശമ്പളത്തില്‍ 25 ശതമാനത്തോളം കുറവുവരുത്തുന്നതായി സിഇഒ റോണോജോയ് ദത്ത വ്യക്തമാക്കി.
ഇതുസംബന്ധിച്ച വിവരങ്ങള്‍ ഇ-മെയിലില്‍ ജീവനക്കാര്‍ക്ക് കൈമാറിയിട്ടുണ്ട്. എന്നാല്‍ കൂടുതല്‍ ജീവനക്കാരുള്ള ബാന്‍ഡ്-എ, ബി എന്നീ വിഭാഗങ്ങളിലെ ജീവനക്കാരുടെ ശമ്പളത്തില്‍ കുറവുവരുത്തില്ല.
സിഇഒയുടെ ശമ്പളത്തില്‍ 25 ശതമാനവും സീനിയര്‍ വൈസ് പ്രസിഡന്റ് മുതല്‍ മുകളിലുള്ളവരുടെ ശമ്പളം 20 ശതമാനവുമായാണ് കുറയ്ക്കുക. വൈസ് പ്രസിഡന്റ്, കോക്പിറ്റ് ക്രു എന്നിവര്‍ക്ക് 15 ശതമാനവും അസിസ്റ്റന്റ് വൈസ് പ്രസിഡന്റ്, ബാന്‍ഡ്-ഡി വിഭാഗങ്ങളിലുള്ളവര്‍ക്ക് 10 ശതമാനവും സി-ബാന്‍ഡിലുള്ളവര്‍ക്ക് അഞ്ചുശതമാനവുമാകും ശമ്പളത്തില്‍ കുറവുവരുത്തുക.
