ബോളിവുഡ് സൂപ്പർതാരം ആമിർ ഖാൻ മലയാളത്തിലേക്ക് എത്തുന്നതായി റിപ്പോർട്ടുകൾ. മോഹൻലാൽ ആദ്യമായി സംവിധാനം ചെയ്യുന്ന ബറോസിലാണ് ആമിർ എത്തുന്നതായാണ് സൂചന. മോഹൻ‍ലാലിന് ഒപ്പമുള്ള ആമിർ ഖാന്റെ ചിത്രങ്ങൾ പുറത്തുവന്നതോടെയാണ് അഭ്യൂഹങ്ങൾ പ്രചരിക്കുന്നത്.
മോഹൻലാലിന്റെ സുഹൃത്തായ സമീർ ഹംസയാണ് ചിത്രം പുറത്തുവിട്ടത്. മോഹൻലാലിനും ആമിർ ഖാനുമൊപ്പം നിൽക്കുന്ന ചിത്രമാണ് സമീർ ഹംസ പുറത്തുവിട്ടത്. മുംബൈയിൽ വച്ചാണ് രണ്ടു താരങ്ങളും കൂടിക്കാഴ്ച നടത്തിയത്.
ചിത്രം പുറത്തുവന്നതിന് പിന്നാലെ ആഘോഷമാക്കുകയാണ് ആരാധകർ. പുതിയ ഏതെങ്കിലും പ്രോജക്ടിനു വേണ്ടിയാണോ ഈ ഒത്തുചേരൽ എന്നാണ് ആരാധകരുടെ ചോദ്യം. മോഹൻലാൽ ഇപ്പോൾ ബറോസ് സിനിമയുടെ ചിത്രീകരണത്തിരക്കിലാണ്. ആമിറിനെ കാണാനെത്തിയതും ബറോസ് ലുക്കിലാണ്. അതിനാൽ ‘ബറോസിൽ’ ആമിർ ഖാൻ എത്തുമെന്നാണ് ആരാധകരുടെ കണക്കുകൂട്ടൽ.
