മോഹന്‍ലാല്‍-ലിജോ ജോസ് പെല്ലിശ്ശേരി ചിത്രം ഒരുങ്ങുന്നു. അടുത്ത വർഷം ജനുവരിയിലാണ് ചിത്രീകരണം ആരംഭിക്കുക. ആന്ധ്രപ്രദേശിന്റെ പശ്ചാത്തലത്തിൽ പ്രാദേശിക ഗുസ്തിയാണ് സിനിമയുടെ പ്രമേയം എന്നും റിപ്പോർട്ടുകളുണ്ട്. നാടൻ ഗുണ്ടാ ഗെറ്റപ്പിലാകും മോഹൻലാൽ എത്തുക എന്നാണ് സൂചന. ജീത്തു ജോസഫ് ചിത്രം ‘റാം’ പൂര്‍ത്തിയാക്കിയ ശേഷമായിരിക്കും മോഹന്‍ലാല്‍-ലിജോ സിനിമ ആരംഭിക്കുക.
മമ്മൂട്ടി നായകനാകുന്ന ‘നൻപകൽ നേരത്ത് മയക്ക’മാണ് ലിജോയുടെ പുതിയ ചിത്രം. സിനിമയിൽ കള്ളൻ വേഷത്തിലാണ് മമ്മൂട്ടി എത്തുന്നത് എന്നും സൂചനകളുണ്ട്. മലയാളത്തിന്റെ രണ്ട് സൂപ്പർ സ്റ്റാറുകളുടെ വ്യത്യസ്ത ഗെറ്റപ്പ് ലിജോയുടെ സംവിധാനത്തിൽ കാണാൻ കഴിയുന്നതിന്റെ ആകാംക്ഷയിലാണ് എൽ ജെ പി ഫാൻസും മമ്മൂട്ടി-മോഹൻലാൽ ആരാധകരും. മോഹൻലാൽ സിനിമയുടെ മറ്റു വിവരങ്ങൾ പുറത്തു വന്നിട്ടില്ല. എൽജെപിയുടെ ‘ചുരുളി’ നിരൂപക ശ്രദ്ധ നേടിയ ചിത്രമായിരുന്നു. ചുരുളിക്ക് ശേഷം പ്രിയ സംവിധായകന്റെ അടുത്ത് സിനിമയ്ക്കായി കാത്തിരിക്കുകയാണ് മലയാളി പ്രേക്ഷകർ.
